#沖繩100 同學跑後感 | 多謝自己沒有放棄

2023年7月，東華三院黃鳳翎中學師生近20人，飛到日本沖繩跑步完成110公里。帶隊的陳健偉老師為團隊寫了八篇文章，在第七日越過終點線之後，他總括了一句:「跑步，能改變人心。」

他們返港後，小編問陳老師:「你日日都準時交稿，寫你嘅所見所聞，咁你班學生又有咩感受?」本以為陳老師要經歷萬水千山威逼利誘才可動員同學交短文幾篇，殊不知大約一星期後，收到陳老師的稿件，是一篇「萬言書」，文章總字數超過10,000。

小編讀著這一萬字，看見到同學的堅忍毅力之餘，更看到他們怎樣在跑步之中去認識自己。也回應了「跑步，能改變人心。」這句話。

文章編排由小編修訂，排名不分先後男女左右高班低班。注意: 長文慎入

4D 張小媛: 這是一場無止境的夢

喺呢七日六夜嘅旅程入面，每一日都越跑越攰、腿部積累嘅酸痛以及自己腿部受傷而引起的痛楚，令到我每一刻都想放棄。我會問自己:「點解咁攰仲要跑？不如每日一開跑就上旅遊巴休息算啦，跑乜嘢啫？」但係每當我見到隊員們都努力圍住同一個目標而去進發時 便会激起我嘅鬥志，盡自己能力陪大家一齊跑落去。

呢幾日嘅旅程入邊，都深深印在我嘅腦海裏，而令我最深刻嘅一幕就係喺沖繩100最後里數衝刺嘅時刻，大家一齊拖住手，一齊奔過呢幾日大家一齊努力進發嘅目標，每次諗返起呢一刻，心入面都依然很有感觸，覺得咁多人圍繞着一個目標而去努力係一件好難得嘅事。

呢次沖繩100唔單單係一段過去的事，更加係大家青春入邊嘅一段夢，夢係無止境的，夢係不能約束的，就好似呢七日六夜嘅旅程，一班人每日都不可思議地喺一條一望無際的路面上奔跑直至跑到終點，每日都喺炎熱嘅太陽下展現自己的毅力自由地奔放而喺沖繩呢短短嘅幾日裏，將成為我永遠都不肯消逝的時光。

5B 余鴻鈞: 我的青春去日本沖繩跑了110公里!

我是沖繩100完成者余鴻鈞，沖繩一百令我明白三樣的體會，堅毅、感恩、享受跑步。

我接觸長跑兩年平時也喜歡落街跑步，但整過旅程是屬於魔鬼級的辛苦，在平均32度的溫度下七日高強度的跑步，如何形容整個經歷就猶如在桑拿房裡跑步我認為是最適合的啦。我冇諗過放棄，我熱愛跑步我認為陽光下的每一滴汗水都是自由的，我享受整個過程。

我好感恩母校、老師、同學的激勵，在我身體接近透支的時候鼓勵我、幫助我完成沖繩100少了任何一位我都不認為我可以完成咁瘋狂的事情。我好享受途中的美景，沖繩真是好靚啊! 一邊跑步一邊看透徹的海水是一種10星級體驗。我最深刻的事情是在我第四日的跑步，我崴親腳那一刻每位隊員老師都來了解我的情況，我感受到很多很多的愛，永遠不會忘記那一時刻。完成使命後我想對我身邊的每個人說我的青春去日本沖繩跑了110公里! 太酷啦!

2B 徐妙嘉: 一個畢生難忘的經歷

1. 有沒有想過放棄?
   有。靠意志力，一直同自己講加油，加上老師、隊友們的陪伴
2. 最難忘的事甚麼?
   是大家手牽着手跑過100公里
3. 完成一刻跟自己說了甚麼?
   「之前的辛苦是值得的」
4. 跟自己說的話
   相信這一次的回憶令我畢生難忘，回港後的巴士上看見了，很多訓練時候跑過的地方和影子，湧上了一種難以言表的感情。

