澳門演藝人協會代表周家耀及伍家怡，呼籲大家到澳門參加樂施競跑旅遊塔。(圖片來源：樂施會facebook專頁)
當大家去日本跑馬拉松都爭崩頭嘅同時，去澳門跑番轉，大家又點睇？而且，呢個並唔係一般跑馬仔活動，而係跑61層樓梯，登上全澳門最高地標：澳門旅遊塔。
圖片來源：澳門民政總署城市指南
近呢幾年，長跑活動除咗以往嘅街跑之外，仲加入好多變化。好似近年深受後生仔女歡迎嘅主題競技賽（如卡通人物嘅長跑比賽）、登山比賽（如針山十登），以至超級跑山比賽（如繞大帽山賽）。而跑樓梯，亦都成為深受國際人士注視。著名嘅紐約帝國大賽跑樓梯賽，更係長跑界盛事。
(圖片來源：樂施會)
呢個「樂施競跑旅遊塔2015」活動，係由樂施會舉辦，9月13日喺高達338米嘅澳門旅遊塔舉行，參加者須由地下起步，跑畢1,298級樓梯，登上樓高223米嘅61樓觀光廊終點，現已接受報名。
----- 廣告 Ad -----
今次活動分為「個人競跑」（全塔及半塔）及「隊際接力競跑」(四人一隊)。年滿18歲嘅參加者，只要籌得港幣/澳門幣500元（全塔）或者港幣/澳門幣300元（半塔）或以上，即可參加「個人競跑」，賽事分為男子組及女子組；而籌得港幣/澳門幣5,000元或以上，則可四人一隊參加「隊際接力競跑」。活動設有「速度獎」及「籌款獎」，得獎者可以獲得由噴射飛航、精工錶及澳門電訊送出豐富獎品！
仲有呀，為咗方便香港朋友，參加者可以用特惠價，購買噴射飛航港澳來回船票兩套，即係話，大家參賽之餘，仲可以帶同一位親友以特價去澳門添，數量有限架！
去屆情況 (圖片來源：樂施會)
太陽國際體育會總監Cow Sir(左)同樂施大使小肥(右)鼓勵大家一齊參加「樂施競跑旅遊塔2015」。
至於樂施會，唔少人年年報名樂施毅行者，相信都了解樂施會嘅扶貧工作。既然大家一向咁支持樂施會嘅工作，亦可以考慮喺訓練毅行以外，去跑下樓梯，相信對毅行活動有一定幫助。
報名及活動詳情：http://www.oxfam.org.hk/tc/towerrun.aspx
