Jacky Leung Climbs Every Mountain | 梁俊強細說香港跑去蘇格蘭有幾technical

----- 廣告 Ad -----

Climb ev’ry mountain,
Ford ev’ry stream,
Follow ev’ry rainbow
Till you find your dream.
(如果TVB 搞「老年好聲音」，你或者有機會聽到這首來自電影 Sound of Music 的歌)

漂泊他鄉，總被故土的思念細嚙著，有點癢，更多的是痛。

Jacky 在2021「香港四徑超級挑戰」(298K，HK4TUC) 的十週年，成為首位破50小時 (49:21) 的跑手，投下當年山界的震撼彈。一時間 Jacky 如流星閃亮，劃過長空，眾人仰望。媒體有關他四徑的報導還擾擾攘攘之際，Jacky 卻在幾個月後 (4/2021) 移民英國，從香港跑到9600公里 (ChatGPT資料) 外的蘇格蘭，這條賽道有幾technical? Jacky的越野跑生命還有心跳嗎?

趁著 Jacky 老遠從蘇格蘭回港探親，星期天待他教完跑班，約在荃灣綠楊坊食 lunch 做訪問（天陰陰想落雨，都係唔好行山，俾個藉口我，OK?) 打開openrice，老餅的選擇有美心皇宮，花園餐廳，後生少少的有HeSheEat，元氣壽司，燒肉Like….，心知與 Jacky 差了幾代，還是叫 Jacky 提議，免得佢食得唔自在又要交享受戲。怎知他主動提議: 一係去飲茶，一係花園餐廳。極之護老 (我當係)，呢個位加分。

四徑 – 讓流星閃過

「我之前覺得玩四徑是越野跑手臨退役前的一場謝幕戰，所以離自己還是很遙遠。到我毅行連奪兩屆總季軍，我開始諗 what next 嘅問題，例如會否玩300K的巨人之旅? 發現自己對四徑原來是有些恐懼。雖然期間 Andre 一直有 send invitation 俾我，但我都拒絕了。」俾檸檬 Andre 食你都夠卜。

「到2020年，我同自己講 (相信四徑參加者都經常同自己講好多嘢)，不如去試下，但要好低調，決定唔係 social media 作任何預告或暗示，操練的紀錄也不會加 comment 和目的。如果到時玩唔掂就唔好出post，唔想因面子問題俾自己咁大壓力。」

原來 Jacky 的四徑有前傳的，破50前一年 (2020) Jacky 也有玩四徑，58小時31分。他跑完第一條麥徑因落雨有低溫症徵狀，到北潭涌時向 Andre 打個交义十字，表示要退出，但俾 supporter 們反對，Rouisa 二話不說車了他去南涌預備展開衛徑，Jacky 形容是史上第一次由 supporter 否決參加者的剪帶決定。型呀，原來 supporter 可以咁權威，我都想試下。

「2021適逢四徑十周年，Andre 邀請番之前的完成者一起再玩，好有 Hunger Game feel。」論實力，Jacky 相信當年四大高手：Tom Robertshaw、曾小強、Salomon Wettstein 及羅啟邦 (Bon Bon) 都在他之上，破50才應放於他們的購物籃。

「四徑前我參加HK100 virtual，阿歹都join一齊玩，因為佢對100K仲係好陌生。結果13個半鐘完成，成績理想。跟住我連續8日操足285K，配合四徑的距離，也有做速度訓練，10K第一次跑入39分，當時的狀態唔錯。」

不同大婆台的劇集，命運就是曲折離奇，估你唔到，四大高手因傷患分別退出或大大拖慢了時間，Jacky在梅窩碼頭開始最後的鳳徑，那時用了39小時17分，Julien 向他說：「You are the one to make history」，即是10小時內KO鳳徑就可破50，並且告訴他 Salomon 早他52分鐘從梅窩起跑，追Salomon? 破50？咪玩! 真係得? 我Jacky喎? 答案就在自己的雙腳。

「我練習時可以9個鐘完成70K的鳳徑，但而家已跑了39鐘才開始，有可能嗎? 所以我向自己催眠: Jacky (或者叫「強仔」、「傻強」、「靚仔強」)，你而家係好 fresh，啱啱落船梅窩起步，我俾10個鐘你做一隻 LT70，OK?」Jacky答：「Sure, I promise!」(唔知點解開認真 mode 時多會講英文，例如: I do)。

Jacky 的催眠功力漸漸見效，愈跑愈有，深夜到狗嶺涌，見有頭燈在慢行，原來是 Salomon，他的胃唔舒服，能量超低。與他同行一段，終於超越了他，完成項目一。項目二是破50，但那時的 Jacky 體力已接近耗盡，進食後好快又冇力。

攀上大東山時，剛好日出，晨曦從天上灑下，山野回綠，早鳥飛翔，穹蒼之下，一男子望望錶，距離50小時還有個半鐘，要走7K到梅窩，他給自己展露了微笑，跟住往南山走，個多小時後，在一片鈴聲、歡呼聲、掌聲之中，奔向綠色郵筒，之後便是歷史。