1A 李子謙: 畀啲掌聲自己

1. 經過頭三天的暴曬、高溫和乳酸漸漸增多的折磨，讓後三天的跑步路段更難跑更想放棄，後三天跑時每分每秒都真係好好好想放棄，途中腳踝還受傷了，多得kate姐姐每天早上幫我包紥減輕痛處讓我放心去繼續跑，而且看見每位同學，導師和老師在隊頭堅持為完成同一個目標而努力奮鬥和鼓勵我們，我知道一旦停下腳步就會後悔讓大家失望沒完成目標，所以我默不作聲一口氣完成我們定下的目標!
2. 最難忘最深刻肯定係完成目標的最後一天啦，我們每個人辛苦了六天堅持了六天和互相陪伴跑步了六天，在美麗海水族館門口一起手拖手衝向終點的一刻。每位一起跑過步的同學的樣子和陪伴的時光在我腦海成為永不忘記的歷史一刻!
3. 完全想不到我自己會完成到這個不可思議的里數挑戰。腳踝受傷，暴曬，高溫還能堅持成完成。試過才知道能不能成功，不試就一定不成功。這次這麼辛苦都能度過，以後有什麼問題不要逃避，肯定能度過的 一定可以!
4. 很佩服和欣賞自己即使腳踝跑時受傷了，還堅持一起完成全部路程。小學到現在沒有很大的成就感和拿過什麼獎項，但藉著這次機會然我覺得完成後有超超級大的成就感，還學會了很多處事態度面對問題時不要逃避、面對困難不會輕易放棄。

3C 胡鈺琪: 堅持走下去總會有收穫

堅持跑步並不是件容易的事情，天氣、腳痛、時間任何一點因素都可能成為我放棄的原因，道理都懂，但想跑步的人很多，但能堅持下來的卻很少，對於意志力比較強的隊友來說，枯燥的堅持往往也能堅持很好，當我望不到終點時，一次又一次想放棄跑步，但最終還是跑了下來，好多人問我「那麼辛苦，為什麼你總能堅持下去?」，我說「可能我真的很喜歡跑步吧」，我同自己講 讓堅持變成一種習慣，在終點遇見更好的自己，我在沖繩100之中找到堅毅不屈的精神，這份精神一直在我的運動生涯裏伴隨著我。它讓我學會做事不能半途而廢，不能輕易放棄，必定要堅持到底。

完成後的感受，跑步本身是一件比較辛苦的事情，很多時候變成依靠意志力支撐，但多數仍然樂在其中，有些人熬過這個點會越跑越輕鬆，有些人堅持不下來就休息，其實那些能夠越跑越輕鬆的往往是長期堅持跑步的隊員，他們有長跑的經驗和耐力，反而不是經常跑的人就沒辦法達到那個階段，正如我們隊員所講(不管結果如何)，在我們經歷了那一段艱難的過程後，等我們身體恢復體力，整個人感覺非常舒服，就像減輕負重一樣，流過汗水，隊員們的許多壓力也被釋放了。無論是生活還是學習，都需要跑步這種過程，只有經歷困難並堅持走下去總會有收穫。加油! 跑起來!

4C 李凱蕎: 坐在巴士上忐忑的心情

其實咁多日 我淨係跑咗2.5日連一半都冇 我去到唔應該係坐喺旅遊巴/支援車 而喺應該同17個同學一齊並肩作戰 喺5日我坐喺車上面就不停諗 其實我想落車但又唔想落車 想落車喺因為我嚟到嘅目的唔係嚟坐旅遊巴 唔係淨係嚟同大家Hi five企定定打氣 而係用行動嚟同大家一齊去完成 而唔想落車喺因為出面真係好熱 見到有啲同學上車都好擔心自己會頂唔順 其實喺車上面涼冷氣睇電話幾舒服 但我嚟到最想嘅唔係咁 而係同大家一齊跑去終點 沿途影吓相咁 但最後嗰一日我都堅持盡量跑 最終都跑到一半 喺最後嗰4K我其實真係好辛苦 好想喊 明明淨係4K對我嚟講唔應該咁 但就因為心肺唔得而咁 但我見到日日都有跑嘅大家都可以捱到去終點 我自己就冇點辛苦過 如果我唔跑 咁我依個隊長就真係得個名 我都好想帶到大家一齊去終點 但反而係要大家等返我一個 我自己都過意唔去 只希望大家見到我係有盡力去同大家一齊完成依件事 世界上真係冇嘢係冇可能 去到終點因為條氣唔順就一直呼吸唔到 喊咗出嚟 直到呼吸到嘅時候又因為依個沖繩100之旅 太感動同埋好遺憾又好唔捨得而喊到收唔到聲 跑步唔只可以改變人心 仲改變咗我嘅健康 原本唔舒服都可以跑到冇事 成件事好奇妙

