[興渡 ‧ 虐志] You are what you play!! 台灣澎湖IRONMAN後記

中年，兩個字，啱啱十劃，可以有數不盡嘅同義詞!

中年係 “危機”，中年係 “發福”，中年係 “困惑”，中年係 “壓力”，中年亦可以係 “機遇”，中年可以係 “抉擇”，中年可以係 “希望”。

仲有，中年可以係 “挑戰”，可以係 ”轉變”，中年更可以係 “憨尻”!

中年嘅人生不應只係為咗房子、車子、孩子，更應該為咗身子，健康，見得下人，無大肚腩無雙下巴無脂肪密佈嘅身子! 因為只有好身子先可以捍衛房子車子孩子!

好多人把自己困在舒適圈 Comfort Zone，跑5公里覺得係極限，游兩個塘覺得係極限，黃泥涌道行上陽明山莊未上孖崗又覺得係極限，其實，邊鬼度有極限吖!

無視極限，無需極限!

白堊紀年代廣告界阿公創作嘅電訉廣告史路根，經 Leon 把口講出來: “ 要贏人，先要贏自己!”，阿公當時已屆中年，Leon 步入中年，有理由相信乃係自身感受夫子自道!

中年人一般標準運動係打手機打麻雀打 Online Game，打羽毛球打網球去下 Gym 已經好進取，打 Golf 行山已經係劇烈運動，而打 Golf 時甚至唔打 Golf 時必定唔知點解著 Polo Shirt 一定要反領，有理由相信係周潤發喺寒武紀時代網中人著袋鼠牌嘅不良潮流影響荼毒至今!

偏偏有一大班中年憨尻拖埋班年青少艾，山咁長水咁遠飛去台灣澎湖自取其虐，要挑戰自己嘅體能意志極限，花費半年每星期有四五日起早摸黑爭取時間練習，唔識游水練到善泳於海，跑少少就氣囉氣喘練到力氣雙全，舞唔掂兩個轆練到愛上兩個轆，希望一次過游足踩足跑足 226 公里，當一次名正言順嘅 IRONMAN!

2018年10月7號 05:00，MidageOn9 大隊五十幾人齊集 IRONMAN 澎湖賽事游泳起點 觀音亭，我本來今次只參加226接力賽負責跑步項目與及食花生打氣事宜，但因為負責游泳嘅隊友突然有事未能參賽，唯有自己頂硬上游埋佢，但其實我已經好耐無練過游泳長課，3.8公里當然游到無問題，但時間就……!

正當大家磨拳擦掌準備大顯身手之際，大會忽然宣報，由於風浪實在太大，游泳項目由3.8公里大刀闊斧改為400公尺! 現場反應有驚有喜，驚嘅係無咗3.4公里嘅游泳項目，就算完成到整個 Full IRONMAN 賽事都由226變成222.6，總有點兒覺得未景全功欠那3.4公里方成大器! 喜嘅係眼見咁大風浪如果真係要游足3.8，好大機會有好多選手未上岸已 DQ，壯志未酬已打柴! MidageOn9 大伙作最後互相打氣，然後永恆不變嘅一句: “終點見!” 呢個係我哋咁耐以嚟嘅傳統，無論邊個比賽不論幾多人參賽你幾快佢幾慢，我哋一定會全體人員等埋最後嗰個過終點線先至一齊離開!

07:00比賽正式開始，Rolling Start 滾動式幾個幾個下水踏上征途。幾百米嘅水話咁快游完，T1 轉項區內我發現我嘅接力隊伍係男子組別中前一批返嚟，將晶片腳帶交俾單車隊友之後我繼續同其他接力隊隊員為每一個進入 T1 嘅 MidageOn9 準 IRONMAN 打氣，直至最後一位院友鎖上 Lock 踏馳騁遠去，我同幾位游泳隊員先打道回府，佢哋換衫回到現場繼續打氣，我則換上跑步裝備準備前往 T2 轉項區，接棒跑最後一個全馬賽事!

