[香港馬拉松史] 難忘的第一個馬拉松賽事 (1979年香港馬拉松)

每個馬拉松跑友都有他們的第一次。亞霍希望抛磚引玉，說說自己的第一次後，能分享到其他跑手的第一次。

1978年11月，亞霍完成了第一個半馬賽事，取得了1979年的馬拉松報名資格後，開始了積極的練習。離馬拉松比賽不足兩個月，亞霍走了兩個2小時左右的長課。限於經驗，當時並沒有詳細記錄練習情況；不過亦有做了一些估量: 發覺每跑一小時，大約輕三磅。而在冬天乾燥的日子，當跑上了個多小時左右，兩腋、腳脾內側，以及身體所有與衣服間的接觸部份，由於經過長時間的重複動作摩擦，都會引致肌膚不同程度的磨損。試計計數: 42,195公尺，每步大槪一公尺吧，那麼就會有近三、四萬多次的摩擦! 如果忽略這看似微不足道的小事，最終你會得到永遠難忘的回報: 腳趾與跑鞋磨擦起水泡，已是意料的事; 兩腋磨損，你會被迫架起雙手如投降般；腳脾內側磨損，你要擘開雙腳的新穎跑姿 (如果跑到卅幾K後你仲想跑，和你仲可以繼續跑的話)。這些磨擦，令你胸前兩點滲出甄紅的血絲，沾染著你的戰衣．呀，仲有，亞霍當時戴著的眼鏡，跑步時，框邊與鼻樑間的摩擦亦足以令亞霍混身不自在。

一顯身手的日子終於到了!

比賽前一晚，亞霍按經驗點算行裝: 跑鞋，當然唔少得 (不過唔敢着白飯魚嘞; 用28元買了對生膠底，皮面的跑鞋)、跑褲、戰衣背心、襪；還有，雪花膏 (跑前塗著會摩擦的部份)、膠紙 (喺用嚟貼住眼鏡框，以減低與鼻樑間的摩擦)、乾糧、扣針、號碼布。

為了想發揮最佳狀態，亞霍很早便上床。又驚唔知醒，臨瞓前，校定兩個鬧鐘，仲叫爸爸記得叫醒 (其實爸爸是最穩妥的鬧鐘)，結果? 所做嘅都係多餘，當然唔係唔知醒，係根本瞓唔到，輾轉反側，四時多就起床。

起床後要做的事可多着呢: 先食個早餐充電，跟著是紥穩馬步 (跑馬拉松嘛，當然要紥馬) 運用精神念力，來調校生理時鐘，再運玄功冒求將積聚體內廢物盡數排出。由愛民邨行去中間道乘搭大會安排的巴士 (唔捨得花錢搭的士)。巴士往荃灣上荃錦公路往石崗要成粒幾兩粒鐘咖。在車上食個包，飲啖水，歎番個懶覺。等陣再品嚐馬拉糕──呀，唔係，係馬拉松的滋味。

到達石崗軍營，先打量飛機跑道──馬拉松嘅起點和終點。整個賽程主要是環繞石崗四圈，平均每個圈6哩半多少少啦。而水站 (僅是水站，沒有現時的能量飲品呀) 設於飛機跑道和每圈的中點處。大會派發場刊，看看參賽選手，男的共有148人，女的就僅有3人；與2019年渣打馬拉松全馬名額共22,500，實有天壤之別!

十時，起跑開始。亞霍明白今次是走 26.2 哩喲，所以心中總是提點着不要如走半馬般搶住跑出，但是又受其他跑手的影響，而且總不能慢過女子吧? 亞霍就是抱着這種又緊張又想輕鬆的心情傻兮兮的跟着，跑着。跑完第一個圈 (6.35哩)，依現時慣用的十進制計，計為4:12/km 的速度; 位列約在 21~22位吧。跑完第二個圈 (12.87哩)，時間為1:29.07，第二匝的平均速已下降為4:24/km，位置亦沒有多大改變，依然是在21左右吧。

半馬過後，疲乏開始慢慢的傳染給各跑手。亞霍雖亦受感染，但亦可以慢……慢的追到三數個人，嘻嘻，天才跑手嘛，當然唔同啦! 2:18.34完成第三圈 (19.39哩)，這圈平均4:43/km。

跑咗約20哩，似乎沒有多大問題。不過，入完軍營出番嚟跑第四個圈，咦，似乎唔多對路，剛才三個圈，依稀記得路傍有啲路距標，註明走咗幾多哩嗰喎，點解唔見咗咖？越跑越唔對路，係咪走錯路!