「Salomon 好好，做左個印章係我件背心，”Jacky, breaking 50”，仲有支香港特區旗，我錶起左放係客廳果度。」燃燒生命，值得留住煙火催燦的一刻。

Jacky起飛的跑道

「你以前讀書係唔係運動健將?」
「我讀書時係玩長號 (Trombone 伸縮喇叭)，參加過校際音樂節，同運動拉唔到關係。出嚟做嘢之後，受朋友影響，好想試下玩毅行者同渣馬。2006玩第一個山賽雷利長征78K，係 cut off 前半個鐘完成。」

「自己係物理治療師，好想知道通常山賽啲傷患點樣形成? 果時都睇好多 Elton (吳俊霆) 嘅文章，佢又係物理治療師，又係越野跑手，受佢影響鍾意越野跑。」睇戲搵自己身體做試驗的，都是科學怪人之類的狂熱份子。

「我2007第一次毅行30多小時，到下一年毅行已經可以17個鐘，因為識左另一班friend，跟佢哋操長途。」朋友是自選，唔好又話俾 friend 迫害。

「2011年參加 UTMB，即係 Kilian 攞第三屆冠軍果年 (記埋呢啲資料，明顯係忠粉，講開又講，Jacky，你記唔記得邊年結婚?) 大開眼界，見到法國人跑山動作好柔，好多人對長途山賽有 passion。佢哋傾向用行山杖同㩒膝頭上山，同香港慣用义腰有所不同。」

「2013 HK100係我在港的第一個 solo 100K，12小時18分。同年 Translantau 100，13:38 獲得第三名。」2013是 Jacky 在山界發光發亮的一年。

「我嘅年代香港除了浩聰同小強呢啲神級選手之外，都是外國跑手天下，我有個心，係好想以香港人身份同佢哋力拼前列位置。我同 Jeff Campbell 同 John Ellis 都有交流和操練過，佢哋都係經歷一段時間磨練，才突然變成堅離地的外星人。」堅持就是打開成功的密碼，鬼唔知呢個 password 咩，但不是係人都可以解鎖。

「我一直好希望在毅行者取得大杯，即係全場的頭三甲。2016年我同 Jeremy Ritcey、Tom Robertshaw 和 Claire Price 組成 Team Salomon，拿下 mixed team 冠軍及全場總季軍。」2017年再和他的偶像 Jeremy 及另外的隊友勇奪男子組季軍，擠身香港山界的神殿，亦達成他與本土外藉跑手平起平坐的心願。Jacky 是向天花線跑的戰士。

自稱魔鬼教練

「那時我34歲，我明白冇可能可以一直保持速度到40歲，於是有教班嘅念頭，創立 Reflex League，目標是協助初玩山嘅跑手提升到中上層位置。那時KK sir、浩聰、周佩欣等陸續成立跑班。」

「點界定呢條中上層線?」
「果時『健行之友』、Cosmoboys、天鷹同外藉人士係山界精英，佢哋雖然未去到浩聰的世界級，但都幾壟斷頒獎台，我就係 benchmark 佢哋水平。係2017年我見到有呢個斷層，我想幫學生去感受下這個水平。」Reflex League 去到2021年已因 Jacky 移民暫停。

「有冇好難忘嘅學生?」
「2018年我有毅行者訓練計劃，train 四個女仔組隊 Hello Kitty 參加，結果攞左當年女子冠軍。最感動的不是成績，而是我同佢哋一齊參與操練。我自己係治療師，知道要因應個別同學的需要和弱點，協助佢哋突破自己嘅樽頸。」

「你係唔係魔鬼教練?」
「魔鬼㗎! 我好惡，我會鬧人。同學講番，話只要陪住佢哋跑，仲要只不過係後面半個身位，已經感到好有壓迫感，唔敢慢，覺得成日都有聲音導航。」我經歷過這些教練在旁壓力後群症，而家已慢慢發展出滅教練防衛系統，例如故意問教練問題、縛鞋帶等。

「我要求同學上渣甸山、紫羅蘭山要 jog 上去，樓梯跑到5級就跑晒5級，好辛苦，要有目標，要係心裡面不斷鞭策自己，當訓練時有呢個心理素質，你就可以在比賽時運用出來。」明白，鬥心的對象其實是自己。

「當同學經歷過自我鞭策嘅壓力，佢哋會有突破，甚至上台攞獎，佢哋開始轉化這個自我鞭策嘅概念為訓練一部份。當然我是針對年青的同學多些，一些50+的我就唔會逼咁多。」好彩加番呢句。

