甘肅「黃河石林山地馬拉松百公里越野賽」慘劇，21人死亡。據講意外令國家領導人龍顏大怒，決意立案徹查，而全國各地呢幾個月將會舉辦嘅越野跑及路跑賽事，亦因為慘劇而延期或取消。
死傷意外令跑手擔憂
意外發生後，國家體育總局5月23日召開全國大會，指示各個賽事主辦機構要做足安全措施，而大會舉行後三日，更不斷有比賽宣佈暫停舉行。《新浪網》統計，大約有60多個由5月至8月嘅比賽宣佈延期或取消，當中包括越野跑以及路跑賽事。
地方政府已為事件公開道歉
外界估計，比賽暫停，相信源於體育總局之類嘅官方單位命令，不過《新浪網》訪問一名匿名賽事組織者，佢聲稱停賽決定同官方機構無關，純屬商業行為。
呢名賽事組織者話，甘肅意外後佢哋收到大量退賽查詢電郵，亦聽聞唔少家人得悉致命意外，已阻止跑手參加比賽。佢認為，就算賽事如期舉行，都可能要處理退賽問題，加上避免輿論壓力，所以決定暫停舉行。
----- 廣告 Ad -----
不過，熟悉大陸政情中人一定知道，有陣時未必一定要白紙黑字先叫有影響力。上頭有啲想法，其實唔使講出口，下面亦會 feel 要點迎合上意。講白啲，就算體育總局無話要取消賽事，只要佢哋有大概嘅想法，下面賽事組織者又點會唔識做呢?
事實上，呢幾年大陸嘅越野賽良莠不齊，已成為地方政府一種吸金工具，都係時候認真整頓一下。
大陸唔少越野賽，都同上圖呢一類景區合作。而呢啲景區，同地方政府嘅關係亦千絲萬縷。
資料: 新浪網