如果要講最難忘嘅事其實真係好多好多 可以講到喺車上面見住大家曬住跑 之後一齊去食飯 食完飯你哋又繼續跑 我就喺車上鼓勵大家 喺終點到等大家過嚟 睇住你哋跑到終點又開心又辛苦嘅樣 之後一齊去食晚飯 行街 成個過程好開心又可以講話有個姓蘇嘅同學日日就話「今日一定上車/最後1K就上車/唔跑啦」但佢到第七日都冇上過車 即使領導叫佢上車佢都偷偷地跟咗去跑 雖然成日就話唔得㗎啦 但佢到最後都好勁咁完成7日6夜嘅沖繩之旅。

仲有就係有同學因為腳傷同身體不適而要上車休息一段 但佢哋都堅持話要落車或者直接繼續跑 大家都好西利 有得上車都唔上 寧願繼續跑 依份決心好勁啊 我都好佩服

導遊姨姨同司機都好好人 佢哋要做嘅嘢應該淨係負責我哋嘅飲食同去邊到 但佢哋仲落車一齊去打氣 一齊去拍片 仲會幫大家買水 買鹽糖 司機仲特登去買個水壺同大家噴水降溫 最後兩日連導遊姨姨都比大家感動到 要一齊跑 真係未見過有人仲要唔係年青人會咁樣同我哋一齊去跑 雖然唔多 但都感受到嗰鼓氣 好難忘啊

而最深刻嘅係我同1010房嘅室友 日日夜夜都見面 朝早就一齊落去同枱食早餐 一齊去洗衫 每晚社工急救員就嚟同兩個室友消毒傷口 日日就排隊沖涼 而最後一晚一齊去游水之後趕去沖涼 點知唔夠沖涼位 我就同一個室友去咗女領導嘅房間到沖 好趕時間咁去做晒所有野就去集合 全部嘢都好開心好深刻

7日6夜嘅沖繩之旅好快就完咗啦 最想同自己講嘅係 完成唔到7日嘅大獎好遺憾但有參與當中已經好好

我已經好掛住大家一齊去奮鬥 點解最尾身體好返但旅程就完咗 點解唔好好照顧自己身體 好難得先可以同一班人一齊出國跑步 但自己就冇完成到 會好好記得依份感覺 依7日23個人同一條心同一個目標真係好似一家人咁 由同一間學校唔同年級明明互不相識 但參加咗依個沖繩100 逢星期二 六 堅持半年幾 大家乜都傾一餐咁 好開心好滾動呢 正所謂「一個人可以跑得很快，但一群人卻可以跑得更遠!」如果唔係有大家 相信我都唔會堅持咁耐 希望可以同大家keep住依種感覺啦 下年就中五啦 時間過得好快 好想同大家一齊去玩去跑去camp 但機會不大了 因為未必23個個都會一齊嚟到 同一隊人一齊去 只要少咗一個成件事就已經唔同晒啦 Miss All!!!

我最想多謝嘅人有23個咁多 要特別多謝阿Meg喺依大半年幫我哋搞咁多嘢 要plan行程 為咗又可以做到跑步嘅體驗又可以有玩樂嘅成份 就已經費盡咗佢唔少青春時間啦 佢仲要幫我哋23個人Book酒店 訂機票 搵沖繩嘅導遊帶我哋 佢好叻咁搵到一個可以同我哋用普通話溝通到嘅導遊姨姨 成個沖繩要搵一個識普通話又識同沖繩嗰邊溝通嘅人真係好難 同埋佢為咗依個沖繩100都喺依大半年入面同我哋一齊加操 就係為咗可以一齊去沖繩跑 佢由唔跑步都練到可以跑到10K 佢真係為咗我哋付出咗好多 即使佢去到沖繩佢都係永遠跑最尾墊底 就算佢真係跑唔到佢都會坐電單車喺隔離墊底 跑步都會有樹蔭遮下 但坐電單車仲要超慢咁喺太陽底下 真係要曬足全程 明明有旅遊巴可以有冷氣有得遮 佢都選擇坐電單車陪大家 就係想大家知道就算跑得點慢都好 佢都一定會喺後面支持大家 佢真係好叻 如果冇佢依個旅程根本會搞到手忙腳亂 佢仲要其實唔係一位有責任負責我哋嘅人 佢只係一個義工 但佢都堅持幫我哋搞咁多嘢 相信依個旅程佢會好難忘 多謝你啊貌美如花人見人愛車見車載可愛溫柔善良大方得體永遠15歲嘅Meg姐