時近正午，歹毒嘅陽光發揮佢磨人力量，但同時間大風又強得橫掃千軍，透過 IRONMAN Tracker App 可以睇到每一個隊友去到邊同 Pacing，好明顯陽光同強風蒸發緊大家嘅體力，但幾位最強橫嘅隊友調整過後好快又重新發力對抗烈陽強風。T2 接力區內十隊男子隊有三隊已經轉項，唯一一隊嚟自香港嘅我哋暫時排第四，只要我可以追上十分鐘前出發嘅第三嗰隊我哋就可以入三甲! 諗到呢到我登時覺得 Eliud Kipchoge 已經賜我力量，今次肯定 PB 勝出光宗耀祖嘞喂!

說時遲 那時快我隊友香港最靚仔單車教練已經完成單車項目進入 T2，將晶片腳帶交俾我之後馬上力歇倒地，我亦無暇顧及只拍一下佢肩膊就進入跑道搏命。開始五公里我睇住隻錶根據預定 Pacing 跑，去到第十公里我發覺我低估咗個太陽同啲風，烈日當頭不斷蒸發我自以爲強橫嘅體能，頂住強風跑好似同風神正面角力一樣，我開始保持唔到預計中嘅 Pacing，但不幸中之大幸我剛剛越過咗第三位嘅接力隊員，即係話三甲有望，虛榮心令我重燃鬥志。20公里，依然好熱好大風直情感覺喺一個放大嘅風筒裡面跑一樣，PB 應該已經離我漸去，但名次反而離我不遠 …… 如果我無數錯人的話!

32公里最後一圈，我唧埋最後幾分體力，回到預定 Pacing 抖擻精神戴番好副太陽眼鏡，準備好影相衝返終點。最後2公里經過紅黑拱門傍邊我見到我接力隊友已經喺度等我，兜一圈後進入最後直路踏上紅地毯，我同隊友終於衝過期待已久嘅紅黑拱門，You are an IRONMAN ，再一次震撼我心!

喺終點揼完骨 (無錯，每一次 IRONMAN 終點大會係會安排按摩服務嘅!) ，擦一大餐金瓜米粉，魯肉飯，苦瓜排骨湯同埋台啤之後，我哋返歸梳洗之後馬上返回終點繼續打氣及恭候所有院友完賽。院友們一個一個衝過拱門，有喜極而泣，有力盡倒地，有驚魂未定，直至最後一位院友上次喺新西蘭炒車大難不死而家肥逢敵手，今次終於以一身黑鏡粗金鏈 Hip Hop 造型衝過拱門，MidageOn9 全體九成九完賽!

心情平復返到 B&B 洗乾淨飲兩杯威士忌之後睇番 tracker ，証實女子接力我哋一隊第二一隊第三，而我同香港最靚仔教練嘅唯一一隊香港隊，喺男子接力組得第四!

玩三鐵咁耐從來無諗過可以攞獎踏上頒奬台，仲要係 IRONMAN 嘅海外賽事，感覺非常夢幻同興奮，興奮感覺一直過渡到領獎之後，不往呢幾年參與呢項虐志活動嘅辛苦!

同樣一班首次完成 IM 嘅院友亦非常享受呢份興奮，大半年嘅艱苦鍛練，衝過紅色拱門嗰剎那完全番晒嚟! 未景全功嘅無需灰心，運動係塵世間最最公平嘅事情，付出幾多收穫幾多完全正比，管你富二代有錢人或者上班族打工仔，頂多你架單車靚少少你對跑鞋輕少少，真正靠嘅依然係你流嘅汗受嘅傷經年累月嘅練習，無如果無僥倖無優勢，重點係不忘初心記得點解你要參加點解你要報名?

記住衝過紅黑拱門嗰份興奮同成就感， Keep 住佢過渡到下一次比賽，繼續虐志!

If you have a body, you can be an IRONMAN !!!

What’s Next? 下一轉打邊度?

Fitz連結: https://fitz.hk/?p=105276