大家好，我係 Why Not Run?! 嘅「試跑員一號」Ryan。若喺 Youtube 搜尋「跑會」，可能會見過我哋嘅短片「咩跑會咁巴閉」，由我、「試跑員二號」Gabriel 同 Peter 去介紹本地不同跑會。不經不覺已拍咗超過四十集，走訪咗廿幾個跑會…..
自問只係一個幾鍾意跑步兼沉迷打機嘅毒L，但因為呢個節目，被迫見光，突然發現無論上山或落運動場，不少唔識嘅跑友同自己打招呼喊加油，偶爾見對方露出謎之微笑嘅時候，硬係覺得佢哋好似笑X我拍片時跑到口水鼻涕齊流個衰樣。
作為素人跑手喺過去一年多拜訪本地廿幾個跑會，兼逐一領教佢哋嘅 program，確係匪夷所思且非常難忘，今期開始，希望藉住呢個專欄跟大家逐一分享當中點滴，盡量少啲粗口啦 !
----- 廣告 Ad -----
「無名跑會」
「無名跑會」應該係衍生自「頑張跑會」，約兩年前由本地搖滾樂隊 Kolor 主音蘇浩才 (Sammy) 跟近年人氣爆炸嘅香港越野跑代表 – 謝覺偉 (呀歹)所創立，主要係每周一次同大家跑吓步，及後成立咗「無名跑會」，提供正式跑步訓練。其實呢個概念幾正，唔想辛苦只想愉快地跑吓嘅可 join「頑張」(免費)，有目標想正正經經學跑步嘅就加入「無名」(收費)。
拍攝「無名跑會」令我體會到呀歹有幾嚴苛，仍記得當日嘅 program 係800快 / 400慢x10隻，聽到已腳軟，還慘被安排到A組(最快組)，自問耐力底不錯，但偏偏速耐力就係弱項，當日過程好很吃力，捱到一半已開始失速，主攻跑山訓練嘅我，Interval 呢家嘢簡直係傾出我所有 !
訪問中，Peter 問呀歹:「啲訓練咁辛苦，死得人㗎喎!」
呀歹咁答 :「咁先物超所值吖嘛，唔係報嚟做咩？」，嗰時我唔明！
後來正式加入「無名」，發現呀歹一直貫徹一種「唔辛苦練嚟把X咩?!」嘅原則。
無論練跑姿抑或做體能，都一定從旁監督，唔啱X到啱，不斷重重複複咁做，一個都不能錯。
日子久了，領略到肌肉嘅成長需要透過撕裂繼而重新修復，「唔辛苦練嚟做咩？!」…. 終於明！
----- 廣告 Ad -----
跑會最大嘅助力就係有班兄弟姊妹一齊練一齊捱，你會問自己「點解人哋做到我做唔到？」，
嗰刻你會同自己講 : 「好 ! X爆個訓練佢。」
認真嘅跑會，嚟參加嘅人就一定好正經? 幻覺嚟㗎。「無名」嘅同學最享負盛名嘅並唔係跑得而係玩得飲得。每次艱苦操練之後嗰餐，除非有比賽，否則一定無盡黑啤侍候，未嘗跑到嘔但經常飲到嘔，愛跑愛啤嘅你一定明，「頑張酒會」指日可待。更開心嘅係唔少「無名」同學仔都係 Kolor fans，愛跑愛搖滾，一齊練跑一齊睇 rock show，無數熱血滾燙嘅晚上，跑步以外另一聯繫，難得。
Peter 於訪問中好喜歡問教練們 ~ 點為之一個好嘅跑會，點為之一個好嘅教練，我懷疑到底有無準則。
跑步嘅世界無可能只有訓練、技巧、快慢同勝負，跑班由人所組成，人先係最重要嘅構成元素，教練與學員之間，學員與學員之間，情感與精神上嘅支持及鼓勵，方能助你捱過每次刻苦操練，絕對相信呢個先係每個跑會最珍貴嘅地方。
下期再同大家分享其它跑會經歷。
作者 : 試跑員一號
----- 廣告 Ad -----
