跑步都可以好似玩咁輕鬆 ?!
要推介屯門元朗天水圍一帶嘅知名越野跑班，首推陸卓廷教練 (Plato) 領軍嘅「Run to Play」。先入為主，好喜歡呢個名，無論意思係「跑去玩」定「玩住跑」，重點係一齊嚟玩，而唔係一味強調訓練同埋訓練，like !
----- 廣告 Ad -----
Plato 教練看上去很年青，皮膚白皙兼有點書生氣質，唔識嘅話完全睇唔出係經驗豐富獲獎無數嘅跑山高手。更令人刮目相看嘅係，佢強調越野跑訓練並不能只靠一股蠻勁日練夜練，當中同樣大有學問兼一大抽理論需要鑽研，原來唔只有書生氣質，實情係文人跑手。
佢憶述自己當初亦係跟隨傳統教練學習越野跑，當時無太多嘅所謂教導或分享，只跟隨設定嘅 program 無間訓練，過程刻苦，即係「只要信不要問」嗰隻。因此，成為教練後嘅佢唔希望學生們再承襲呢種舊有訓練模式，跑會名稱「Run to Play」亦由此而來，務求學員能抱住去玩般嘅輕鬆心情嚟到上堂，刻苦跟練習並不一定要掛勾的！
「Run to Play」嘅好玩之處確然帶點不一樣，從無諗過會有教練用一整堂時間教大家點樣「上樓梯」(無錯，拍攝當晚只係教上樓梯，「落樓梯」似乎另需一整堂去學) 整整一個晚上大家如小學生般一個跟一個咁不斷上上落落地練習。Plato 教練全程傍住且有條不紊地從旁指導，如何落腳如何省力如何提腿，甚至提腿嘅角度，全部有根有據有理論，細緻如此嘅「上樓梯」練習還是頭一次，有趣之餘仲要有錢落袋 !
走訪過不下數十個跑會，逐漸感受到每一個跑會就如一個大家庭，當中學員之間，甚或教練與學員之間嘅相知相遇均嚟自緣份。世上並沒有全能嘅教練，亦唔會有必勝嘅 program，但無私嘅分享及傳授無疑成就咗每個跑會嘅拙壯成長。一直思考怎樣才是好教練，相信並沒有客觀準則，但十分贊同 Plato 嘅見解 – 出色嘅教練並不需要同時係出色嘅運動員，能於每次訓練中從旁逐一觀察，指出缺點並加以修正的，更顯細膩。「識得跑絕對唔等於識得教。」我講係囂張，佢講係客觀，不能同意更多。
