----- 廣告 Ad -----
到底有冇跑會嘅訓練係冇咁辛苦而又練到嘢嘅呢?
我會諗起人稱華哥嘅余顯華教練 (Zero) 嘅 Zero Running Club。
Zero 教練曾經係香港田徑代表隊運動員,短途以至全馬均成績蜚然。此文見街之前幾日,就以2:33完走澳洲黃金海岸馬拉松,武功高強絕非等閒。以為佢嘅訓練必定艱辛刻苦嘔白泡,點知唔係,估佢唔到 !
----- 廣告 Ad -----
拍攝當日所見,Zero 教練會先了解同學們各自嘅目標,諸如嚟緊有咩比賽、全馬目標時間甚至只為養生跑……都會花時間心機為各人制定專屬 program。換言之 ,一班20幾人隨時有10幾款 program 進行中。以為各自修行各顧各? 休想,Zero 教練場邊睇到實,每完成一組 program 都會提點注意事項,此舉反令同學們更用心更投入於訓練中,無疑係既細心又通透嘅教練!
反高潮嘅係,一直強調怕悶嘅佢最初只專注短途賽,原因係可以快啲完快啲返屋企。大概兩年前 (2022),Zero 教練終於扚起心肝完成人生首個全馬,完成時間竟然係2小時28分。訪問當刻,佢好淡然咁講:「sub-3 其實唔係咁難,但我真係唔鍾意跑步,有得揀我會留喺屋企打機。」口氣輕鬆得有如食飽飯落街散個步。是天份嗎? 佢話自己已係同輩中資質最差個! 同樣熱衷打機嘅我,面對呢位初馬2:28嘅世外高人,除咗同自己講聲收皮之外,我都係返出去做嘢先!
一個沉迷打機至老婆出禁制令嘅高階跑手,全馬2’28”究竟係點做到?
----- 廣告 Ad -----
細問之下,Zero 教練認為背負住壓力嘅練習往往難以達至理想效果。過於刻苦嘅訓練容易構成壓力,效果未必理想。嘗試放鬆自己,坦然面對自身能力,反而越能貼近目標。「只要肯嘗試同堅持就可以做到,要做sub 3真係唔難!」Zero 教練依然一副不慍不火嘅神情同語氣,頂!
消化過後,漸漸理解到 Zero 教練其實提倡緊一種健康且正面嘅跑步心態,求學不是求分數,跑步不是求里數。相信好多跑友臨近比賽都會因訓練而產生壓力 ~ 擔心做唔到配速要求、里數唔夠、食唔晒教練定嘅課表等等,不自覺焦慮起來,因而強迫自己做更多額外訓練,但結果,輕則過度疲勞休息不足,重則引至受傷,惡性循環。
拍攝當晚,有幸落堂跟大伙兒晚飯,席間感受到 Zero 教練跟大多數跑會教練有點不一樣,言行舉止間均滲出一種很 chill 且與世無爭嘅豁達。謝絕訓練L,需要休息就休息 (需要打機就打機),遵從自己感覺比強行訓練更重要。除非受薪跑步,否則只有抱住喜歡跑步甚至愛上跑步嘅心態,才能樂此不疲地跑下去。人生有太多不同範疇嘅跑道,只為快慢成績獎項名次而跑嘅步,也許有天會讓你心生厭倦乏味,累得一跪不起,我哋係咪要呢啲?!
不過,到呢刻我仍然疑惑緊,呢位一直強調自己鍾意打機多過跑步兼自稱無天份,
![](https://i0.wp.com/fitz.hk/wp-content/uploads/2024/07/WNR-Zero-04_23.jpg?resize=1220%2C715&ssl=1)
Screenshot
但初馬2:28嘅武林高手……其實訪問當晚係咪笑緊我同Peter呢 ?!