每一個三項鐵人運動員,不論業餘職業年齡國藉性別膚色攣直高矮,心裡面都經常縈繞住三個數字, 唔係三圍唔係八字唔係紅簿仔結餘,係2-2-6!

呢三個數字代表住一項好多人都覺得匪夷所思無無謂謂攞苦嚟辛嘅比賽, 你先要游泳3.8公里,再踩單車 180公里,最後先跑一個全馬42.195公里, 全長226公里, 呢個比賽同 Tony Stark 嘅外號一模一樣, 叫做 IRONMAN!

同好多香港中年人一樣,我係一個生於斯長於斯嘅典型香港仔,怕痛懶惰惡死睖瞪,貪威識食練精學懶,腌臢腥悶姣廝篤,30幾歲養出個大肚腩雙下巴,好在自慚形穢自覺樣衰40歲前痛定思痛甩掉幾十磅肥肉回復人貌,但都只不過係控制飲食努力舉鐵間中跑步消脂而已!

47歲被一班老友呃上馬用五個多小時拼盡老命完成人生第一隻全馬,從此我愛上跑步!

50歲誤入邪教戇居居跟大伙兒玩三鐵,盲摏摏打完 OD 打70.3再打埋 Half IRONMAN,半百有突大叔的確諗住行人止步莫過於此! 上環日本餐廳 Half IRONMAN 慶功夜 大伙起哄一齊報名打 FULL IRONMAN 226,我猶豫咗好耐,我怕我心懷壯志力有不逮丟人現眼,游3.8公里跑一個全馬我其實唔太擔心應該游刃有餘, 但天殺的180公里單車係我嘅死穴,我壓根兒唔可以想像踩百幾公里單車屁股會痛到點樣樣? 好似被人輪姦菊花七次咁? 連隊五晚麻辣火鍋火燒後欄咁? 對腳應該酸過酸梅軟過軟雪榚? 嗰一刻我真係其實冇乜信心可以順利完成!

阿甘 Forrest Gump (1994) 話過:「你不能隨心所欲擁有一切,但可以竭盡所能放膽一拼! You can’t have all you want, but you can give it all you’ve got!」

阿 Kim 姚劍峰 (MidageOn9) 話過 :唔難唔玩越難越玩玩到唔難咁至好玩,明知實做到有春好玩? Don’t Think Just Go,That’s On 9!」

於是我把心一橫報名參加一個我其實仲未有信心可以完成嘅比賽,一個我半生人無諗過會參加嘅艱難賽事!

往後半年 我同一班隊友整整用六個月時間,每週四至六次在水中,在單車上,在跑道上學習怎樣把迢長路遠嘅恐懼,轉化為夢寐以求嘅樂趣!當中過程罄竹難書,我哋快樂過勞累過痛苦過,抽筋過受傷過仆街過氣餒過,有人發過惡夢有人發過脾氣有人發過狼戾 ,流過汗水滴過眼淚想過退縮想過放棄,然後一起堅持然後一起克服然後一起征服!最後一節單車長課 翔東 180 之後,我心裏 15 個吊桶先開始冇咁七上八落,信心,開始返嚟嘞!

但老老實實無論成敗與否我根本無需要向任何人交代,反之以我知天命有突之齡完成唔到對大大大大大部份人嚟講其實大條道理甚至幾乎理所當然,但我堅信生有限 活無限,年齡唔應該係一個障礙,反而係一份推動力,蔡東豪先生曾經寫過 軀體係意志嘅奴隸,只要您意志夠強,就可以將佢駕馭!

我要以意志駕馭我嘅軀體,完成呢項聽落令人心力交瘁嘅賽事!

