[贏在起跑線] 回歸跑7歲半馬組 締造神童?

圖片來源: 力行社 Activist Association Facebook

香港回歸21周年，馬鞍山有場回歸跑比賽，仲係「曁半馬聯賽」。21周年跑21公里，確係相當有意思。

不過，比賽結束之後，有網民發現呢個比賽竟然有「兒童組」，亦有網民證實係有兒童參加。

圖片來源: 大會網頁

----- 廣告 Ad -----

7歲 (2011年出生) 跑21公里，確實係贏在起跑線。有口痕跑友就話:「遲下會唔會有10公里BB爬行大賽?」

咁究竟兒童參加長跑運動，係咪合適呢?

反方: 過早操練 易有傷患

隨著運動科學發展迅速，亦發始關注兒童在各項運動上嘅訓練問題。近年有唔少針對籃球、網球嘅研究，都係話過早訓練專業運動員，會令運動提早出現傷患。張德培於1989年以17歲之齡奪得法國網球公開賽錦標，係現今最年輕嘅大滿貫得獎者。但其後佢長年受傷患困擾，成績停滯不前。

世界馬拉松比賽嘅殿堂，波士頓馬拉松，至今仍然堅持將年齡下限定於18歲。該地嘅波士頓兒童醫院醫生 Lyle Micheli 向傳媒透露，雖然近年不斷有人要求放寬限制。不過佢哋「寸步不讓」，因為:

1. 青少年發育情況常有差異，有啲女仔會喺14歲完成發育過程，有啲可能要到18歲。將參加馬拉松嘅年齡降低，可能會令發育中嘅兒童，參加一啲唔適合佢哋嘅運動
2. 發育未完成嘅兒童，腳長比例會較短，跑動嘅衝擊比成年人更大，對膝部，以至中樞神經有不良影響

Micheli 醫生堅持：

「未夠16歲，唔應該跑多過10公里!」

根據資料，波士頓馬拉松必須要夠18歲先可以參加。至於香港渣打馬拉松，全馬嘅年齡限制係20歲，半馬同10公里就要求參加者夠16歲。

圖片來源

----- 廣告 Ad -----

正方：早操練早有成效

事實上，應該幾多歲參加長跑嘅問題，醫學上暫時仲未有定論。有人就支持年紀輕，都可以不限里數咁跑:

1. 年紀細最容易受傷嘅講法，暫時仲未有好確切嘅證據
2. 非洲人都係由細跑到大，反證跑步危害兒童嘅論點
3. 現今兒童習慣玩電腦、手機，少做運動。肥胖成為兒童最大敵人，叫佢哋多做運動係好事
4. 事實證明，早進行高強度帶氧運動，會令兒童喺進入成人之後，仍然有擁有出色嘅心肺功能。所以早啲訓練，就早啲有成效
5. 七、八歲參加全馬嘅例子多不勝數 (如70年代台灣嘅蒲仲強，8歲跑芝加哥馬拉松以3小時0分完賽)

結論: 點解要搏?

話未有證據「操練會造成傷患」嘅講法，確實不能反駁，不過好多嘢，就算只有萬分之一嘅機會出現，係咪就要去冒險呢? 譬如話，食煙引致癌症嘅機會都唔係100%，但你會唔會話食煙對身體無害? 同樣地，年紀細跑長跑未必一定有傷患，不過又係咪代表安全?

如果年紀輕輕已經搞到傷病纏身，又值唔值得呢?

資料來源：The Atlantic、Runner’s World、運動筆記 (台灣)、回歸跑曁半馬聯賽 網頁

Fitz 連結: https://fitz.hk/?p=98235