Fitz > 運動 Sports > 三項鐵人 Triathlon > 得憶 • 得戚 | 台東 Challenge Triathlon 2023

“我唔想到熄燈嗰陣,我連一件值得記得嘅事都無啊!”

昏暗燈光嘅拳館裏面,賤輝練到身水身汗死下死下,老友太歲問佢癲夠未? 賤輝咁樣答佢!

有人會覺得值得記得嘅係飲咗支九幾年嘅 Lafite ,有人會話係架新買嘅法拉利 296GTB 落地,有人會係間二千八呎連雙車位私家泳池獨立屋入伙,更有人可能會話係 Noma 臨永久結業之前趕得切食咗一餐,仲同 Chef Rene Redzepi 打咗咭影咗張相添。

如果我上個禮拜瓜咗老襯熄咗燈,我家主席或者副主席喺我嘅喪禮致辭,會點形容我呢? ” Em ….. 我老公 / 老豆係一個廣告人,係第一代返大陸做開荒牛嘅創作人,em ……. 然後……. 做咗一世媽屐停 …….. 咁囉,完。” 叔叔嘅一生,就咁講完,好唔型喎!

作為一個地地道道嘅香港仔港大叔,練精學懶乃係 DNA 之一,尋求享樂追求快感,可以取易絕不取難,可以坐唔會郁,可以行唔會跑,大杯酒大塊肉不知幾爽,而運動係反智嘅,又辛苦又流汗又倦仲會受傷,幾十歲人玩三項鐵人更加係虐志又弱智嘅行為,直情屬於被旁觀者視為 “攞嚟賤” 嘅人,咁點解唔打下麻雀鋤下大弟打下 Golf ,要玩啲咁辛苦嘅嘢呢?

就係因為賤輝講嗰句嘢。同埋真正熱愛呢項挑戰,熱愛呢項好辛苦嘅運動!

當你企係水邊,準備落水開始比賽嗰一剎那,其實你已經贏咗! 贏咗好多十公里都行唔晒跑唔晒嘅人,更加贏咗好多坐喺梳化食薯片飲啤酒煲劇然後上兩層樓梯都喘氣嘅人,因為你將要開始同完成113公里嘅賽程,而之後,你會永遠記得呢個回憶,同埋抵你得戚,因為係你用咗好多好多努力同汗水換番嚟嘅,更加樂在其中。到熄燈嗰剎那,我可以好 Proud 咁講 “ 事業方面,叔叔只係搵到兩餐晏仔無乜地位乏善足陳,但我完成過十四次全馬 BQ 埋,幾次226 ,幾次113 ,仲要係全部五十歲之後先開始做嘅,係一個好值得回味嘅回憶!”

於是,事隔七年之後,我再去番當年第一次113嘅台東普悠瑪賽道,參加 Challenge Taiwan 嘅113比賽。

此其間,叔叔參加過好幾場不同長度嘅比賽,包括不同地點嘅 Half and Full Ironman 等,但心心念念最懷念嘅還是初心之戰嘅台東活水湖,同埋嗰條賽單車嘅海傍連綿賽道。七年過去,對呢項運動嘅認識多咗,但同時亦老咗七年,臨近耳順之年體力耐力訓練不可或缺,但問題係因工作關係,唔可以同一班隊友一齊訓練,獨居老人在異地無教練無同伴,點先可以練出更好體能狀態應付動輒超過六小時嘅高強度比賽呢?

同教練 W 師傅商量之後,佢俾咗個相當激死人嘅課表我,最後兩個月一星期練足七日,因為教練認為叔叔大腿肌耐力不足,所以每日起碼練一項加力量訓練,隔日兩項加力量訓練,逢週日 Brick Training 兩項連續……

但最重中之重係,全部訓練叔叔要一兜冷一條友獨自完成,無人監察無人拍跳無人吹水之下,自己睇住 data 靠自律去練,真係諗下都覺得似 Cape Fear 入面男主角喺監獄度獨自鍛練一樣。還好我係一個好悶得嘅叔叔,最後兩個月足足游咗幾十公里,踩咗二千K有多,跑咗三百幾公里。終於完成咗接近八九成嘅獨練課表,會合隊友一齊比賽去也。

比賽日,同一班隊友喺起點,終於又可以再擊拳講三年嚟都無講嘅一句說話……

“各位隊友,終點見!”

賽前預測天氣不似預期,落雨落雨加大風,憂心忡忡之下結果天公造美,比賽日陰天加少少陽光,全程無落雨朝早廿二三度,可以話係好適宜比賽嘅天氣,槍聲響起之後跳落水,游咗百多米之後,不可預期嘅事情又發生了………

我發水瘟!

>

事源於今次嘅賽衣係全新造嘅,時間關係,我未試過穿上賽衣再穿上膠衣試水,落水無耐賽衣同膠衣因為水面張力,完全貼緊我胸口令我呼吸困難,幸好幾年來嘅經驗令我叫自己盡量鎮定,伸手解開拉鍊等冷水滲入膠衣內,平衡水壓之後感覺回復正常,再慢慢追返上去,一個一個過番前面嘅人,游完水順利到 T1,騎上單車進行第二項比賽。

單車去程大逆風,非常吃力,Rolling 嘅路段亦令腳力付出更大,幸好那二千多公里並無白練,努力捱到 45 公里折返點之後逆風變順風,踩得快咗好多,最後喺預計時間之內返到T2 。

半馬開跑時天氣開始熱,溫度上升蒸發我體內水份同體力,硬住頭皮一步一步向前跑,終於喺預計時間多啲多完成,總成績比七年前跨進一大步,老懷安慰矣!

從覺得呢項運動太嚇人與我無關,不可能完成至到愛上,每次艱苦嘅訓練都甘之如飴,每次跨過終點線嗰份喜悅都不可言喻,過程中目睹身體在變化,以前做唔到嘅事情,漸漸做到,呢個感覺好神奇。你唔使跟別人比較,以自己為目標,除咗愛同中毒,好難解釋!

頒獎禮上,我哋十三人隊伍六位隊友上台攞獎,由冠軍到第五名都有,更替大伙兒高興,最後見到一位 75歲長者同樣完成113賽事上台領獎,我跟隊友笑一笑講: I see my future!

當然,慶功宴乾杯之後,大家已經按耐不住商量 ……

What’s next race?


文章為作者意見,不代表Fitz立場。
歡迎投稿: https://fitz.hk/contribute/