12月底，包括意大利、西班牙多間媒體流傳一則消息，話「美國泳手菲比斯 (Michael Phelps) 宣佈將於2021年5月出戰美國 IRONMAN Tulsa」，其後呢宗新聞更傳至台灣體育網站，講到言之鑿鑿。不過，加拿大三鐵網站 Trialthon Magazine 證實消息為假新聞，令到唔少支持者失望。
菲比斯 (Michael Phelps) 自從2016年里約奧運退休之後，只係專注於佢嘅慈善事業，少有出現於大型運動賽事。所以，呢宗假新聞正係符合支持者嘅期望，亦因為咁，消息流傳甚廣。
「唔使跑步都可以試下」
話菲比斯轉玩三鐵，可能源自佢近年鍾意踩單車。據講，佢近年愛上室內單車，疫情期間仲添置訓練台，每個月踩足800公里。另外，佢仲持續鍛鍊體能，呢幾個月已經減咗成10公斤，所以話佢有計劃參加三鐵比賽，有一定說服力。
----- 廣告 Ad -----
在 Instagram 查看這則貼文
之但係，了解飛魚嘅朋友都表示，菲比斯轉玩三鐵機會唔大。因為菲比斯體格異於常人，身長腳短嘅佢，雙臂伸展達到201公分，比身高長8公分，但腿長只有81公分，所以連菲比斯都話，自己唔係陸上動物。而且佢喺2018年接受訪問時亦表示，對於參加三項鐵人興趣不大，因為佢好唔鍾意跑步，唔使跑先有得諗。
長期受情緒困擾
不過，菲比斯始終係美國體壇名宿，一舉一動都受到關注。除咗因為佢係史上拎得最多奧運金牌嘅泳手，亦因為佢嘅故事賺人熱淚。
菲比斯由於身裁特殊、耳仔大等問題，童年都受到同齡小朋友嘲笑，加上患有過度活躍症以及專注力失調，令佢長期出現情緒問題。成長後，菲比斯雖然喺泳壇發光發熱，不過情緒問題仍然伴隨，2012年倫敦奧運期間更有自毁傾向；2016年里約奧運退役後，更患上抑鬱症。
到2018年，菲比斯終於喺情緒困擾之中站起來，佢深深明白到「情緒係自我一部份」，並開始接受自己負面情緒，唔再強裝堅強，情緒大大改善。與此同時，菲比斯同時開始投身慈善事業，推廣精神健康。
所以，無論飛魚係咪參加三鐵比賽，佢都一樣咁激勵人心。
----- 廣告 Ad -----
