澳門半馬記

由

2015-12-09

澳門馬拉松已於禮拜日順利舉行，同日其實中港澳三地都有不同嘅比賽舉行，鑑於本地賽事來來去去都係跑果幾個地方，加上澳門馬拉松係我早年接觸長跑第一個有興趣想參加嘅海外賽事，今個年度賽季亦適逢我實行接二連三海外賽事嘅賽程，於是就報埋澳門馬拉松。

今次澳門馬拉松同我之前去曼谷渣馬一樣，都係跑半馬，只不過賽前好多人都係對於我跑海外比賽充滿戒心，經歷過兩次馬來西亞賽事取消，加上曼谷渣打半馬跑多接近7km嘅陰霾下，我今次真係要痛定思痛，呢次澳門半馬雖則拎獎機會比較渺茫，但難得有家人陪同一齊到澳門，呢次真係要做番齣好戲，重拾2014年香港渣馬嘅風采。

2015年12月6日朝早6 點，大約600名香港跑手，連同其餘二千多名澳門及其他國家，全馬及半馬參賽跑手準時於起步點開跑，場地質素平平，我頭500m起跑展步不順，要左穿右插才能跑到前列位置，頭10km路段我大部分跟著其中一位澳門頂尖跑手的步伐前進，當跑到澳門大學橫琴校區嘅河底隧道，個別半馬跑手已開始回程，眼見我係分齡組別獎項中還有力爭入一席之際，當然繼續撐到底。最後1-2km，緊隨半馬女子全場冠軍跑到終點，最後以1:19’03” 完成，全場第11名，組別第5，首次登上國際賽事嘅頒獎台。

比賽過後，又要積極備戰，迎接來年香港渣馬，但係香港渣馬之前就迎接另一個挑戰，就係月尾舉行嘅 “石崗30km賽” 。