呢一兩年除咗開到荼蘼嘅 social run 外，早幾年其實我哋仲有社區跑，用雙腳遊走港九新界大小社區，藉此認識你我他所身處嘅城市，有意思。
2021年，兩位年青高階跑手黃偉雄 (偉雄) 及翁梓進 (大通)，有感疫情後大家忽然愛上跑山，且打正旗號以跑山為主嘅跑班唔多，毅然創立以越野跑為主軸嘅「DUO」跑會至今。
跑班訓練，離不開刻苦單調堅持熱血頂L住，明吖，預咗，但苦中作樂還是需要的，況且，相信跑步對大部份人嚟講只屬工餘活動，犯不著比返工更惡啃。所以唔少跑班會為學員加插較趣味性嘅「課外活動」。
----- 廣告 Ad -----
拍攝當晚碰巧「DUO」策劃咗一場荃灣社區跑，偉雄與大通嘅事前籌備工夫絕不比運動場衝圈 program 遜色，跑步以外更要動動腦筋於大街小巷尋找坐標及玩遊戲。明顯地，社區跑多了一份貼地嘅情懷，參加者們嘅聯繫以外，再跟各社區連結，難得兩位教練於正式操練以外花心思為學員帶嚟愉快嘅 Happy Friday，感覺就如回到孩提時代一班死仔通街跑，誠然，跑步不單將人亦將社區及生活連繫起嚟，偉雄與大通做到了。
好多謝「DUO」跑會嘅邀請，好感恩自己出席呢晚嘅社區跑，於此尋回因長時間刻苦操練而失去已久嘅笑聲與放鬆，盲目嘅向前衝，一味嘅熱血有時反會令人脫軌甚至迷失……
想講嘅係，加入跑會除咗求快求速度求成績，仲有無其它?
每次練到頭昏腦脹頻臨往生之際都會問自己 ~ 到底為咩而跑步？到底跑步嘅初心係咩呢 ? 到底有無純粹嘅跑 ?
----- 廣告 Ad -----
最近讀到有關日本跑手大迫傑嘅訪問，強如呢位國際知名職業跑手，竟也會陷入「唔知跑步為乜」嘅苦惱中，失去方向與動力，最終放棄參加今屆東馬。但另一方面卻開拓意想不到嘅新方向 ~ 建立啤酒品牌、加入金融管理公司，跟跑步完全風馬牛，到底係鳥倦知還大徹大悟，還是征戰連場初心偏離航道 ?
有時人太攰，暫時放低做吓其它嘢，無可厚非…..
