疫情關係，新年冇得拜年，但唔想困喺屋企? 不如出去西貢同清水灣走走? 最近好多人都有提到 Hard as Nayls，仲有唔少人已經完成咗添。
究竟 Hard as Nayls 係點嚟嘅呢? 當中嘅典故你又知幾多? 呢個比賽其實係由以前居港嘅外籍記者 Richard Scotford 創辦、為咗紀念佢一位故友 Andy Naylor 而設嘅。呢位 Andy 曾經活躍本港同西貢區嘅路跑同山界比賽，係一位德高望重嘅運動健將。但好不幸佢喺一場比賽中突然猝死而英年早逝。所以 Hard as Nayls 嘅原意，就係為咗紀念呢位西貢嘅傳奇人物，同時為佢嘅遺孀同埋各大社區機構籌款。
自從 TGR 承接咗 Hard as Nayls 嘅營運之後，Andy 嘅精神同生前對跑步嘅熱愛亦得以延續。每年都有唔同嘅精英跑手去挑戰呢條號稱「清水灣最魔鬼路段」嘅賽道，希望可以創出佳績。但係今次係虛擬跑，所以記得要帶齊裝備同補給，仲要做足準備同訓練，唔係一定會抽筋㗎。
----- 廣告 Ad -----
除咗難度之外，Hard as Nayls 仲有兩個特別之處。參加者會經過清水灣海邊，一面感受喺海同山之間奔跑嘅感覺，而且經過漫長爬升之後，仲會無死角見到釣魚翁有幾多宏偉。除此之外，Hard as Nayls 亦都係一個親子活動。賽事較短嘅組別，其實係設計比一家大細一齊完成㗎! 所以每年都吸引到唔少家庭參加，亦有好多小朋友喺呢個比賽發掘到自己跑步嘅興趣同才華。
近年 The Peak Hunter 同創辦人、精英跑手黃浩聰致力推廣越野跑呢項運動，同培育新一代跑界嘅精英。佢培育嘅後起之秀每年不停增加，唔少亦已經闖出名堂。所以今次佢會聯同另外兩位殿堂級人物，曾小強同 John Ellis 一齊支持新一代嘅跑手。由即日起至2月21日，所有19歲或以下嘅學生，完成 Hard as Nayls 嘅4公里、8公里或20公里組別，都會獲贈一條 T8 V1 Sherpa 短褲 (只有男裝XS供應)。
精英跑手黃浩聰
一如以往，今屆 Hard as Nayls 繼續會為各社區組織籌款。受惠嘅機構包括 Naylor Education、Sai Kung Stray Friends 同 Exchange & Empower。參賽費用會平均分配俾三個受益機構。所以你每一步，都係為兒童教育、無家可歸嘅毛孩同培育尼泊爾女跑手出力。
一齊延續 Andy 同 Richard 嘅初衷，由即日起至2月21日，參加 Hard as Nayls，為自己嘅農曆新年帶來一個特別意義啦。
----- 廣告 Ad -----