之後就梗係多謝三個男神啦 多謝你哋喺依大半年對我哋19個同學嘅培訓 如果唔係你哋要我哋逢星期二同六加操 我相信唔會有好多個同學會自己去練包括我在內 仲同阿Meg搞咗兩次嘅地獄式訓練營比我哋 就係為咗維持我哋嘅士氣同體能 我諗整個中學生涯入面我都唔會同到一班同學老師社工一齊去Camp就係為咗跑步 仲喺依大半年中成日喺自己銀包拎錢出嚟請我哋食嘢 真係好開心

要多謝最年輕嘅健偉sir啦 辛苦你喺沖繩前幫我哋不停搵傳媒做訪問搵佢哋幫我哋記錄成件事 喺沖繩後又每晚都要打稿比傳媒同佢哋講我哋一日嘅行程同感受 唔係你 我諗冇乜人知我哋訓練咗大半年就係為咗去沖繩跑100公里 你身為學校輔導老師同兩個細路仔嘅爸爸 相信你都好忙 仲要幫我哋搞咁多嘢真係辛苦你啦 雖然你喺輔導主任但你喺長跑比我嘅印象就好似一個朋友咁 成日同我哋講笑 仲比我哋玩 有日你問我你惡唔惡 我就話唔惡啊 因為你真係好好人 好少見到你鬧人 次次見到你都喺笑住咁講嘢 同你講嘢真係可以好放鬆 多謝你喺依大半年對我哋嘅付出 而我哋都一齊完成咗一個你4年嚟嘅夢想 喺沖繩跑完第六日嘅分享 我都係第一次見你喊 相信依個夢你真係好想同一班同學一齊完成 我成日笑你不過你都唔嬲 你真係好大方㗎啫 不過都對唔住啊 我知有時可能真係過分咗 但你都冇嬲我 你影嘅相真係好靚 自拍都好勁 無論有幾多個人你都可以影得晒 你喺被老師耽誤咗嘅攝影師 真係唔知點解你可以喺Fitz講到我嘅感受出嚟 連我自己都講同到但你可以完整咁描述返出嚟 果然喺被欺凌嘅輔導主任 相信你都好攰啦 多謝你亦都辛苦你了 最年輕又體貼大方仲要好低調嘅米仔

之後就梗係多謝我哋成日講爛gag嘅飛sir啦 辛苦你喺唔只依大半年嘅時候幫我哋拍咗咁多片 仲要剪埋片比我哋 明明你嘅職責淨係同啲同學傾吓偈同埋去長跑幫手 但你仲做埋識跑嘅攝影師 要一邊跑一邊拎住部cam 其實一定好辛苦好攰 但你依樣嘢就維持咗成最少年幾 好西利 拎住個cam時快時慢 又要影到好快嘅同學又要影到較慢嘅同學 有時又要跑去前面影 你跑嘅里數每次都一定比我哋多1-2公里 喺沖繩30幾度嘅高溫下都仲要拎住部幾重嘅cam影住 食飯又要影 景點又要影 買嘢食又要影 Shopping又要影 總之去到邊都影緊咁 隻手可能仲攰過對腳 辛苦了 不過你成日都講啲爛gag有時講啲嘢又好好笑 真係令到成個旅程嘅氣氛變晒 同你講嘢都好放鬆 之後喺沖繩有同學整親都一定喺你幫手包紮同消毒 每晚都過嚟同小媛同詠欣消毒 仲講笑分散佢哋注意力 你係被社工耽誤嘅護士同Camman 多謝你呀又靚仔又風趣幽默嘅氣氛組組長飛仔

