2018年4月29日，感覺返左中學時代，參加左場陸運會，唔同既係: 以前學校會逼你兩田一徑、兩徑一田，為既係幫自己社增光 (拎一分參與分)，雖然作為社既一份子，但感覺哩一點既光榮好似離自己好遠好遠；今次作為一個跑團既一份子，大家都係自發性參加，最後竟然有四十個人一齊報名，佔左接近一半人口，真係好難得，反而咁，有一點驕傲，希望可以爭取倒佳績。最後我地分成四隊，為既當然係大會隊際既藍芽喇叭，亦都希望有機會可以食倒隊際冠軍既一圍菜，又或者開威士忌慶祝。
出發前當然係要影張班相先，講開影相，感覺上本團係有天生缺陷：矮既前面、高既後面，簡單一個道理，怎麼不看透…
係改變唔倒事實既情況下，唯有改變攝影師既角度，再黎一張。
都係有d人比人遮住左XD
----- 廣告 Ad -----
係相機背後，係要特別多謝既雲茄，佢聲稱係黎食花生，事實係佢係攝影師；係啦啦隊；係移動補給站，希望冇飲哂你d水，仲有水送花生。
講講校服，不知不覺已經到第四代，設計真係冇得輸，最緊要既係相當易認，無論係六尺著定四尺著，都相當出眾，而且仲有一份團隊精神。
(校服既背面)
隊際賽，今次仲要十人一組，難免有d緊張，大家都會擔心連累大家，好似叫大家更加努力咁。起跑之後，唯有馬不停蹄咁向前衝，快得一秒得一秒。奈何天氣真係好熱、賽道真係好斜、地下真係好硬、跑步真係好苦，見住前面既宗盛越黎越細粒、後面既師兄越黎越明顯，其實都幾想放棄，不如扮受傷、扮中暑、扮比牛撞，抖抖都幾好，諗返當時真係跑到精神分裂，但去到 U-turn 既時候，見返d隊友同朋友，佢地既一聲加油、一個手勢、一個蹋Q既撃掌，都變左繼續前進既動力，大佬，你地比我透透得唔得啫，點都好，原來係賽道上唔止自己一個，仲有一班人一齊努力前進緊，又點樣可以慢落黎呢，多謝你地 (係過程入面，淨係認倒有著校服既人，抱歉抱歉) 幾經辛苦，終於返到終點啦，其實……真係好鬼攰。
https://www.youtube.com/watch?v=2zDFzG7I2AU
----- 廣告 Ad -----
我們不慢，但我們輸了…
唔知係邊刻開始，時間已經唔係最重要，反而係大家安全返到終點，一齊努力過、一齊開心過，對我地黎講，已經係贏左。
圍菜、威士忌唯有留返下次啦。
咁多位，辛苦哂!
(相機係唔收音架)
或者，如果有鬥食、鬥嘈、鬥mean、鬥膠比賽，我地應該所向披靡。
特特特別嗚謝：Ellen 同佢既攝影師，為我地紀錄左今次活動，仲要有埋片，真係好正!
https://youtu.be/QLa1bLHFQ6E
(相機係唔收音，但gopro 收)
----- 廣告 Ad -----
Fitz 文章連結: https://fitz.hk/?p=93215
更多：
Fitz Facebook專頁
[波士頓馬拉松] 不完美中見完美的波馬
[佛系跑手] 四徑生還者 黃浩輝有個五年大計劃
Fitz Running 跑步
