跑步開支嚟講，相信除咗裝備同賽事報名費以外，佔最多嘅就係醫藥費。當跑齡有返咁上下嘅時候，硬係就會受傷，然後就要不停睇醫生、針炙、按摩、物理治療，沒完沒了。點樣去克服傷患，甚至與之共存，絕對係跑者重要課題之一。
克服傷患嚟講，「逆閃堂」嘅逆閃教練 (佢話鍾意人哋咁叫佢) 絕對係專家之一，甚至可以話係呢方面嘅「真．男人」。2006年因打籃球受傷，導致右邊膝頭十字韌帶折斷，之後更因延遲醫治而令到小腿肌肉萎縮，及後花咗頗長時間方能回復。之後半月板又不幸爆裂，需切除極大部份，令到膝頭最終只能回復九成。然而，逆閃教練依然冇放棄跑步，更憑自身嘅努力不懈而做到Sub 3嘅佳績，迎難而上之絕佳示範作。
逆閃教練嘅口號 -「閃到落尾」，係閃閃發亮個「閃」，強調無論如何，只要唔放棄，即使每次只有少許突破，然後又努力地去回復，要令身心一點一點地強化下去，捱到落尾。細膩嘅思維配以逆閃教練咁 Man 嘅外形，相映成趣但令人敬佩!
可能因過往受傷經歷所致，逆閃教練係一位極著重訓練細節嘅教練，皆因任何一個微不足道嘅細節被忽略的話，均有機會導致受傷。拍攝當晚所見，學員用咗頗長時間去做正式練習前嘅伸展動作，而逆閃教練就似瑜伽老師般，有條不紊地逐一修正各同學嘅姿勢，且聽聞逆閃教練堅持小班教學，務求照顧到每一位同學，商業世界能有呢份堅持，唔容易。更新奇有趣嘅係，走訪過不少跑會，第一次見識到跑步教練指導如何於路賽中入彎掟彎，佢解釋道，本地路賽一般彎位較多，學識如何入彎掟彎絕對有助取得佳績，細緻如此嘅訓練，盡顯其心思細密。
從受過傷嘅高階跑手口中所講出嘅「循序漸進」、「先跑慢再跑快」、「學懂休息都係課題之一」特別有說服力。尤其當跑得越耐，越發現跑步係一個不停受傷回復又受傷回復嘅過程。消耗越大，自然需要花更多時間回復。但當回復之後，會發現體能比之前稍強一點點，然後又再不停咁循環，最後會發現功力不知不覺間增長，越跑越長，挑戰更多嘅距離同更快時間。嚟到「逆閃堂」，會發覺浸沉於「慢慢來，就會快起來」嘅氛圍中。
----- 廣告 Ad -----
傷患絕對係每位跑友最難面對嘅課題，但最緊要搵到適合自己嘅解決方法。每一個成功克服傷患及痛楚嘅你，會發現自己已經唔同左，因為你已經由「因受傷跑唔到嘅你」蛻變成「堅持跑落去嘅你」!
