[上海半馬賽] 做完Pacer去捉賊

呢班公安就係上海半馬賽嘅pacer，中間戴黑超嗰位就係捉賊嘅王磊。

上星期日 (4月17日)上海舉辦國際半馬賽，同大多數強國嘅比賽一樣，呢啲國際盛事總係要動員到官方機關。呢次，佢哋就搵咗上海公安，負責做領跑員pacer。

其中，有位叫王磊嘅民警，就負責領跑2小時15分嘅一組。佢準時完成之後，喺返屋企坐地鐵嘅途中，撞到有賊人偷嘢，就順手捉埋個賊返警局。

咁點？報道就係咁多咯。咁呢位其實係咪笨賊，喺眾目睽睽之下偷嘢，王磊追都唔使追就將賊仔束手就縛呢？定係要追個賊九條街呢？咁就真係唔知。

不過如果王磊兄真係準時喺2小時15分跑完個半跑，其實體能都唔差，一定好過好多孭住條大車呔嘅香港慈母囉。

王磊(紅衫)一到捉賊，就即刻有記者影到相，確實相當有效率。

----- 廣告 Ad -----

上海半馬賽都係國際級盛事。

不過話時話，用民警嚟做pacer，係咪有少少浪費公帑呢？定係強國比賽不時有罪案發生？點都好，終點唔好派番梘就得嘞！

自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。