比卡超的迪士尼10K

以前跑過幾次迪士尼，可惜次次都無得入迪士尼跑，所以得知迪士尼10K有得入園區跑，就即刻報左有史以來報過最貴既比賽，荷包好痛（其實係男朋友痛），不過見佢包埋張飛都算抵，所以先有比卡超亂入事件。

有d人好鍾意變裝參加比賽，我見過個阿叔次次著住女裝泳衣跑，有玩開比賽應該知我講緊邊個，我唔係同路人，如果計埋Couple Run（個次有設最佳服飾獎而我順利蠃左），今次係我第二次著奇怪衫參加比賽。至於點解係比卡超，因為最近玩開Pokemon，比起迪士尼d角色我比較鍾意比卡超，而且扮公主太樣衰恐怕會成身雞蛋，所以都係做比卡超好d。而且我堅信比卡超係米其既朋友，大家都係鼠，只不過米其老母樣衰d咁解。去到迪士尼，果然見到幾條女扮公主，靚唔靚就見仁見智，不過我佩服佢地既毅力同勇氣，著住公主裙莫講話跑步，步行籌款都難啦。由於遲到關係，我由挑戰組變為歡樂組，同公主們一齊跑，真係幾歡樂。途中遇上白雪公主，我輕鬆地係佢面前跑過，後來先後悔無捉住佢影相，否則比卡超同白雪應該係最九唔搭八既世紀合照。

無驚無險終於完成10K，時間比想像中過得快，集集下郵唔覺意就跑完。一路跑d打氣團見到我嗌「比卡超加油」，仲有我男友係隔離幫忙配音，「比卡比卡比卡超……」，真係好搞笑。如果唔計途中多次熱死危機（唔知邊個同我講今日會落雨），呢個比賽簡直完美。本來以為可以跑入園區同死物影下相已經唔錯，點知迪士尼安排左唔少角色黎招呼我地，我都影唔曬。

以下係我d集郵相。 仲有大會派發既金牌，人人有份，結果我即刻影左張相sd比阿麻，話我贏左金牌，開心死佢，仲話要慶祝……主辦單位鼓勵我地講大話，仲要幫手提供埋道具，我真係無辦法唔照做。呢個無疑係我今個夏天最開心既比賽。

Tiffany and Simon’s running journey Facebook 專頁

更多：
Fitz.hk Facebook專頁
[猛龍的靈魂] 好朋友 阿KIM與玉
追不到的跑步女孩 (一)
Fitz Running 跑步

本文屬作者意見，不代表Fitz立場。