圖: 點滴是生命 A Drop of Life

我不樓唔太鐘意方力申!

或者應該咁講,應該無乜我呢類阿叔會話你聽係方力申 Fans,除咗方爸爸啦當然,就算佢拍咗咁多葉念琛嘅戲,我始終搞唔清楚佢女朋友係 Teresa 定 Stephy 定傅穎,我真心唔覺得佢靚仔,只可以話四四正正。硬係覺得佢介乎六字同八字中間 ,做戲尷尷尬尬笑片唔好笑愛情片冇乜感情,唱歌…….. 乜佢唱歌㗎咩? 唔太鍾意佢嘅程度係,記得今年農曆新年鄭中基演唱會,一個唔小心一家三口買咗第一排座位,嗰晚嘅特別嘉賓係美女廚房嘅拍檔梁漢文同埋方力申,唱唱下歌失驚無神佢哋走落嚟派利是,好衰唔衰方先生負責派我坐嗰排,但都冇乜人同佢握手,去到我面前佢望住我我望住佢,我又冇主動熱情地想同佢握手,佢唯有同我地講句新年快樂,我就禮貌地同佢拜一拜,都有斗零尷尬!

直到唔知幾耐之前聽到佢話要環島游籌款大嗱嗱45公里,仲要12小時之內完成,作為一條把鬼業餘三鐵運動員我即刻計吓數,45公里等於900個50公尺游泳池,12小時內完成即係每小時要游3.75公里,即係每100公尺游1:40分鐘左右!

900個塘,12小時內完成,1:40/100m 喎,我唔覺得佢會完成到!

圖: 奇美子繪本日記

喺業餘三鐵嘅世界裏面,可以用2:00/100m 內游完1.9KM同3.8KM 嘅為之合格,1:45/100m 以上嘅為之叻叻! 45KM 用 1:45/100m 完成? 除咗叻到飛天之外我無嘢形容,亦唔識形容,我成世人五十幾年嚟最長只游過5公里,仲要喺泳池唔係喺海,喺海雖然浮啲但有水流有海浪,更加難以預計!


結果佢並無依照預期時間完成!

佢快咗! 佢用咗 10:43 完成! 即係用少過1:30/100m 游足45KM!

圖: 點滴是生命 A Drop of Life

我必需承認我 Online 睇住佢衝線果剎那有啲眼濕濕,幾個月嚟見過最 positive 嘅畫面莫過於此! 我忽然間覺得游到腫晒嘅方力申好有型,佢上水嗰陣仲好似游刃有餘大把貨剩,嗰一刻起我真心佩服同 Respect 呢條友,明知不可為以為之而最後超額完成,任何情形範疇之下都值得敬佩!

方先生如果時光倒流去返演唱會果一晚,我會狠狠咁握住你對手甚至熱情擁抱然之後話你聽真心敬佩!

然後你應該會叫保安拉咗呢啲癲佬!

圖: 點滴是生命 A Drop of Life
其他文章:

文章為作者意見,不代表Fitz立場。

歡迎投稿: https://fitz.hk/contribute/

廣告
雷彬冶文
老餅廣告人,資深美指。貪威識食,惡死睖瞪,腌臢腥悶,姣斯躉篤!熱愛運動,業餘中嘅業餘三鐵運動員,酷愛貪靚臭美程度至長期健身控制飲食,考埋 PT 教練牌!