咦，又唔係喎，點解有嗰女跑手响我身邊走過，佢唔係半馬贏我嗰個伍麗珠? 無理由! 無理由嘅! 咦，點解個6、7歲村童喺我呢個天才跑手身邊跑緊，仲話同我鬥快! 吓! 乜我唔係跑緊咩? 連這個村童也跑不過! 吓，咩原來呢個村童至係天才? 晴天霹靂 (唔係行雷，今日天朗氣晴)，亞霍終於辨明天才白痴，原來自己係傻嘅! 明知無奬攞，走嚟做乜; 平時跑10哩8哩都辛苦架啦，點解咁戇居跑26哩 (呀唔算，後面幾哩都跑唔郁)! 亞霍此刻想起，睇電視時，奧運馬拉松選手扭曲的面容。亞霍此刻對自己說，這種無奬攞，只有攞苦嚟辛的咩嘢馬拉松，試過一次就夠嘞，以後再唔好揾啲咁嘢玩! (可能這是亞霍最最最清醒理智的時刻!!）

剛走完三轉的重複賽道，走第四圈時，突然好像變得是無邊際的汪洋。亞霍孤獨地行下，走下。腦袋空空白白又充實。空白是甚麼也不想去想，只想下一步就到終點 (妄想)。充實是，這個時刻，雙腳猶如拖着一個大鐡球，舉步為艱，時間和路程好像無限的延伸; 真的可以實實在在的領會到馬拉松的滋味。望着僅是一二百公尺的距離，突然之間好像長了十數倍。跑馬拉松令你真真正正知道咩嘢叫做攰，咩嘢叫做體力透支，咩嘢叫做一步一個天涯，咩……咩……咩……聲不斷……感覺到雙腳腳趾有點痛……感覺到水泡在迅速成長中，然而又由痛到麻木。沿途見人就問：離終點還有多遠? 那句: 到啦，到啦，也不知多少遍! 總是老點!

終於，接過了完成布章，亞霍以3:30:43完成全程，總名次是第31位．大會其後公佈，共85人能完成整個賽程。

按圖放大

完成第一個馬拉松，薄薄的鹽粉沾滿全身，身體固然疲倦，但心更疲! 整個人也放鬆下來。今次兩腳腳趾公與鞋摩擦各自收成出大小如半只鵪鶉蛋的血果 (原本是水泡，但因為一直摩擦，水泡液變成淤血)。隨着三天，寸步難移，幾乎要拿拐扙，坐輪椅。嘩! 落樓梯簡直是恐怖的經驗。這種感覺，對從未跑過馬拉松的人而言，是很難體會的。所謂 “事非經過不知難”。自此，亞霍對自己不曾經驗的事也不敢再罔言，亦十分感謝大會1977年否決亞霍的第一次報名。

賽後個多月，亞霍傻氣又病發，決定明年再報馬拉松!

或者問: 唔係話唔再跑馬拉松咩? 或者答: 講咗啦，亞霍係傻咖! 可以肯定的説，如果你喜歡長跑，不曾試過馬拉松，那麼這一定是你的損失! 來吧，跑個馬拉松，試試那種虛脫的滋味吧! 嘿嘿!

每個馬拉松跑友都有他們的第一次。期待其他跑手分享他們的第一隻馬。

Fitz連結: https://fitz.hk/?p=109251

更多:
Fitz Facebook專頁
[香港馬拉松史] 香港長跑會 1978年的半馬拉松 (綠色半馬)
報名跑香港第一個公開的馬拉松
馬拉松的承諾
亞霍@Fitz.hk
Fitz Running 跑步