最後就梗係可以惡又可以講得笑嘅少偉sir啦 雖然你要喺學校處理事務 但都feel到你精神上支持我哋 你比我哋嘅1000yen我一直覺得係護身符之類嚟所以冇用 連信封都未拆 點知原來喺比我哋留念嘅 不過都一樣啫 即使你冇去沖繩但你都著住我哋嘅隊衫嚟接機 真係好感動 多謝你喺百忙之中抽時間嚟接我哋同我哋一齊練跑 雖然你係訓導主任但你喺長跑都會同我哋一齊講笑 有時你又會好惡喎 你真係又惡得又玩得嘅訓導主任 我都講過一開始以為你喺訓導主任淨係會好惡 點知喺長跑比我見到你有溫柔嘅一面 哈 多謝你啊又惡又溫柔又講得笑嘅訓導主任

6C 陳俊奮: 夕陽代表著勝利

1. 第6日的最後7K想過放棄，因為肌肉長期的疲勞和炎熱的太陽。但是看到前方的隊友仍堅持著以及身邊人的鼓勵促使我堅持下去，並且將終點假設成前方幾十米，「疑似終點」令自己更加有幹勁，最終堅持到真正的終點。
2. 最深刻的一刻是 完成100挑戰後，坐大巴回到酒店，下車看到美麗的夕陽，它的光芒蘊含了剛剛勝利的喜悅及美好，亦讓我對人生的期望油然而生，我的人生也要像其一樣耀眼。
3. 衝線一刻跟自己說:「堅持就是勝利，成功完成了！」
4. 堅持的痛苦會轉換成成功喜悅的甜。就像向著沖繩100挑戰努力，我要銘記自己的目標，在生活及學業上向目標努力奮鬥和拼搏。

3D 林俊煬: 100公里都跑到仲有咩困難可以難到我?

1. 咁多日跑步旅程諗過好多次放棄，最深刻係第二日因為唔習慣跑咁長，所以腿很辛苦，呼吸亦都唔暢順所以諗過上車坐下休息，最後都是因為朋友沒有放棄堅持落去，是羈絆嘅力量令我堅持落嚟。
2. 最深刻是同學仔完成110公里後面手拖手一齊跑最後100米，真係好感動因為感到十分有成就感，完成一件好瘋狂嘅事，真的很型!
3. 衝線一刻跟自己說:「你並唔係乜都做唔到，100公里都跑到仲有咩困難可以難到我?」
   4.好開心，可以一班人一齊去沖繩，跑步行街買嘢睇海，這可能是我人生中唯一一次，一班人去跑步一班人去玩一班人去國外了解世界，很難忘的回憶，回想起訓練嘅日子就會諗起沖繩諗起一班同學仔，很感動很滿足

4D 許欣瑩: 這是人生中最美的階段

1. 在第三四天的時候，因為腳傷跟膝蓋傷的原因，真的很難有繼續跑的想法; 但我又一想，來日本玩能常有，但與同學與老師一起邊跑邊玩，一同領略這世界的絕世風景乃不可多得之事。所以我堅持了下來，和大家一起努力，一起享受努力後的成果。
2. 衝線一刻跟自己說:「原來我也可以做到看似不可能的事。努力不一定有成果，但不努力一定沒有。」
3. 希望大家能勇敢追逐夢想。而不是小心謹慎地害怕後果。應像向日葵那樣，向陽而開，我們都被世俗的煩瑣和學業的繁重壓垮了。
4. 其實人生就是一場旅行、在青春這一旅程的風景很美很燦爛，這也將是我們人生中最美的階段，我們應該好好體驗，不要為它的逝去而焦慮，時間永遠在行走，我們也應該追上它的腳步，在每一途中續放我們的精彩。