六月
賽事前幾日我與一眾隊友到達澳洲開恩兹 Cairns,放低行李我哋急不及待即刻走去第一個比賽場地及 T1 Palm Cove 海灘視察,一看之下大伙兒呆了半晌心往下沈,眼前嘅海灘好像上海灘般浪奔浪流萬里滔滔江水永不休,同我哋練習開嘅淺水灣幾乎係鄭秀文同劉嘉玲嘅分別! 但既來之則安之,去到呢個時候擔心經已係多 Q 餘! 砌返架單車跑咗一陣之後各自休息。第二日一早去會場及 T2 報到攞咗選手包之後,大家一齊開車又巡視一下單車賽道,一半平路一半斜路不斷上上落落 Rolling 似足鹿頸,都係果句擔心已經多Q餘,反而最怕係 澳洲出名歹毒嘅陽光,連續十幾個鐘頭暴曬喺陽光之下,好有可能未到終點已經曬到你油盡燈枯! But ,教主 Kim sir 都係果句, 咁踩快啲咪唔使曬囉! 的確,已經無得好驚無得好淆底,反之我非常期待比賽嘅來臨,我要好好享受呢場比賽,今時今日嘅我可能係18歲之後體能嘅高峰,我瘦咗一個碼,體脂只有 10%,呢場比賽我一定唔會勝出,但亦一定唔會輸,因為我已經認認真真戰勝自己,跳出 Comfort Zone,明知不可為而為之,而完成呢項比賽會係我人生嘅一份驕傲!

六月十一號 清晨 06:00
最後一次將必需品放在 T1 單車上,車呔打足氣檢查妥當後步行到游泳起點,穿着膠衣戴着泳帽嘅大家面上難掩興奮神色,吹水狗噏減輕緊張情緒,大家約好除非俾人趕上車 Cut Off, 否則絕不放棄! 大伙以路飛一般熱血嘅眼神互望然後碰一碰拳頭一齊衷心講一句 : 終點見!

07:45
令我哋黐纏戀後廢枕忘餐苦練半年嘅比賽正式開始,千幾人分批撲入海裏面向目標進發,接踵而來嘅大浪令大家舉步維艱,頭1.9K我哋要逆流而上,加上大浪浪費咗好多氣力飲左幾啖咸到不得之了嘅海水,波濤洶湧中好歹游完一半開始回程,順流而落加上海浪嘅推動游得舒服好多,終於我聽到喝采聲踏上海灘,衝過拱門冲洗一下海水一面除下膠衣慢跑去T1準備轉項,更衣換裝備同時爭取時間先呑下我預先準備嘅飯團,我知道我即將要面對全個賽事最辛苦嘅一部份,只要俾我喺 Cut Off 時間之前喺 T2 落到車,全馬我一定冇問題!懷着呢份信念我將單車推到起點,經過紅色地氈下嘅計時器之後,180K嘅苦悶旅程馬上開始!為免體力不支,我早已經盤算好每隔40公里就會停低1分鐘食飯團,中間再在車上食 Gel,AVI 要保持喺24-26, 咁就肯定可以喺10.5小時之內完成 游泳加單車去到 T2。

可能我平時有做善事有扶阿婆過馬路有買旗有助養孤兒,歹毒嘅太陽無出現,略陰乾爽嘅天氣係長途比賽嘅 Perfect Weather! 40K,80K,100K 過去,踩咗4個鐘頭我開始倦,腳頻開始降低,但前面仲有 80K我一定要捱埋佢,飯團已經食晒我食多包 Gel 經過補給站嘅時候再攞香蕉食,120K,150K 我已經踩過晒所有斜坡,仲有 30K 平路我就可以返到 T2 腳踏實地落地跑步,但連續踩左六個幾鐘頭之後我開始無力,但意志力話俾我聽係呢個時候絕對唔可以放棄,我食埋最後一條 Power Bar 最後一包 Gel ,用盡氣力低下頭向前踩,終於進入市區進入最後賽道,睇住個碼表我應該可以順利如時到達 T2 轉項區,心一寬力量開始返嚟腳下加陪用力,衝過計時紅地毯嗰一剎那我忍唔住向工作人員大叫: I made it!

換上跑鞋護膝開始最後一個環節 42.195K 嘅全馬,腳踏實地嘅感覺實在太好,大腿二頭肌好酸但未至於痛,應該無影響我嘅計劃,跑過起步點耳伴傳來熟悉嘅廣東話聲音,一班完成咗70.3賽事嘅隊友同 Supporting team 喺賽道傍為我打氣,精神馬上為之一振氣力又回歸三幾成!馬拉松賽道環繞開恩兹市中心 Esplanade 跑三圈每圈14K,賽道平坦完全無斜路相當好跑,我依住賽前計算每兩個水站飲少少水或者可樂增加咖啡因,每10公里食一包 Gel,好順利咁跑完兩圈,當中我超前番起碼六七十人,只要完成埋最後14公里我就可以完成整個賽事。但經過十幾小時不斷運動,我聽到我個肚餓到咕咕聲,沿途水站只有香蕉同 Gel 食,好在原來仲有 Power bar ,一啲都唔好食但無得選擇之一唯有照對! 排遣最後十幾公里嘅勞累,我左腦又開始同右腦傾計 :

