怪獸 Sir 嘅「Hill & Heal」跑會令我知道跑會並不一定一味熱血激昂，「Hill and Heal」意思大概係一起走進山野以獲得心靈治療，極有一種放下名利浪盪天涯嘅灑脫，十分文青非常感性。
怪獸 Sir (曾福祥)，本地知名越野跑手，獲獎無數，跟大部份高階跑手一樣，跑而優則教，短短數年間憑其個人能力及魅力，吸納門生數以百計，據學員所講，貪其 program 夠癲夠辣，跟得怪獸 Sir 當然不願正常，嚟到「Hill & Heal」，見識過同學們嘅忘我投入，你會明白偶爾做吓癲佬其實幾型的。
----- 廣告 Ad -----
也許喜歡越野跑嘅人都不願被設定嘅框架所限制，拍攝當晚訓練場地並非典型田徑場，而係佐敦谷公園，讓人強烈地有種跑出去嘅豁然開朗。
對不少本地專業級數跑手來說，要跳出嘅框架大抵不只田徑場嗰八條 track，而係本地跑界嘅體制。本地運動員所得到嘅支持度與資源向以「知慳識儉」見稱，足夠與否難有標準，但見不少跑手除要不斷突破自己外還要緊守荷包防線，大概係鍛練意志之另一法門。
又可能喜歡越野跑嘅人視野較闊心態較樂觀，怪獸 Sir 一番心底話嗒落有味 ~
「無論環境如何成績如何，開心好唔開心好，我哋係真心喜歡(跑步)嘛，即使會有氣餒唔緊要，瞓個覺，醒來又是另一天，你還是會換衫落街跑步的。先做好自己，再次投入喜愛嘅事情，資源多少也不會減少對呢件事嘅熱愛。」出面風大雨大還是落寞凋零，還是阻不了繼續跑的那顆心，真心型 !
年紀跟自己相若嘅怪獸 Sir 輕描淡寫地說著，不得不令自己一再反思，要成為一個真正強大嘅跑手，除卻要速度快體能fit與意志強之外，若缺乏一顆寬宏與豁達嘅內心，面對改變不了嘅外在環境也隨時會被輕易擊倒的，「Hill & Heal」呢一堂對自己來說相當寶貴。