3A 呂康燁: 我在這裏建立自信

1. 冇諗過放棄，喺半年內用咗咁多時間和汗水訓練，如果放棄會前工盡廢 會對自己後悔和失望。
2. 衝線一刻跟自己說:「你做到啦！經歷過咁多，你終於完成啦! 呢個旅程係生命中嘅一個重要里程碑，記得珍惜佢。」
3. 喺未加入長跑小組之前，我係完全唔做任何運動同埋唔會參與學校嘅課外活動，讀書又唔好，覺得自己嘅人生過得好迷惘。
4. 但係在 form 2 的學期尾 睇咗一套動漫叫:「強風吹拂」裏面講述有關有群八成人欠缺跑步經驗與訓練的選手，必須在一年內完成訓練、爭取參賽，在「箱根驛傳」達成跑進前10名的「不可能任務」。但係佢哋最後都係成功咗跑進第10名。睇到非常熱血。理所當然地在from3我入左長跑小組，剛開始的時候，我只能跑1-2公里就已經氣喘吁吁。過咗幾個月之後漸漸地，我的體力提高了，能夠跑完5公里並不覺得累。
5. 在12月定係唔知幾月嘅10公里測試，可以話係改變左我好多，在之前我根本冇諗過我可以跑到 ，但係喺真係開跑嗰陣時 我諗起嗰套動畫 「佢哋都可以做到，點解我做唔到」係跑到5km的時候 我真係好想停，但係我冇放棄；唔係為咗去沖繩，而係唔想對自己後悔，最後我撐到落嚟啦！嗰陣時嘅喜悅完全唔俾跑完100公里少。成功感好大，自信就係呢度建立 以至於之後我開始打籃球同埋成績變好。真係改變左我好多。
6. 轉眼就黎到去沖繩前幾日的15km測試，我失敗左，成個人都覺得好挫敗 後悔在考試期間冇多啲訓練。自此之後為了不令自己後悔，在跑步期間我都會全力以赴 表現出最好的自己！如果人生感到迷惘 就選擇最辛苦嘅路。
7. 最後 我真係好唔捨得你哋同埋沖繩。好感謝健偉sir 和飛sir 。你哋可能感受唔到，其實你哋係我人生中非常重要的導師！參與到長跑小組和你們是我人生中的轉捩點。再次感謝!

3C 蘇偉軒: 難忘手拖手完成110公里

1. 有沒有想過放棄?
   有，但係大家都一直向前跑我都唔想放棄!
2. 令我最深刻嘅事刻梗係我哋一齊手拖手完成110公里!
3. 衝線一刻跟自己說:「你得咗啦!」
4. 真係好攰好辛苦zz但係好開心，因為如果之後啲人問我做過最癲嘅事係咩，我會話係七日入面同阿Sir同埋朋友跑晒110公里

3A 黃致豪: 意志力大提升

1. 最難時刻是訓練開始時,身體對跑步的負荷很大,步伐也很不稱勻，容易產生自我懷疑。但想到教練的鼓勵和支持，以及想證明給自己看，可以堅持下去。
2. 最難忘的是第五日最後四公里。個人冇意識,不斷重複同一個肌肉動作，隻腳好酸痛。但教練和隊友的陪伴，也讓我感覺有力量可以跑出艱難的每一步。
3. 完成後說的是: 耐得住性、嚇唔到我! 展現內心的喜悅
4. 完成後的感想是彌足珍貴。長期的跑步訓練和賽程考驗的是毅力、意志力和堅持，這些品質不僅有助跑步，更重要的是協助面對人生。
5. 跑步不僅強身健體，還在意志上給予我很大的提升。當一開始時痛苦掙扎，結果卻成功跑到終點時，給予我很大的動力繼續朝更高的目標前進。這次的經歷將與我永生難忘
6. 教練和隊友的陪伴，讓原本單打獨鬥的跑步充滿歡樂。我們互相鼓勵，一起成長。教練用實際行動展現執著和毅力。
7. 在終點，我雖然筋疲力盡，但心中卻充滿成就感與喜悅。這股動力將推動我朝更高的目標前進。邁出每一步,都有教練和隊友陪伴，現在我知道，只要我想，肯去堅持，人心自若時什麼都能做到! 你們就是我最後一公里的動力!

