兩年前，小弟見自己都跑左幾年步，又以完成毅行為目標，就膽粗粗同友人報名參加雷利長征2015，一試身手。當年比賽前自問都做左相當充裕嘅準備，奈何未夠班即係未夠班，比賽無耐已經開始抽筋，去到後段更加落起大雨，氣溫驟降，身心力不足嘅情況下，只好黯然剪帶 T.T
雖然呢一次嘅切碎打擊好大，但亦都好好認知自己嘅不足同無知，決心更加認真去預備! 喺呢兩年間，我地跑左幾隻馬，亦完全左幾個山賽: 苗圃42，毅行者，UTMT 50。到左今年，覺得係時候啦，係時候要一雪兩年前之恥!
當雷利2017開始接受報名，我同友人二話不說，即刻報名! 磨刀兩年，今次一定要見到血! 今年同兩年前嘅唔同係由二人隊伍變成四人隊伍，加入左兩個高手，組成SKBJ! 目標二十個鐘內完成。
轉眼就到左14/10比賽日。比賽當日天氣好到不得了! 明明一星期前仲係熱到傻，嗰日就天陰陰，乾爽涼快，絕對係比賽嘅最理想天氣，但係就掛住一號風球。由於我地係混合隊，所以0930先出發，而男子同精英隊就0800出發。我地大約8:30去到起步點，登記下，check 下裝備，寄存行李，影下相咁，好快就到起步時間!
嗶聲一響! 比賽正式開始，我地懷住輕鬆嘅心情慢慢 jog 去紫羅蘭山-第一個大佬，可能天氣太好，隊友狀態又好，無預期中咁辛苦，比原定時間快左半個鏡去到鰂魚涌 support point。
飲飽食醉後重新出發，五桂，東洋都順利過渡。去到獅子亭嘅時候，突然收到友人 msg，話我地居然排梗第二! 實在難以置信! 於是我地繼續全速前進! 喺孖指徑嘅時候有少少雨粉，但我地唔理咁多，繼續前進。
當我地過左 CP7，過梗去太和嘅時候，撞到一隊旋風168嘅師兄，吹水期間突然得知原來已經掛左三號風球，個心即刻沉一沉，心唸:唔係呀，又完唔到?! 而且今次好大機會拎獎喎! 當下即刻加快腳步，希望大會 cut off 之前我地會趕得切完成!
去到太和 support point，匆匆整頓好行裝之後就快快起程! 當我地就快去到九龍坑山，收到友人嘅電話。[喂，大會話21:30之後所有 checkpoint 都會 cut off 喎! 你地打去 confirm 下!] 二話不說即刻打電話，換來嘅係絕望嘅真相……我地望下錶，2030……一個鐘我唸曉飛都過唔到八仙嶺，意味住今次嘅報仇係失敗嘅……而且本來到手嘅獎項都無左……
謀事在人，成事在天。我仲會唔會再三挑戰雷利，呢刻我唔知! 我淨係知衛奕信唔多 like 我! 不過我好慶幸我有一班好隊友，好朋友做 support! 雖然結果唔多理想，但至過程我好 enjoy!
Fitz Facebook專頁
[披著馬騮皮的魚] 從DNF到圖騰跑16K冠軍
[Lena Mama 運動女人40+] 苗圃奪亞的賽後檢討
[再戰苗圃] 由「梗頸四」到冠軍 從失敗中學習
Fitz Running 跑步
我叫蘇兆俊，跑齡正式踏入等三年。三年前經朋友’引誘’，跑了第一個10k，苦不堪言。到現在不但減去40磅，更已經完成了四隻馬。一年前更接觸了跑山，參加了雷利，環島行和毅行者。現在是典型跑步成癮，唔跑唔舒服。
