[境外馬拉松水站] 東北宮城復興馬拉松2018

宮城縣仙台市，其實已經係第2次黎，2016年都黎過，果時係參加仙台國際半馬拉松。

東北係有另一隻復興馬拉松，同我跑呢隻係兩隻唔同既主辦單位同城市。我雖然冇去過東北風土果隻，但估計兩隻係食果方面都好相似。

宮城復興，起點同小型 Expo 位於距離仙台國際機場2.5公里外，2日都有免費巴士接載。Expo 以食為主，而且唔算話好多人，當日人多都係因為親子組比賽係星期六舉行，仲有開幕式，因為住係日本，或有日本地址既跑手，bib pack 大會全部係寄出去。Expo 都係以食為主，同有檔運動用品，好細，諗住唔會跌錢，但最後都買咗副3000 yen 嘅太陽眼鏡。

跑當日多雲，而且都算涼，有少少凍。全馬分4槍起步，由0935開始每10分鐘，6時間係計算第4槍起步既 gun time。所以如果擺明係以玩同食為主，排第2，3槍起步係會再多少少時間食野。當然，玩還玩，但始終係一隻全馬，去之前都要有足夠練習，確保唔會玩出事，比人掃上車就掃興啦。

路面極平，只有幾條好短既天橋上落，絕對係 PB 路 (如果忍得口既話)，食物由第7K水站開始食到尾。開頭都係啲輕食，第一個大食會就係12公里，有三文魚子飯，去到最尾10公里啲野食真係多到可以站站停幾分數起碼，有原貝基本上比人任食，紅頭餅等等，總之好多，義工門仲大叫，好多，大家請隨便食啦(たくさん、食べてください)。

至於條路，會經過部分曾被海嘯破壞，還在修復的地區，但都有悶場。21～32公里左右大直路，冇野睇，都幾悶。但冇所謂啦，呢隻擺名黎玩同食，唔通黎真咩。

其實以前有諗過去東北風土，4月份果隻報名容易，但酒店加埋去會場既交通就卻係一大難題，加上全馬係跑2圈 但有參加過既朋友講，第2圈啲食物係唔同晒，聽落都幾吸引既。至於我跑呢隻，交通加住宿完全冇難度，亦唔會早早比 agent hold 起晒酒店，黎之前幾日都仲有好多選擇，而且唔會特別貴，加上交通算方便。所以二選一既話就一定係呢隻。

境外馬拉松水站 Overseas Marathons Hong Kong Group – OMHKG

Fitz連結: https://fitz.hk/?p=105500