6A 陳仲銘: 「時間過得好快，想跑多一百公里。」

1. 有沒有想過放棄?
   第五日最後4公里 一整條路沒有遮蔭一直被太陽曬同飲曬所有水 嗰一刻最想放棄，之後我盡量諗住就跑完 唔好停下腳步堅持落去。
2. 最深刻係第一日跑步 是我第一次去沖繩 第一次在沖繩跑步 第一次出國旅行。令我在第一日跑步一直係到欣賞風景 忘記自己要跑步
3. 衝線一刻跟自己說:「時間過得好快，想跑多一百公里。」
4. 我唔應該係出發前追公里數 跑到自己對腳係出發前就攰

6B 何俊榮: 由跑步說到DSE放榜

今次沖繩100嘅旅程雖然辛苦，但我喺過程中有好大嘅成功感同得著。

七月嘅沖繩天氣好好，每日都係藍天白雲，有時候頭頂仲要一片雲都無，陽光好猛烈亦都非常熱，肯定有三十幾度，所以我哋一大班人喺此時此刻跑100k絕對唔係容易嘅挑戰。由於我哋每日都跑，所以大概喺第三日，大腿同小腿都開始攰，仲要太陽一直曬住我哋，體力消耗特別大，但我一諗到沖繩100係一生人只有一次嘅經歷，以後唔會再有一大班人齊齊整整去一個地方跑嘅時候，就覺得喺呢到放棄嘅話會好可惜，日後再回想起今日仲會好後悔，所以我選擇同隊友一齊撐落去，完成呢個挑戰。喺第六日，到左終點水族館之後，我哋終於都完成咗110k嘅壯舉，果陣我哋全部人拖住手一齊衝線同埋嗌咗咁耐以嚟一次最大聲嘅口號嘅呢兩個場面我仲好記得，果種成功感真係好大。而我跑完領會到嘅道理就係—只要我哋一心要完成一樣野，無論周遭環境有幾咁艱難，都無野可以阻止到我哋。

我哋長跑小組嘅口號係「唔使快，唔好停，黃鳳翎」。我哋唔需要跑得好快，只要唔好停落嚟，一直前進就可以。喺第五晚debriefing，健偉sir就用咗呢句口號嚟提醒我哋，其實人生同長跑一樣，即使日後你見到有人喺人生嘅道路上行得快過你，自己一直落後，都唔好氣餒或者放棄，只要你一直努力，就會有進步，自己會變得愈嚟愈成功。用我自己做個例子，放榜之後仲考慮緊讀asso定大學，而就算最後真係無咁順利要讀asso，見住身邊啲人一個個升上大學，都唔好將呢樣野視為一種失敗，甚至放棄前途，反而應該要視為一個重新開始嘅機會，一直進步，爭取升上大學同搵份好工作，唔好喺人生嘅道路上停滯不前。

我會好好記住今次沖繩之旅嘅經歷同得著，喺將來實踐出嚟。

2C 田啟進:「nothing is impossible」

1. 在整個跑步旅程中我都有2、3次諗過放棄，尤其是第5天,一望無際的道路配上異常猛烈的陽光及高温，真的令我想上車休息，但是當我望着前方隊友及導師的背影，我就知道路途上不是只有我一個，还有他們，是他們給予了我繼續跑下去的力量。
2. 最深刻的時刻是第6天在海洋博公園完成110公里大家拖手一齊完成最後一段，因為人生中可能做到这樣的事就一次，相信这件事會令我一生難忘。
3. 完成之後，我想同自己講句「nothing is impossible」，110公里挑戰也能完成，还有什麼是不可能完成的。
4. 人生中能與一班同學完成这種挑戰的機會可能只有一次，幸好我把这個機會抓住了。在沖繩與大家看過的風景、跑過的路、吃過的東西都會令我一生難忘。有些旅途再辛苦也是值得的…

