本港疫情嚴峻，無論係政府以至民間，都呼籲大家盡量留守家中，以免傳播病毒。不過，仍然有4月舉行的運動比賽接受報名。隨著政府推行各項措拖，呢啲活動或比賽，隨時唔符合當局規定，變相成為「非法」活動，各位運動友絕對要小心誤墮法網。
康文署場地不借出
Fitz 收到讀者報料，指4月份兩項由 Action Asia Events 舉辦嘅賽事 — 4月18日嘅「獨木舟越野跑步賽 深水灣」，以及4月26日舉行嘅「動感亞洲越野跑步賽 – 淺水灣站」都出現問題。
兩項賽事均在康文署轄下泳灘 (深水灣及淺水灣) 舉行，不過該名讀者向康文署查詢場地安排時，署方開宗明義講明，受疫情影響，康文署拒絕所有場地申請，包括舉行體育比賽、婚禮等。所以喺呢段期間，於康文署場地舉行嘅活動，一定無做足申請手續。
按圖放大
康文署網頁截圖 (按圖放大)
----- 廣告 Ad -----
見電郵所指，康文署職員已拒絕相關申請並通知大會，而大會亦已回覆，將盡快在網站公布取消安排。不過截至3月28日零時，兩個比賽仍然接受報名。
據業內人士話，喺未經申請嘅場地上比賽，參加者隨時會失去保障，因為:
- 活動可能已違反公眾保險條款，萬一發生意外，有機會會影響索償
- 活動舉行期間，如果當局落閘阻止，絕對超掃興
- 報名後，大會可引用免責條款 (例如: 非人力能阻止的意外)，取消賽事而不退回報名費
截至3月28日零時，有關賽事仍接受報名
事實上，而家疫情咁嚴重，連奧運都要延期，賽事主辦機構係咪應該盡公民負責，減少賽事規模甚至取消比賽，令市民留守家中，避免疫症擴散呢?
----- 廣告 Ad -----
3月27日政府公佈最新嘅防疫措施，禁止四人以上聚會，為期14日。上面呢兩個比賽暫時都喺禁令限期之外，不過市民亦要留意。
Fitz呼籲
面對疫症，我哋唔希望自己染病，亦唔希望身邊人染病，更加唔希望全香港染病。呢個禮拜，確診數字每日以雙位數增加，係時候一齊打好呢場仗!
過千位醫護人員呼籲「我堅守崗位、你堅守在家」，希望香港市民盡量減少不必要外出，當然包括行山、跑步、郊遊等活動。懇請大家4月10日前，唔好約人、唔好組團，減少交叉感染機會，避免疫症擴散。
不停loop住嘅 #關鍵14日，而家真係到咗關鍵時刻，今次要靠大家一齊自律!
香港人，加油!
