獲傳媒封為「長跑夫婦」嘅陳家豪，姚潔貞，相信即使唔跑步嘅人都會聽過，佢哋嘅「樂家跑會」更以盛產唔少港隊成員而享負盛名，有幸相約拍攝當然嚴陣以待。
作為一個廿幾歲先開始跑步嘅我，經常暗暗嫉妒十幾歲已開始練跑嘅青少年，羨慕那份深不見底嘅潛能與爆炸力，「樂家跑會」唔少學員自初中已開始受訓且參加各大小學界比賽，青澀靦腆卻青出於藍，情形就如日本不少長跑高手其實從小開始受訓，盛產長跑高手不無原因!
----- 廣告 Ad -----
學生時代嘅我，每逢周五晚便一頭裁進 ONLINE GAME 嘅世界 。反觀「樂家跑會」嘅同學仔，佢地嘅 happy Friday 會選擇跟隨家豪教練於斧山道運動場瘋狂衝圈，無比熱血。感覺就似日本動漫「狂風吹拂」入面嘅主角 – 靚仔、跑得快、年輕有魅力!「樂家跑會」嘅A組十公里時限要求需於35分鐘內，未見過大蛇屙尿嘅我首次被降班至B組! 仍記得當晚刻苦嘅訓練，又 tempo 又 hill repeat，自問已跑到抽筋兼面容扭曲，但同組嘅學員卻游刃有餘輕鬆完成，汗顏!
家豪教練最每令自己印象深刻嘅地方，就係佢對學生嗰份無盡嘅熱情，鮮有跑會教練以搞笑同幽默感去激勵學員。當你連奶力都出埋去衝 program 兼扯晒蝦嘅同時，呢位教練竟不斷跟你講笑講無聊嘢講爛 gag，甚至忘我高歌。「Friday night is boring，斧山道跟豪哥 amazing」….難怪有同學仔衝完 hill repeat 會講啲咁嘢，仲以為佢辛苦得滯以至神智不清胡言亂語。其實事後一直苦思家豪教練到底本身喜愛搞笑抑或係為咗氹學生，但從姚潔貞 (同學們均稱呼佢做貞哥) 於訪問時不斷投訴「佢真係好煩㗎!」我已略知一二!
到底一個「咁煩」嘅 elite 跑手如何能不斷培養出優秀嘅學員呢?
家豪教練認為跑步必需定立清晰而正確嘅目標，能堅持到最後就係成功。「作為跑步教練，唔一定叫人跑步，只要搵到喜歡嘅事情，能解憂減壓就可以。」如此身經百戰嘅跑手兼出色嘅教練，竟有著如此廣闊嘅胸襟同視野，再加上其風趣幽默嘅性格，無怪乎男女學員都視之為偶像。
到訪過各大跑會之後，漸漸了解到「點樣嘅教練就會形成點樣嘅跑會」。高徒跟嚴師並不一定掛勾，家豪教練嘅抵死好玩，正正培養出一班衝完10轉 hill repeat 但仍火熱動感啦啦啦嘅學員。誠然，從內在心理質素去打穩根基、理清思緒、了解自我、找對目標及方向，比是否能成為所謂高手更重要。我膚淺地認為，並唔係每一個人都可以突破極限的，重要嘅係我哋需要為自己定立一個明確而可行嘅奮鬥目標，人生好比一場馬拉松，即使付出最大努力地去練習也難以預料那42.195公里中所發生嘅一切，即使有最好嘅教練亦只能從旁指引，最終踏進前線的也就只你一人。極喜歡家豪教練於片末所講 – 「快慢及成績一啲都唔重要，重要嘅係目標及方向，只要唔放棄就係成功。」坦率睿智，簡而精!
Screenshot
----- 廣告 Ad -----
