阿布扎比世界短池游泳錦標賽，香港代表何詩蓓於200米自由泳決賽贏得冠軍，更以時間1分50秒31打破世界紀錄。呢個係香港游泳史上首個世界紀錄。
何詩蓓於初賽以1分52秒86晉級，雖然勁敵絲祖唐並無參賽，但仍然強手林立，包括前歐錦賽冠軍法國 Charlotte Bonnet 同東京奧運接力銀牌美國 Paige Madden。安排於第5線出賽嘅何詩蓓，起步反應第2，頭50米已經領先。至150米，詩蓓比次名選手拉開至少1秒，最終以1分50秒31衝線，成為世界冠軍兼打破世界紀錄。
賽後何詩蓓接受大會簡短訪問，難掩興奮之情。
----- 廣告 Ad -----
與絲祖唐互相鼓勵
呢次何詩蓓打破嘅200米自由泳嘅世界紀錄，舊紀錄於2017年由瑞典絲祖唐 (Sarah Sjostrom) 所創。其實，絲祖唐亦係何詩蓓在歐洲泳隊 Energy Standard 隊友，二人經常代表泳隊攜手出賽，甚為熟絡。
今年11月底，何詩蓓在ISL游泳聯賽有突出表現後，與教練接受游泳媒體《Swim Swam》訪問。主持問何詩蓓:「絲祖唐會唔會好擔心你會打破佢保持嘅世界紀錄?」
何詩蓓諗咗一陣，答:「我記得我哋舊年傾過呢件事，Sarah 好大方，佢一啲都唔介意，仲鼓勵我要畀心機。」
呢個時候，主持人亦忍唔住話:「兩位泳壇猛將，大家既係隊友，又係競爭對手，而大家可以保持咁好感情，仲可以互相鼓勵，真係好難得。」
何詩蓓喺今屆世錦賽將會出戰100米同400米自由泳，期待佢再創佳績。
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。