1999年，年僅18歲嘅艾冬梅於多項馬拉松賽事大出風頭。一年內，佢先後喺北京國際馬拉松、大連國際馬拉松以及日本千葉公路接力賽奪得冠軍。喺2003年退役前，艾冬梅先後取得19面獎牌，包括10面國際賽事獎牌，共贏得約20萬人民幣獎金，對出身於黑龍江農村嘅少女，係一個甚為可觀嘅數目。
悲涼下場: 錢又無，人又傷
2007年，有媒體拍攝到身處北京嘅艾冬梅喺北京街頭擺地攤，售賣馬拉松獎牌: 金牌1000、銀牌300、銅牌100。
原來，艾冬梅多年南征北討贏得嘅獎金，被當時教練王德顯，以年紀仲細為由扣起，據為己有。艾冬梅連同幾位跑隊嘅姊妹，於2006年向北京法院提告，咁艾冬梅要搬到北京，積蓄耗盡，逼不得已下唯有要賣獎牌度日。
另外，當年王德顯以揠苗助長嘅方法，操練一班發育中嘅女孩，令呢班運動員年紀輕輕已跑出成績。但為佢哋帶來不同程度傷患，其中包括嚴重嘅拇指外翻。呢啲傷患唔單止影響佢哋運動員生涯，連日常生活都有困難，佢哋退役後都難以回復正常人生活。亦因為佢哋年輕時只著重練跑，荒廢學業，缺乏謀生技能，生活過得更艱難。
----- 廣告 Ad -----
艾冬梅話，佢就因為走投無路，先至向前教練王德顯追討呢筆20萬獎金。
教練走數民眾找數
法庭立案之後，王德顯同艾冬梅等人達成和解協議，但未有公布最後賠償額。不過，因為艾冬梅等人嘅慘痛事跡，令不少民眾喺財政上同醫療上出手緩助。有人更打本畀艾冬梅，開咗間「艾冬梅體育用品店」，生意如何不得而知。
王德顯
大陸運動員嘅待遇一向被人垢病，艾冬梅嘅經歷雖然好坎坷，但仍有不少嘅運動員被剋扣獎金，或過度操練而傷患纏身，好需要大家多多關注。
----- 廣告 Ad -----