出發前在香港長課訓練

3B 吳詠欣: 多謝自己沒有放棄

1. 有時好痛的時候是好想放棄，但係欣瑩一直陪住我和凱蕎在車上的打氣! 還有大家一直堅持地跑! 我就想大家都末放棄! 我點會諗放棄呢! 所以咪繼續頂硬上!
2. 多謝這個活動令我認識咗凱蕎! 多謝她一齊陪我訓練和一齊玩又幫咗我好多野! 尤其係考試期間如果不是她陪我! 我好難會去跑! 雖然她在沖繩因為身體原因未能跑足全程! 但她在每個休息站都會下車為大家打氣! 她的打氣真係好鼓舞人心的!
3. 多謝欣瑩! 差唔多全程都係她陪住我跑! 如果不是她願意跟着我速度我都好難堅持落去! 還有她身體上有舊傷也堅持落去! 真係好勁的!
4. 也多謝這個活動上令我和嘉嘉重逢! 以前我係沒有諗過嘉嘉跑步係咁勁咁叻的! 雖然今次因為身體原因未能發揮星期六訓練的水平! 但係她都可以堅持落去!
5. 多謝飛Sir在最終選拔嘅12 k一直陪住我！如果唔係你我可能連選拔都過唔到! 還有在考試期間借辦公室俾我和凱蕎放東西! 還有平時一直幫我搵方法! 調整呼吸! 令我橫膈膜冇咁痛! 還有在沖繩的每晚都幫我消毒傷口!
   多謝健偉sir一直支持我和鼓勵我! 雖然我無說過! 但他的鼓勵其實都幾有用的! 還有平時訓練寧願＂拋妻棄子＂都願意陪我哋一齊跑! 還成日請我哋食嘢先!
   多謝Jo姐姐和 kate姐姐在沖繩嗰幾日都好照顧我!
   多謝 meg姐姐在背後同我哋打氣！雖然後邊嗰幾日坐電單車但其實坐電單車都好辛苦的!
   多謝各位導師! 多謝你哋整咗依個沖繩100给我哋!
   多謝1010室友們和你們每晚都一齊顛一齊玩一齊瞓一齊食真係好開心嘅!
   多謝大家! 大家真係好勁！在沖繩這個好熱的天氣還可以繼續堅持地跑落去！真係好勁的!
   多謝自己沒有放棄去參加這個沖繩100! 如果唔係這一年會少咗好多經歷和回憶! 最後好高興可以認識大家啊!

3D 黃德榮: 感受到自己的強大

1. 有沒有想過放棄?
   有，第一二日腳沒有這麼累，都是第三日開始腳痛，已經不想繼續忍耐那一種痛苦了，但是見所有同學都堅持向前跑自己也堅持了下來
2. 是只剩下650米就完成的道路上頭暈，然後沒有完成目標，因為真的太熱，意志力在，身體頂不住
3. 原來自己是可以把一件事情堅持到底地做好，應該有更多的事情給我做好
4. 可以和一班沒有看過外面世界的同學一起出去見識，還有是跑步，在沖繩的路上欣賞他們的文化

3D 游誠義: 我學會了認真努力做事

1. 我在第五天跑海岸時有一刻想過放棄，因為當時的太陽實在太曬了，又一次風也沒有吹過，這令我的身體如同到了極限一樣，大腦無法思考，像一個不斷重複做一個動作的傀儡，但看着每個同學們的都盡自己所能互相幫助時，我想我不能放棄。
2. 我認為最深刻的是手牽著手一起衝線時，因為我認為這刻十分震撼人心，每個人都忘記了之前的痛苦，每個人都將自己存放已久的壓力釋放出來。
3. 我想同自己講以後做什麼事都要認真努力，不要只說不做.
4. 很不捨得和高興，可以與自己相識的同學一起完成這一個辛苦又快樂的路程我認為這種機會不常有，看著沖繩美麗的風景相處七天不斷幫助我們的導遊和司機，我感到十分的難忘和不捨

東華三院黃鳳翎中學 — 長跑小組簡介

本校的長跑小組，成立於2016-2017學年，由訓導主任、輔導主任及駐校社工三人共同成立及帶領，
希望透過跑到成為一個載體，讓學生獲得全人成長的機會。

長跑小組由當初的5、6位學生，到現時有差不多40位學生參與。過去多年來，小組由馬鞍山跑到沙田、由沙田跑到港島、由港島跑到機場、由機場跑到台灣，而在本年度7月5日至11日，更會再次飛出香港，到炎炎夏日的日本沖繩進行7日6夜「沖繩100之旅」，挑戰年輕人的體能極限，及擴闊他們的眼界!

原先這個沖繩之旅是在2020年復活節期間舉行，惟當時受新冠疫情所影響而暫停。在得到校長的支持下，本年度再次重辦有關活動，讓同學發展潛能。在沖繩的旅程中，除了每天要跑15公里或以上的路程外，還會參觀沖繩的名勝、古蹟，亦會要求同學在過程中，完成專題考察報名，務求做到「運動、體驗、學習」三元素。