肯雅跑手 Thomas Muli 全馬最佳時間 2:18:03，雖然未能同頂尖選手較勁，但仍然喺亞洲搵到食。36歲嘅 Thomas，唔知係咪因為跑步生涯已近尾聲，所以早前喺台灣再入課堂修讀中文。
Thomas 原本喺台灣一邊讀書，一邊參加長跑比賽，用贏返嚟嘅獎金交學費、籌措生活費，仲有盈餘供養肯雅家人。不過，武肺爆發之後，台灣長跑比賽停擺，Thomas 差唔多零收入。Thomas 只能夠喺苗栗縣嘅竹南運動公園賣跑步襪，不過賺得唔多，差啲搞到被遣返回非洲。
好彩，年初有多家媒體報道呢單嘢之後，Thomas 人氣急升，幾日之間為佢籌得11萬台灣，足夠佢交學費留喺台灣。
拒絕市民捐款自力更生
雖然保住學藉同居留權，但 Thomas 仍然要喺公園擺檔賣襪。佢話，好感激台灣民眾嘅關懷，而佢見到台灣已開始重啟長跑賽事，佢相信可以靠自己雙腳賺到生活費，所以希望大家將善款捐畀更有需要嘅人。
----- 廣告 Ad -----
Thomas 而家定期喺公園擺檔賣襪，為嘅唔單止係賺錢，佢亦希望可以透過檔攤同更多人交流。
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。