圖: 政府新聞處

開放不足一星期嘅大埔龍尾泳灘,早前有救生員指已有超過100名泳客被海膽、水母等海洋生物整傷。康文署回覆傳媒查詢證實問題,表示星期六 (26日) 因被海膽及水母輕微刺傷的個案分別為42宗及21宗。

康文署話,63宗受傷個案都屬輕傷,並強調海灘有海洋生物屬大自然現象,泳灘員工會監察水面情況,會將「危險物」移離泳灘範圍。

圖: 港九拯溺員工會

不過,港九拯溺員工會指,龍尾泳灘獲康文署分派10名救生員,如果扣除員工放假,每日只有大約7人當值。當員工放食飯、午休時,泳灘只有4至5人當值。當值人員要負責拯溺、海面監察、以至急救等工作,絕對係人手不足。

有大埔居民於 大埔 TAI PO Facebook 群組 分享相片,顯示海面有大堆水母。

圖: 大埔 TAI PO

泳客: 人多車多水母多

圖: 讀者提供

有 Fitz 讀者星期日 (27日) 去龍尾泳灘游水,向我哋分享見聞:

  • 水質雖比屯門泳灘好少少,但比石澳差
  • 由大埔坐車入,汀角路嚴重擠塞,塞車好耐先入到
  • 海面有大量水母,沙灘有大量海膽,逗留一個下晝,見到有小朋友被海膽刺傷
  • 泳灘一帶違例泊車十分嚴重,人車爭路
圖: 讀者提供

斥資達2億

大埔龍尾泳灘為香港人工泳灘,原本係一個有逾400種物種嘅重要保育海岸,海底佈各種海星。唔少保育團體指,於龍尾興建泳灘,會扼殺物種生存空間。事實證明,泳灘興建後物種數量及種類已大幅減少。

如今泳客被水母及海膽整傷,唔應該話呢啲海洋生物襲擊人類,而係人類侵佔海洋生物領地而已。

資料: 香港01大埔 TAI PO

首頁 > 運動 Sports > 游泳 Swimming > 龍尾泳灘現大量水母海膽,康文署: 單日逾60人受傷