[赤足跑] 赤足的第一滴血

熱辣辣龍舟跑

星期六（6月20日）朝早，又係青公約跑。預期同上星期咁樣，又係去到青龍頭8k返轉頭。去程可以保持大約6分/k左右，回程太陽已經高掛，太熱跑得好辛苦。兜入到嘉頓公園仔嘅飲水機補水，將起程剩低嘅半包寶礦力粉，倒埋入水樽度。……用粉自己開，比成枝買樽裝，既環保又慳返好多。寶礦力含有電解質，適合運動大量出汗後，可以迅速補充體液。但係如果只跑10K，咁飲清水就得，唔需要咁補充。尤其係日常間，如果當解渴咁飲，飲得多會肥㗎。寶礦力仲出咗一種塩熱糖，將成份濃縮成一粒糖，跑步時食咗，然後再飲水就得，佢有兩種唔同嘅味道。尼種寶礦力糖唔係四圍有得賣，可以上網搵地址。至於跑步補充鹽餅，細佬我就唔多主張。能量棒試過後，亦唔再食，呢個只係習慣啫。

赤足第一滴血
我哋經由豪宅開放嘅海濱兜入去，果度幾靚。補充咗水之後，撻唔番著，越跑越立糯，亞力士陳跑得多哋烈陽，逐漸遠我而去。同上個星期六咁樣路程，今勻腳板反應大好多，前掌開始痛。可能之前數日，曾經狂奔，其後接著又做間遏跑，未充分恢復啩。回程艷陽高高掛，更加熱到爆曬偈。平移跑姿本來就遞腳唔高，分心之下，右腳二指磨薑，首次赤足流蚊飯(出血)。

平移與姿勢跑類同，嚴格來講，首先觸地點在前掌嘅蹠球部。但赤足以來，腳底最大變化，是穿鞋迫出來的厚繭漸退，卻是在前掌中間，長出肉墊，大概仿如擅於跳躍的貓之腳墊。

功力所限，腳底觸地點生痛，只好放緩。若咬牙死撐，便將導致水泡，繼而形成出血。赤足初衷，目的只是訓練，引起受傷，便違反本意。日後參與賽事，是否赤足，將依循身體之反饋。若穿鞋，將盡量選擇平底赤足鞋。

今日早上氣溫，竟然高達33度，唔怪之得跑17K都咁辛苦。睇嚟下星期約跑，需要再提早，或改係有樹陰嘅地方跑啦。……原來尼日，係少有咁高溫嘅龍舟節日。今勻跑完，睇怕要休番兩日，畀腳板修復至得。其間，可以順理成章，去健身操下肌腱力量。且說健身
我之健身，大概由於打乒乓球，不慎令脊椎受傷，臥於床上不能動彈數天。此後便開始健身，也由那時起，幾乎每天保持運動，曾經乒乓、跑步、游泳、健身，幾棲並舉。直至數年前，才逐漸獨沽長跑一味。

日前的青公約跑，酷熱難當之下，偶爾脫去背心，來過光豬六壯士合照。站於六塊腹肌的榮少身傍，實在相形見拙。也因此而痛下決心，以後多抽時間作健身。

健身可以塑造身形，也是增加肌肉力量的便捷途徑，這是各項運動的必然輔助手段。有些器械動作，可以有效增強跑步的下肢力量。增加肌腱力量，有助提昇跑步成績，也有助防止傷患。跑步前後，或雖要遏腳時，正好加插健身。坐言起行，在家中小露臺凹位，按裝不銹鋼管，可作引體向上的單槓，再以兩張小矮凳，便可作掌上壓。……如此，就隨時能夠作上身之健身。居住樓下，便有連鎖健身室。

重作馮婦，才驚覺肌肉力量嚴重流失。以前徒手引體向上，可作拾多次，現在竟然只有三數下。掌上壓大概可作貳、叁拾次，倒退至只能作數次。目前上胸36吋，縮水3~4吋。長期只練習長跑，體重大概減輕數磅，可能就是流失的肌肉份量。……一切只好從新操練，期以三月或半年，可以開始有所改善。

知易行難，立此存照。

facebook群組「香港赤足跑步」

更多:
[赤足跑] 跑手必讀的三本好書
[香港赤足跑] 完美的跑姿
盧松昌其他文章
Fitz Running 跑步