[低端男] 早起的鳥捉虫了

曲奇跑網頁截圖

家陣搞路跑，愈來愈多靠熱爆的商品或 figure 起飛，例如熊本熊、麥兜、卡樂B、蒙面超人、櫻桃小丸子等。除了靠一眾忠粉熱捧，還會送出大量令粉絲瘋狂尖叫的相關產品，性價比高過 IFC，打動平時由太子落旺角會搭轉地鐵的人，都報名跑個3K!

收到 friend 的推介，Calvin Klein Performance Run 6K路跑於7月8日舉行，明顯是 sell「CK」兩個英文字母，有一定含金量。睇落又幾吸引，參加者都得到 Calvin Klein Performance 現金券及精美禮品、索繩袋 、運動水樽、得力素能量糖、纖體營養代餐、Red Bull Energy Drink x2、Melona 雪條，仲有件 Calvin Klein 賽事紀念T恤，大會話值$590，而報名費是$250，仲包免費報埋隊際比賽，婆仔數一條，唔報名唔係人!

6K定位其實有點尷尬，10K不成，3K不就，但見到咁 so，大叔都變大媽，唔理咁多，於是在4月尾晨咁早報左名，容乜易爆左報唔到，見 CK 化 PK!

但世事何曾是絕對!

於前幾日收到急件，CK Performance 路跑竟然有免費名額拋出來，即係零付出，有齊上述的紀念品，當然隨即秒爆，推廣公司自不然笑騎騎，向主辦機構有所交代，但叫我地呢班早鳥情何以堪!

明白的，若報名情況不太樂觀，要谷要落藥催生是正常的，但大會有冇顧下呢群 early bird 嘅感受? 原本是早鳥有虫吃，現在變了早鳥捉虫去，伏到一個點!

彷彿似是歡樂　彷彿也是冷漠
誰愛你 誰惡你 似是明白!

其實要催谷，還有很多市場策略，例如「曲奇跑」在10月21日舉行，現在已不停在 FB 搞 pre-event突擊送大禮 (已經搞左十擊) 有獎活動，網友 hea 寫下「認為跑步可以帶給你怎樣的樂趣、如何舒緩疲勞、你有咩健康飲食好習慣…」，大會又送戲飛又地墊又健康產品。現在還搞埋紫薇斗數學理初中高班、參觀益力多工場，線上線下媽劇停齊發。(筆者絕不是「曲奇跑」的五毛代言，此賽事的以往參加者也有不少負皮，大家入貨要仔細研究)。

此外「暴走迷宮挑戰賽 2018」(6月3日舉行了)，大會在賽事前幾天出招，撥出免費體驗名額，參加者可以不用付款玩大會的迷宮和障礙挑戰，更送 UNIQLO Tee (心心眼哩!)，但不會計時作比賽排名次。參加人數瞬間大量提升，但沒有損害了已報名參加比賽選手的利益。

雖然是商業活動，估計又有戴晒頭盔的 disclaimer，話大會保有隨時更改章則的權利，但每項改變，可不可以想得周全一點? 有 heart 一點? 我地呢班早鳥付出真感情熱血報名，換來早知如此悔不當初的下場，我地會好鬼玻璃心!

世間內甜辣酸苦 完全是心態 是最奇妙古怪!

Fitz 連結: https://fitz.hk/?p=97112