2020年11月29日，南京馬拉松受疫情影響，海外選手缺席，不過大陸跑手仍然創下好成績。冠、亞、季、殿軍都跑入2:10之內，除咗達到奧運標準，仲係各人PB。當時大陸媒體大為吹捧，話係「國內選手大爆發」。
不過近日有跑圈人士發現，於國際田聯網站 World Athletics (WA) 嘅南京馬拉松成績，呢4名選手 (彭建華、楊紹輝、多布傑、陳天宇) 均顯示為DQ。咁好嘅時間，點解會DQ呢? 而且更係大半年後先作出改動。當中發生咩事?
中國式pacer
多間大陸媒體向 WA 及南京馬拉松查詢有關問題，都未得到回覆。而搜狐發表專欄文章剖析事件，該作者大膽估計，係 pacer 嘅出場方式觸犯國際田聯守則，令選手成績全被取消。
大陸馬拉松賽事為求締造好成績，除咗邀請海外跑手到場獻技，亦建立一套獨特嘅 pacer 出場系統: 搵多名 pacer 於不同位置分段領放，每位 pacer 跑少少，力求帶快比賽速度。
不過依照 WA 嘅守則，正規賽事嘅 pacer 必須同選手一齊起步，可以中途退賽，但絕唔可以中途加入。所以，大陸賽事分段放入 pacer，明顯違反 WA 守則。
----- 廣告 Ad -----
文章作者補充，呢種「分段式 pacer」於大陸馬拉松賽事相當普遍，原因之一係大陸要搵個有實力嘅跑手擔任全程 pacer 絕對唔容易 (有實力嘅都選擇參賽)，唯有退而求其次，搵中短距離跑手分段領跑。過去賽事未見 WA 有任何行動，呢次南京馬拉松被集體 DQ，估計係有人舉報。
其實唔理有無人舉報，任何體育比賽都應該以公平作賽為最高原則。呢啲「博一博」嘅心態，已經係毫無體育精神。至於4名被 DQ 選手之中，彭建華同楊紹輝喺其他賽事已達標奧運，可以進軍東京。
資料: 搜狐