「你一方面係物療治療師，希望跑手唔好去到咁盡，安全首要。但另一方面係教練，想同學去盡啲，堅持，唔好咁輕易剪帶棄賽。覺唔覺得有矛盾?」

「原則係唔好因比賽傷到嚴重影響日常工作同生活，唔可以連上樓梯都做唔到，返唔到工。我會做啲assessment，例如我會叫學生jog上樂活道去畢拉山道，睇下佢哋做唔做到，做唔到唔會勉強去做。但係有potential的就可以去盡啲。」

在蘇格蘭維持越野跑的心跳

「蘇格蘭有冇繼續上山?」
「蘇格蘭好濕好凍，天氣方面我到而家都未適應。我有 join local 嘅cross country club，逢星期三跑上山，風速係8號風球，50 miles per hour，但佢哋面不改容，處之泰然，幫到我減低抗拒。不過我一定唔會自己一個人上山，因太危險。」

「果度成日大風大雨，天氣都好影響心情。亦有安全考慮，夜晚操山差唔多係冇可能，如果拗柴行唔到你有機會凍死。操練少，而家狀態真係差好遠。」

「都有參加比賽，不過少好多，例如玩過 Snowdonia by UTMB (North Wales)，當然只係 enjoy 為主，100K走左差唔多20個鐘。果邊嘅路況好 technical，有好深嘅泥沼、路面多泥濘同較鬆軟，易拗柴，好多variety。」

「對英國文化有乜嘢體會?」
「英國人仍然懷緬同停留係佢哋帝國時代嘅風光，係一個 timeless 國家，與時間脫軌，我覺得世界唔係咁。果邊生活節奏太慢，始終喜歡香港城市急促嘅節奏，覺得自己 physical 同 mental 都退步緊。加上要探阿媽，因為我係獨仔。我而家兩邊走，叫做有啲 balance。」

「學到英國人用正向心態面對工作同學習，英國社會較少負面氛圍，佢哋會從正面角度去俾意見，就算讚完你，你都要醒水係唔係有啲乜嘢要改善。我而家都會多啲睇學生嘅進步，多啲鼓勵同包容。」

「即係冇以前咁魔鬼?」
「係，冇咁魔鬼。」對跑班同學係好事定唔好事?

「在外地生活有好多嘢要 struggle，自己仲搵緊 identity、life purpose 同以前嘅自己。雖然我都算可以做番本行，但始終個 passion 唔同。」
「係 trail running 方面，我未搵到我 contribution 個位，係香港我哋好易同 friend meet up，有share 有 stimulation，上山又超方便，跑班又多，好易搵到巴打一齊互相迫害，對進步好有幫助。在英國入運動場跑步仲要俾3鎊， 我自問唔係跑步狂熱份子，更加少動機去操。」

找身份認同是一場人生超馬，未必個個都可以完賽。

與樂仔相知相遇相惜

「要講番2018我組隊玩毅行時，隊員已有 Max 同 Jeremy，尚欠一人。發現當年 Translantau 100 有個越野跑素人廖科樂 (樂仔)，做到16個幾鐘，跑第5，好驚訝。見佢全身都著晒鎖記gear，但佢唔係 Salomon 嘅跑手。於是主動邀請佢加入，同佢講我哋有晒support，籌款會幫埋佢。」

「比賽前同樂仔操過針草帽同麥4兩課，一試就知係fit馬，估計有做到12個鐘嘅實力。可惜臨場 Max 有啲狀況，但都做到13個半鐘，全場第五，我哋第九段仲守住第二、第三名。完左我有少少情緒同忟憎，但好快就冇事。」Jacky 落場就是個鬥士。

「樂仔好聽話好謙虛，好開心見到佢全心 into，於是介紹佢入 Team Salomon (訪問樂仔時，樂仔好感激Jacky，表示係佢越野跑嘅啟蒙）。而家佢做教練同說話愈來愈有信心。」樂仔是同時走偶像派和實力派，祝願他可以在山界發光發熱。

「其實我建議過佢全身投入跑界，因為要係自己嘅領域再有突破，係必須經歷教練角色，當你要講俾學生知，你要總結經驗同智慧，明白成功背係嘅原因，同點去克服困難，經過整理，呢啲知識才真正屬於你。」Jacky 絕對不只是部跑步機器，是機器工程師和生產商。

彩蛋

Jacky 除了是個有熱度、有鬥心、有視野的越野跑手，還好 alert。

「係蘇格蘭成日獨行俠，就算著對最靚嘅 Nike 鞋出街都冇人會見到，冇 social interaction，整整下你會好hea，求其著條短褲，老老土土，不顧身世咁落街 (咦，又咁似我)。我有冇去跑步、甚至有冇去比賽都冇人知。」

「相對係香港，四周環境同社交有好多 stimulation，好多人會 follow 會俾 like 你，要 keep 住自己好alert，會令自己 moving forward。」

好認同，係香港可以老，但唔可以hea (店長，”超”方面有冇好介紹?) 我首先要 moving forward 的是個肚腩，希望以後做專訪可以影全身selfie。