瞇埋眼,先嚟玩個角色扮演……;

想像一下,你係世界頂級運動員,贏過幾次世界冠軍亦經歷過低潮,轉戰職業賽慢慢重上高峰,成績越嚟越好攞完亞軍攞冠軍再攞冠軍又攞冠軍,事業如日方中幾乎所向披靡對手膛乎其後,剛啱刷新世界紀錄無幾耐,正正準備兩日後萬眾矚目嘅世界錦標賽,最後練習途中突然 “砰” 一聲眼前一黑失去知覺……!

醒番之後知道自己被一個粗心大意嘅貨車司機撞倒,正在擔架床上運送去醫院急救,一輪檢驗之後醫生話你知,你頸錐上嘅 C2 折斷,簡單嚟講你條頸斷咗! 比賽? 你諗都唔好諗! 點算?


你有三個選擇:

  1. 長期臥床加軟性頸圈固定頸錐,等佢慢慢生長,最唔痛苦但康復期最長,亦有可能唔使旨意再做劇烈運動!
  2. 做手術鞏固番 C2,但一樣要長期臥床等佢慢慢好番,一樣有排唔使旨意劇烈運動!
  3. 安裝一個叫 Halo,醫學上稱為 “光環四柱式頸錐外固定器“ 喺你個頭上面再連接硬膠頸框,而為咗減少不必要活動令頸錐生長,要喺你額頭鑽穿四個窿直接將個支架用螺絲固定喺你頭盍骨上,令你個頭部完全唔可以移動! 嘩,X! 我聽到都覺得痛!

你會選擇邊個方法? 九成九嘅人應該會選擇 A 或者 B!

但 “佢” 唔係塵世上九成九嘅人,佢選擇最痛苦但最積極嘅治療方法,裝上 Halo,希望極速返去 Ironman 嘅賽場之上!

佢係 Tim Don,英國人,Ironman 中嘅 Ironman!

呢個 Halo 用螺絲上咗上佢個頭度,整整三個月佢做唔到本來自己可以做嘅小事,剃鬚洗頭抹臉撩鼻屎甚至轉個身都要人幫先做到,新舊傷口不時疼痛難當,換轉係你你會點?自怨自艾屌九老天媽叉個貨車司機萬念俱灰覺得運動生涯就咁百佳咸雞蛋? 認命順天意退下火線從此一蹶不振鐵人變廢人?

Tim Don 梗係無! 佢戴住個 Halo 喺醫生教練指導下,從最簡單嘅肌肉伸展䦕始,去 gym 強化肌肉,踩 Trainer,喺泳池熟習番水性,喺跑步機慢跑保持體能!

三個月之後康復進展良好, Tim 如願除低可恨嘅 Halo,但啱啱先好番嘅頸錐唔適宜做太大頸部活動嘅動作,游泳單車都未可以練得咁盡,Tim 決定參加一項佢從來未參加過嘅比賽項目,馬拉松,三個月後嘅波士頓馬拉松,世上最難嘅馬拉松賽事之一!Tim 從未參加過馬拉松單項賽事,但今次絕對係佢跌低之後能否企番起身再大步向前嘅關鍵時刻,基於大傷初愈 Tim 嘅目標係 Sub 3 而已,而佢之前 Ironman 226 游泳單車之後嘅全馬時間係 2:40 !但係唔好忘記佢條頸半年前斷咗,除咗個可怕嘅 Halo 光環只係三個月……!

2018年4月16日,史上最寒冷嘅波士頓馬拉松,好多選手都因為天氣不似預期成績大打折扣,甚至未能完賽,DNF!

Tim Don 以2:49:42秒完賽,快過佢預定嘅目標一大截! Tim ,welcome back!

鑽入你頭蓋骨嘅痛苦光環除去,Ironman 嘅冠軍光環等緊你去重套! Tim 喺佢斷頸嘅紀錄片 “Tim Don – The Man with the Halo“ 最後一段講番波士頓馬拉松嘅賽後感: “當我衝過拱門再回望終點線,我發覺我已經淚盈於眶,我深呼吸一口氣,頂你個肺冚家鈴,我掂嘞我返嚟嘞,斷頸你去死啦,KONA 我嚟嘞!”

原來跌低,爬起身無乜大不了,斷頸,好番,再殺過,先犀飛利!

Tim,see you in KONA!!!!

……我意思係我喺網絡 see you in KONA,我仲未有資格去比賽住,嘿嘿!

圖片來源: 網絡 及 Tim Don 官網

Tim Don – The Man with the Halo | Official Documentary

Fitz 連結: https://fitz.hk/?p=99062

更多:
Fitz Facebook專頁
[在陶波遇上墨菲] 新西蘭 IRONMAN TAUPO 賽後記!
人若然忘記了愛,忘掉同時間比賽……!
[新西蘭Taupo Full Ironman] 明明已經過226 點解仲要452?
[Ironman Cairns 226] 一切從狗噏開始……!
Fitz Triathlon 三項鐵人

廣告
雷彬冶文
老餅廣告人,資深美指。貪威識食,惡死睖瞪,腌臢腥悶,姣斯躉篤!熱愛運動,業餘中嘅業餘三鐵運動員,酷愛貪靚臭美程度至長期健身控制飲食,考埋 PT 教練牌!