設計對白: 多謝你郵筒BB，你幫我慳左幾千銀 攝: Alan Li
前言
話說有條友叫 Jacky Leung 今年唔係咁掂，為咗唔派利是就走咗去玩四徑，結果佢辛苦左58個鐘就成功慳咗幾千銀。既然兄弟話唔掂咁我呢啲作為隊友，就唯有幫得就幫，去 support 下佢，順便食下花生啦!
今年過年天氣都算凍，但一場雨令到本身應該係一個好好既做時間機會變成一場苦戰，老實講唔好話落場。我做 support 都凍病左，呢包花生真係唔太好食……梁俊強 claim 醫生錢唔該!!!!
簡單介紹4徑: (再想知多D就自行google或上四徑facebook啦)
四徑全名為 Hong Kong Four Trails Ultra Challenge，佢並唔係一個比賽，無獎品亦無 ITRA 分。只係香港山界既一個考驗自己極限既挑戰。起步為每年既大年初一，全程共298公里。中間並沒有CP支援，每位參加者需要以自身力量去順序完成麥理浩徑 ＞ 衛奕信徑 ＞ 港島徑 ＞ 鳳凰徑，4條香港山徑，參賽者完每一條徑後，才可以接受自行安排的支援! 能於60小時內完成的就可以成為 Finisher (完成者)，72小時內完成就係 Survivors (生還者)。現時大會記錄為53小時正，於2017年由 Tom Robertshaw 創出!
連場大雨令到今年四徑，變成一個考驗人體鬥志極限既挑戰 攝: 風兒
麥理浩徑 (吃盡苦頭)
今年既一場雨令到今次四徑堅係痛苦，起步時天氣還算不錯，中午開始下雨天氣越來越凍，喺無支援嘅情況下走100公里既麥徑完全唔係易事，當晚天氣頗惡劣，Keep 著落雨，而且勁大風，就連我地 support 著晒厚褸，幾層 mid layer 都凍到腳震，難以想像跑手只有一件風褸又全身濕透下，喺雞公山、 大灣、東壩會有幾凍。再加上 Jacky 表示胃部不適，食唔到野，呢個狀況在之前 Golden 100 亦出現過，當時Jacky 亦 DNF 棄賽，所以我地都擔心佢可唔可以頂到落去!
Jacky 到既時候全身濕透，不停講我想訓覺 攝: Viola Shum
最後 Jacky 比預定時間慢左，跟據 Jacky 預定既 schedule 係大約14小時左右完成麥徑，但最後約用了15個半小時才到達北潭涌，到達時 Jacky 已全身濕透，不停講想訓覺，我地立即轉移陣地收拾食品，先俾佢訓一覺，去到衛徑先俾佢食野，立即推佢上車開暖氣，包到佢實一實休息，其實只有一個目標: 你唔L洗旨意 quit，hahaahaha!
衛奕信徑 (死頂硬撐)
Jacky 上車後，大隊即刻飛去南涌，support team 大發慈悲地俾佢足足訓左1小時45分鐘，最後 Julia 拍醒佢，佢亦好乖無賴床。起身換衫食野，訓左一陣 Jacky 狀態開始回復不少，但胃部仍有少許不適，但唔食野基本上無可能繼續行落去，所以 Jacky 都盡量食左個飯，再食多個熱辣辣既鮑魚雞粥 *(鴻_堂出品，堅好食)，食飽後準備再繼續上路。但當時雨時大時細，又行雷閃電，老實講俾我一定quit……要我閃著電上八仙嶺，我一定淆底! 但 Jacky 堅定地繼續上路……太強大了* (其實吹水……實情係佢係受到我地壓力，不情願地上路)
食飽後，jacky 狀態稍為回復，但係惡劣天氣下，都好為佢擔心。攝: 風兒
地鐵中，企係度都訓得著係基本，個身臭到無人行近係常識! 攝: 風兒
最後，Jacky 比麥徑用左更多既時間，近16個半鐘先完到衛奕信徑，到來石澳時已經一面疲態。Jacky 小睡50分鐘左右後，補給後必須繼續上路，因為如要追趕60小時，餘下2徑必須把握時間，當時我地都好擔心佢趕唔趕到做 sub-60。
Jacky 係惡劣環境下完成衛徑，見到佢痛苦既樣就知四徑係幾瘋癲既一個挑戰。攝: 風兒
港島徑 + 鳳凰徑 (無限復活+神之回歸)
經歷麥衛2徑洗禮，Jacky 已扣了8成血，再加上見到佢當時個慘樣，仲剩下2徑大家都不禁為佢擔心，但有時神就係做到一般人做唔到既野。回到佢最熟悉既港島徑 + 鳳凰徑，J神復活了! 上過 Jacky Reflex League 越野跑班既學生，都知 Jacky 有幾熟悉港島，其越野跑班差不多每堂都可以有不同的訓練路線組合，近乎不會重覆。而且貴為 Translantau 100亞軍，鳳凰徑可謂佢既主場。
睇到佢個樣就辛苦……haha! 攝: 風兒
返到到自己主場，Jacky 越跑越有，再者熟悉路線加上本身真係底子夠厚，心理上真係可以「打高幾班波」，最後 Jacky 不用9小時就完成港島徑，再用11小時左右完成鳳凰徑，跑完200公里仍可以做到呢個時間，真係唔簡單!
----- 廣告 Ad -----
回到最熟悉的鳳凰徑，Jacky 如有神助，只用了11小時左右完成 攝: Viola Shum
直到年初三晚，7點半左右，我們的J神終於返來了，當個個跑手都尾段衝番來既時候，條友就慢慢行番來，話要好好享受呢個 moment wor……係一片歡呼聲中，最後用了58小時31分鐘完成晒四徑賽! Jacky 終於可以輕吻綠色郵筒，完成呢個挑戰!
嗱! 梁俊強你咪流馬尿吻呀，笑9你架! hahaha 攝: 風兒
俊強! Congrats，真心佩服! 同時亦俾個 like 所有參加者，因為真心覺得敢報名參加既跑手都絕不簡單! #respect
Law Kai Pong (外號: 千K邦，月里數1000km。因而得名) + Jacky，全靠大家沿途互相鼓勵，2個一齊完成四徑! This is Bromance!攝: Viola Shum
全靠我地呢班 support team 炸，無我地你仲可以笑得咁開心? 攝: 風兒
唔好咁興奮啦，著番件衫啦BB，唔好凍襯呀 (hehe mode) 攝: 風兒
4徑完成分段時間
- 麥理浩徑
完成時間: 15hrs 30mins (Sleep : 1hr 45 mins) - 衛奕信徑
完成時間: 16hrs 21mins (Sleep: 50mins) - 港島徑
完成時間: 8hrs 52mins (Sleep: 1hr) - 鳳凰徑
完成時間: 11hrs 24mins
全程完成時間為: 58hrs 31mins
