4月30日，46歲截肢跑手 Jacky Hunt-Broersma 又跑完一個馬拉松。呢次係佢由2022年1月17日開始，連續104日嘅第104次馬拉松，打破非殘疾跑手 Kate Jayden 保持嘅健力士世界紀綠 (101次)。
南非出生嘅 Jacky，25歲驗出患上尤文肉瘤 (Ewing sarcoma)，肉瘤生長喺腿部骨骼。因為呢種癌症極之危險，好容易擴散至各個器官，當時 Jacky 喺無乜時間考慮之下，毅然接受截肢手術。
「我唔想與眾不同，我只係想做個正常人。」手術之後，Jacky 隱藏義肢，避免接觸外界，直到有次被佢有跑馬拉松嘅大伯激勵，決定換上「刀片」義肢開展長跑生涯: 最初由5公里開始，再慢慢增加至10公里、半馬。而佢嘅初馬就係芝加哥馬拉松。Jacky 話藉住跑步，體驗到前所未有嘅自由，為佢帶來難以言喻嘅喜悅。
----- 廣告 Ad -----
Jacky 原本打算參加北卡羅來納州 Umstead 100賽事，挑戰100英里，不過因為疫情比賽取消。佢唯有喺屋企跑步機練習。就喺呢次訓練入面，Jacky 睇到有個連續完成馬拉松嘅健力士紀錄，於是就以100次為目標。後來英國跑手 Kate Jayden 刷新紀錄，Jacky 唯有「添食」，以102次為目標，最終完成104次。
Jacky 呢104日嘅挑戰，除咗為其他截肢者籌募費用，亦希望可以鼓勵世人去面對困難。Jacky 刷新紀錄之後，會休息幾個月，10月復出參加一場240英里嘅越野賽。
在 Instagram 查看這則貼文
資料: ESPN
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。