六、七十歲嘅老人家仍然踏上起跑線，喺賽道上奔走，雖然一啲都唔易，但又唔算罕見嘅。不過，今年超過70歲嘅 Lata Kare 婆婆，佢嘅跑步事跡就成為印度家傳戶曉嘅故事。
為五嚿水去跑步
印度廢除階級制度有半世紀之多，不過低下階層仍然飽受剝削。Kare 婆婆出身於貧困嘅印度鄉下，要幫地主耕田養活一家五口。
2013年慘事接踵而來，佢囝囝失業幾年未搵到嘢做，老公又患上重病，要大概20,000印度盧比 (約港幣$2000) 嘅 MRI 掃描費用。Kare 婆婆每個月人工只得4000盧比，無計可施，聽到鄰居話隔離村舉行馬拉松，跑贏就有獎金。於是 Kare 婆婆有理無理，報咗名先算。
----- 廣告 Ad -----
婆婆成世都未試過跑步，更加唔知比賽係乜，佢平常最健康嘅活動就係晨咁早由屋企步行去塊田。至於裝備，鞋係農村嘅奢侈品，婆婆一對鞋都無，於是佢就赤腳落場，再著一件9碼長嘅 Sari (印度傳統服裝)。比賽項目就係專為60歲以上組別而設而3公里賽。
比賽當日，Kare 婆婆發燒，佢囝囝點都唔准佢出門。不過婆婆為咗老公嘅醫藥費，就唔理囝囝嘅阻撓，奪門而出。
到比賽會場，大家見呢個耕田阿婆走上起步區，都覺得好奇怪，以為呢個阿婆去錯地方。點知一起步，Kare 婆婆有理無理向前衝，結果拋離所有選手，以組別第一名衝過終點。
Kare 婆婆亦贏得5,000印度盧比獎金 (約港幣$500)，解救佢一家嘅財政問題。
----- 廣告 Ad -----
由農婦變為 Bollywood 明星
Lata Kare 婆婆之後不時有參加比賽，仍然係赤腳同著住 Sari 服飾，亦多次贏到組別冠軍，開始受到公眾關注，一家嘅生活亦因為咁而安定起來。
2020年，有人將佢嘅奮鬥經歷拍成電影《Lata Kare》，更加搵婆婆飾演自己。
朱溫
生於亂世，有種責任。這個責任就是做好自己，感染別人。鍛練好身體，才能裝備自己，迎接亂世。