Fitz > 運動 Sports > 跑步 Running > 渣馬,好渣

無玩幾年,因為嫌佢的衫渣。

今年玩返,試吓抽又比我抽倒。因為對Nike有期待,啲料真係舒服啲!

今年賽道渣咗,無咗青馬大橋橋面段,好似叉燒旦飯無落豉油!唔知點解渣馬的賽道斜路咁多,有一半時間都是上上落落的,有幾多新手平時練咁多斜路?今日天氣好,跑得幾舒服,但是有不少新手仍然出事,如果天氣唔係咁好,空氣差啲嘅話就……

我冇飲過大會的運動飲品,佢轉了新牌子唔夠膽試,過咗香港我見到有人嘔吐……喺九龍過海隧道口有日本熊本番茄仔,唔知有幾多人知道呢?因為大部人因內彎通常跑左邊,佢係右邊…田總啲安排我有時都忍唔住笑架!我就唔客氣食咗幾粒,真的好好味!如果渣馬好似山賽咁有橙食就好D囉!我記得以前終點有梨食,而家冇。重乜嘢都放晒落個袋度俾你一剔過。又係嘅,多咗咁多人跑,一人攞多一條蕉,隨時唔夠派。我仲發覺啲人流管理叻咗,攞完個行李袋人差唔多已經去到天后出口位,我都唔好意思停留喺度啦……從過終點到天后出口大約用了5分鐘……

今年比自己最好的記錄慢了10分鐘,不過冇之前跑得咁辛苦。在差唔多返回到美孚個位同半馬匯流,迫到冇朋友!(慢咗唔知係咪呢個緣故?)海底隧道好多人。我懷疑海底隧道係有結界嘅!無論神鬼人跑得幾型都會現形。唔少人撞場!我覺得過咗呢度先至係全馬嘅起點,有返啲氣氛,近灣仔有啲唔係大會嘅人派啲好似好好食嘅嘢,因為我冇食囉。有啲似街馬feel,連薯片叔叔都喺度幫人打氣,如果佢帶埋薯片派重正!

總結,如果你想參加真正的馬拉松?渣馬,好乜流囉,算吧啦!

更多:
Fitz.hk Facebook專頁
[渣馬2017] 賽後小總結
[重行人生] 我在渣馬終點前100米的見聞
[渣馬之後] 7大神物 助你消除疲勞減輕痛楚
Fitz Running 跑步

本文屬作者意見,不代表Fitz立場。


文章為作者意見,不代表Fitz立場。