一年一度嘅「消防處大帽山越野賽」，隊際計算總區最快5人名次總和，最少分數為優勝隊伍。
20年前九龍區贏過一次，兩位老總就係九龍區嘅5位成員之一，佢地好希望帶領九龍區重奪呢個寶座。
老總帶我地練咗好多課，只係我推三推四，好多課無出席。佢地每次都包接載，又請食飯。我明白老總睇得起我，想我好好表現，我份人雖然現實啲，但都係有義氣嘅，話晒一個老總勞心勞力咁帶跑，又唔係為自己，升職都升到盡，都係想退休前帶自己個總區贏返次。所以我打算為佢地盡力一次咁多，了咗佢地心願。
----- 廣告 Ad -----
第一場比賽
賽程8公里，路線荃錦坳至河背路口折回，中間經過非常斜嘅連續長斜路。
第一次跑比賽，心情一啲都唔緊張，因為本身唔係自己想跑，只係為咗幫人，得唔得都無咩所謂。節奏比想像中快好多，我按照原定計劃跟住阿競，到4公里折回時保持第5位。但係…… 喺長長嘅斜路開始出狀況，因為節奏太急促，身體開始承受唔住，已經跑唔郁，阿競嘅身影漸漸遠離，我亦開始被其他人超越。我練習嘅時候明明跟到阿競，但果一刻，我有啲後悔練習唔夠，連試路都無出席，到比賽先知真正嘅賽道係咁難。
到最後，我只能以第7名衝線，阿競得第3，慶幸有強勁嘅隊友，我地嘅九龍區最終重奪隊際冠軍，為老總完夢。而我係大帽山賽之後成為跑隊力捧嘅新人，我都有啲想試下報比賽，睇下自己嘅潛能可以去到邊。
BB出世
但係呢個時候，我嘅小寶寶出世了，我要照顧屋企人未能再跑。過咗兩年，第二個寶寶都出世了，我要繼續照顧屋企人
結果，係大帽山賽之後，我又變返一個平凡人，每日返工、放工、買餸、煮飯、照顧屋企人，再沒有跑步，直至三年後嘅一個轉捩點。
現時視覺
多得兩位老總: 吳任生，李友德，帶我接觸跑步。我經常將呢兩位啟蒙老師掛係口邊，雖然佢地比我嘅實質幫助唔係好多，但比咗個機會我接觸跑步。一個機遇，對於一個年輕人未來嘅發展好重要。之後老總仲會繼續出現係比賽中做我支援。至於當年嘅隊友潘競雄、王天佑、卓健生、阿鋒，有啲成為長跑名將或教練，有啲已經淡出。
----- 廣告 Ad -----
待續……
原文載於 Wong Ho Chung 黃浩聰 Facebook專頁
感謝聰Sir授權轉載
