雞年前嘅年廿八，洗邋遢時……
媽：「好心你掉咗啲馬拉松跑手包嘅袋啦，又唔係全新，咁污穢！」
女：「個袋咁厚，又堅靭，可以重用㗎，用完番來已經抺過吹乾淨咗，環保啲啦。」
媽：「你個垃圾妹。。。」
女：「其實有掉過，舊年落大雨跑，套多個垃圾袋喺裡面，明明紮實咗個袋口，點知攞番跑手包嗰時裡面濕晒，攪到個背囊濕咗一半，銀包吹咗幾日至乾，所有唔濕得嘅嘢都要掉，好彩冇寄電話咋，如果唔係仲貴過去日本跑…… 唉，宜家諗起都嬲！」
媽：「放喺維園淋幾個鐘雨係咁上下啦…… 總之冇你咁好氣，養曱甴唔好喊呀！」
----- 廣告 Ad -----
阿女今年跑渣馬全馬挑戰組，唔得閒去維園攞跑手包，叫阿媽去攞。
媽：「攞咗喇，件衫佢地叫我攞大一個碼。」
女：「唔該晒，咁你點答？」
媽：「唔得，幫人攞，唔啱著被人鬧。」
----- 廣告 Ad -----
女：「我點會鬧你，又唔係自己著。」
阿女邊玩電話邊答阿媽，終於抬起頭睇跑手包。
女：「有冇攪錯，馬拉松1組？？？我係挑戰組噃，個袋係深藍色，佢地比錯袋你呀！」
媽：「你號碼布個名冇錯呀。」
女：「係冇錯，但冇理由用另外一組嘅袋寄行李，到時啲工作人員是是但但，又唔睇牌，見粉紅袋將我嘅行李遊花園或者放第度，跑完咪搵死我？」
媽：「我唔知咁多喎……」
女：「你冇問題，係啲工作人員亂來，我會諗辦法。」
阿女本來想打去問點解救，但就算工作人員A話冇問題，到時去到工作人員B話有問題點算？
搵人救不如自救，好彩呢幾年嘅袋顏色一成不變……
女：「好彩冇聽你話掉咗啲袋咋，宜家咪有用囉，用番前年個全挑袋，攪掂。」
----- 廣告 Ad -----
媽：「咁大個比賽咁兒戲嘅？」
女：「年年都有蝦碌嘢呀，公關災難㗎啦，我呢啲小事喇，今年跑 tee 攪到好大鑊呀，啲 size 攪到亂晒龍，見好多人鬧，大會喺 Facebook 道歉，Fitz 有個作者鬧到粗口都出埋，又見有人喺 Facebook 開咗個 group 交換跑衫。」
女：「算吧啦，unisex 即係男裝啦，加細碼我邊啱著，我呢啲5呎差兩吋，又細細粒，從來對比賽 tee 冇寄望㗎啦，攞件中碼比 跑 tee 共享 仲好。同埋今年件 tee 個 design 好 hea，冇 pattern，完全冇誠意，唔要唔可惜。」
媽：「日本有誠意好多噃，你舊年跑大阪件衫係女裝。」
女：「嘩，攞衫嗰時簡直開心到好似中獎咁。」
媽：「渣馬咁多問題，又話多斜難跑，你又年年跑？」
女：「冇所謂啦，佢改緊㗎，不過改得好慢啫。。。當長課又好，gathering又好，個個 friend 都跑我唔跑，好似差咁啲嘢咁，我今年練多咗斜路，到時睇下跑成點囉……」
同好多跑友一樣，阿女呢幾日輕鬆跑下，一係就成晚拉筋，唔跑嗰晚好早返屋企好早瞓，星期一至三食好少飯，星期四至六狂食飯，無聊嗰時上 Fitz 睇「渣馬備戰」嘅文章，又攞晒啲跑衫出來襯，好似fashion show咁……
以上內容部分虛構，如有雷同請話我知。
----- 廣告 Ad -----
每個人跑馬拉松都有佢嘅原因，可能係身痕唔跑唔安樂，可能想集郵為咗個完成牌，可能想PB，或者 just for fun，點都好，祝大家輕鬆完賽，順利到終點！
按：依照大會規則，行李袋與行李牌的顏色，必須要與號碼布之顏色相同。(見下圖)
CC Physical Fitness Channel Facebook專頁
Fitz.hk Facebook專頁
渣馬專區@Fitz.hk
[渣馬備戰] 2016渣打馬拉松路線探究
[渣馬備戰] 10K寄存行李多規距
[渣馬備戰] 半馬全馬寄存行李安排
我的渣馬半馬攻略
[email protected]
渣馬專區@Fitz.hk
