香港終於有跑步電影上映! 呢套並唔係精英跑手嘅紀錄片，亦唔係馬拉松冠軍嘅奮鬥事跡，而係講你同我嘅跑步日常。
電影叫《我的馬拉松日記》Brittany Runs a Marathon，美國9月中已經上畫，睇住預告片先:
《我的馬拉松日記》簡介
「27歲的Brittany喜愛夜蒲，夜夜笙歌，每晚翻雲覆雨過後，第二朝返工例牌殘爆兼遲到。於是她去睇醫生為搏獲處方「醒腦藥」，誰知醫生幫她做身體檢查，發現她心率和血壓過高，毛病多得不能盡錄。Brittany驚覺自己未老先衰，痛定思痛，決定控制自己縱慾無度的生活模式，更穿起跑鞋去練跑，日復一日，越跑越遠……她似乎終於找到了正確的人生方向? …… 一個熟女如何重組生活，跑出個未來，絕對笑中有淚。」(來源: 九展 Metroplex 網站)
美國方面嘅口碑似乎唔錯，Rotten Tomatoes 畀咗佢90分。其實無論香港定美國，日本定歐洲，越來越多人為咗身型、健康、情緒，甚至為咗擴闊生活圈子，都著上跑鞋上街鳩衝去也。電影敘述大家身邊朋友 (或自己) 嘅經歷，就容易引起大家共鳴。
----- 廣告 Ad -----
可惜嘅係，香港暫時只有九龍灣展貿中心嘅辛丹斯電影節2019 (Sundance Film Festival)上映，9月22日及10月1日各放映一場。而且電影係 Amazon Studios 製作，呢個平台所有節目都無中文字幕，戲院落畫之後，想睇到中文字幕應該唔容易，希望之後會有其他院線上映啦!
Fitz連結: https://fitz.hk/?p=125646
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。