幾年前，無意中睇到「西柚跑步會」主理人 Mark sir 嘅視頻，內容大致係每集請嚟各區區議員一齊做體能鍛練，而幾乎每集嘅嘉賓都會俾佢 chur 爆，但在旁嘅佢依然目無表情專注 show 肌，你有你爆偈佢有佢傾計。當時一直疑惑到底呢個係搞笑定運動節目，點都估唔到，自己同試跑員二號呢晚竟「有幸」成為俾佢 chur 爆嘅主角!
有火之外，西區街坊 Mark Sir 更有心有愛，若干年前有感港島西欠缺公眾健體設施，自發成立「西柚跑步會」，每周特定晚上於中山紀念公園為街坊免費提供健體及跑步訓練，以為街坊福利會之類食飽飯無嘢做，落嚟吹水散步揈吓手揈吓腳 ? 錯晒，認真到你驚 !
拍攝當晚寒風凜冽，訪談當刻 Peter 跟我及 Gabriel 實情凍到PK兼牙骹打震，但鏡頭前卻死命裝出輕鬆對答談笑自如；反觀 Mark Sir，一身背心短褲白飯魚造型已令我哋目定口呆，因為要上鏡死頂 show 肌嗎? Mark Sir上下打量咗我哋幾秒然後好淡言咁講:「好凍咩? 唔凍喎，我成個冬天都係著背心咋喎!」…..ok，我哋輸，你贏 !
要形容 Mark sir 的話，明顯就係動漫入面將體術練到極致嘅角色，且完全唔追求任何裝備。就如《火影忍者》嘅小李或邁特·凱，你睇佢全身精壯嘅肌肉就知佢有幾勁揪 !
----- 廣告 Ad -----
估佢唔到嘅係，縱然一身肌肉但一副卡通樣嘅 Mark Sir，竟視日本動漫《一拳超人》為啟蒙老師。劇中主角琦玉之所以成為超人，其鍛練方法 ~ 每日100下掌上壓、100下Sit-up及100下深蹲，然後再跑10公里，日復日堅持咗三年，最終成為可以一拳打死所有怪獸嘅光頭黐線佬! 小學生都知呢啲擺明一貫日本動漫嘅誇張熱血風，但 Mark Sir 竟視為秘笈，照跟照做咗兩年……其實直至呢刻，仍然唔太清楚佢當時呢返說話講真定講笑，只知當時 Peter 笑到講唔到嘢，但 Mark Sir 完全無笑過，呢吓堅!
自問都算毒L兼沉迷動漫，好多時衝緊圈嘅時候都會幻想自己就係動漫男主角，《火影忍者》嘅小李同邁特 . 凱有一必殺技叫「八門遁甲」，呢招一出即可解開身體力量限制，可暫時獲得強大力量，但事後身體會受到加倍傷害。每次衝圈要去到用埋最後一滴奶力嘅時候，就會幻想自己要使出呢招衝L爆佢。總覺得每當捨棄一切拼盡所有去完成一場賽事那刻，大家不就是使出各自嘅「八門遁甲」嗎 ?! 但我只係幻想，而Mark Sir 竟付諸實行，將動漫入面嘅情節實踐，那份癲狂非比尋常。
更癲狂嘅係寒風之下，Mark Sir及其一班學員於戶外操練至晚上11點仍未有落堂之意，嗰份對訓練嘅認真同堅毅、對《一拳超人》嘅獨有見解，及對健體嘅深入鑽研，自問全被比下去，嗰刻自覺只係一個借拍片嚟抽水嘅廢青! 更慚愧嘅係早已被 chur 爆兼太肚餓嘅我，頂唔住敗走了，剩下 Peter 及 Gabriel 繼續拍攝，辛苦晒!
----- 廣告 Ad -----
