成都雪域越野賽 全程自給自足 收天價報名費

四川貢嘎山，估計賽事會路經嘅高山

網上流傳，四川成都10月24日會舉行一個名為「雪域2千里極限賽」嘅賽事，單睇基本資料，好肯定要外星人先參加得:

1. 賽事於成都市內一間叫「成都瑪夏布魯戶外酒店」起步
2. 賽事總距離號稱達1,000公里，由成都跑去稻城香格里拉鎮 (近雲南省)
3. 累計爬升20,000米，包括要爬上8座4000米以上海拔嘅雪山，其中2座海拔超過5000米。
4. 限時600小時，即係25日
5. 沿途零補給，選手要自己安排支援、導航，以及規劃行程
6. 天價報名費，個人組20888元，雙人組38888元 (人民幣)

由起點成都至終點稻城香格里拉鎮，行車距離都有980公里，計埋中途要上嘅雪山，總距離估計約2000公里，玩足25日，中途要自己安排行走路線、住宿，以及補給 (上8座雪山一段隨時要車隊跟尾)。報名費每人二萬，加埋其他洗費總共最開支三萬。所以話，呢項賽事唔單止講求體力，仲好講求財力。

終點稻城亞丁

賽事疑點多多

賽事資料公開後，唔少人都覺得呢場比賽非常可疑:

1. 比賽10月24日起步，距離而家只有個幾月。咁短時間籌辦一場咁長距離嘅賽事，係咪真係得?
2. 網上除咗搵到幾則新聞消息，係搵唔到任何比賽資訊，包括報名網頁，主辦大會網頁，連起點嘅成都酒店亦搵唔到官網。係賽事「純屬虛構」，定係比賽受到官府打壓? 不得而知。
3. 咪以為賽事嘅起點「成都瑪夏布魯戶外酒店」係咩大型贊助商。從多個酒店格價網顯示，喺呢間酒店瞓一晚大概200人民幣。一係酒店級數好低，一係酒店空置率好高，總之應該唔係有實力嘅贊助商。
4. 報名費每人要20,000人仔，但又要求選自己搞晒全程補給、路線行規劃，如果起點嘅酒店都只係200蚊一晚，咁貴嘅報名費又用咗去邊?
5. 賽事主辦機構「野徑中國」，網上完全搵唔到相關資料。

賽事嘅起點「成都瑪夏布魯戶外酒店」，位於成都二環

喺「只有騙子係真」嘅國度，呢場比賽都係當花邊新聞笑下就算，除非有重大更新，否則唔使認真對待，亦唔好諗住報名。

資料: 新浪網