「喂! 一陣間過終點記得記得幾大就幾大燒賣就燒賣,唔好同人一齊衝線,唔係啲相唔靚㗎!」
「嘩! 呢點不在話下啦吓嘛? 仲有仲有,過終點嗰剎那你話高舉雙手好吖? 舉單手好吖? 還是扮超人好呢?」
「癡孖根,咁遠嚟到,咁辛苦完成,梗係做晒佢啦!」
「吖屌,講真您又講得幾真!」
「嗱嗱嗱,就到就到,仲有最後1K,快啲執番好個 Look,準備衝線!」

自己同自己吹完一大輪水,開始跑入最後一條直路,終點在望,一大班隊友已經喺度歡呼,腎上腺數急升令我努力昂首挺胸跑上紅地毯進入會場,在夢寐以求期待已久嘅一句 “Welcome back Ben Lui from Hong Kong. You are an IRONMAN!” 伴隨之下,我終於跨過紅黑色拱門, 完成賽事, I am an IRONMAN!

完賽後我餓到喺 Finishing Point 食咗三條香腸一個麵包三杯可樂,先有力氣番出去同隊友會合,大家依然好興奮,一如慣例我哋一定等齊所有人過晒終點,先打道回府睡得死去活來!

Full IRONMAN 的確係一個好辛苦好艱難嘅賽事,但其實只要經過有規律嘅訓練,不斷學習不斷練習,決心恆心苦心專心加上意志力,要達成呢個目標絕對唔係不可能的任務,我哋 MidageOn9 隊員中有退役港隊泳將,退役單車手跨界練車學跑挑戰自己,有用數據計算一切覺得數據上佢無可能做唔到嘅中年大少,有一身英倫氣質腹有詩書氣自華年青公子不知不覺誤墮塵網中,有不善辭令但正直善良樂於助人嘅飛機工程師叔叔被大師兄呃咗上馬,有怕鬼又愛鬼又眼淺嘅少女,有返九放七四十有一嘅管理層職業女性,有名牌御用攝影師由肥頭耷耳善解人意練到出晒線條有胸有腹,有我呢條唔認老唔識死半百大叔,70.3隊員裡面更加有由唔識游水唔曉踩車開始嘅騰雞師奶仔,有想送份獨一無二生日禮物俾自己嘅地產高層,有躊躇滿志扮跛但一啲都唔跛嘅高手高手高高手,有游泳跑步踩車三項俱佳一心要做好成績嘅哥哥,有已經第三次打70.3就係欠一塊 IRONMAN 獎牌嘅大眾師母,全部都係普通不過嘅普通人唔係專業運動員,一樣要番工一樣要揾食一樣要憂柴憂米,半年間大家都喺密不透風嘅時間表裡面左揤右擠時間出嚟練車練水練跑練體能,最後我哋都完成咗一件好熱血好 On9 好值得懷念嘅事 ,此生此刻 永誌不忘! 亦証明咗邪教教主 Kim Iu 嘅惑眾妖言原來千真萬確!

「只要您肯付出心血時間,人人都可以係 IRONMAN!」

運動係最真實最公平嘅,打工會俾老闆壓榨,買樓要被迫買發水樓山旯旮仲要話係乜柒世外桃源乜之戀,做生意要頂住貴租官商勾結要受客戶烏氣,富二代可以扮創業扮乜手興家,高級富二代可以食爺飯著乸衣一世靠老豆然後教年輕人唔好去日本唔好換手機儲錢買樓,但運動係一分耕耘 一分收穫,家財萬貫頂多可以幫你買好啲嘅裝備,但落到塲都係靠自己嘅苦練,之所以我愛運動 ,因為係難得嘅公平!

Congrats to All MidageOn9 IRONMAN!

What’s Next?

MIDAGEONG Facebook 專頁

更多:
Fitz.hk Facebook專頁
[Ironman Cairns 226] 一切從狗噏開始……!
[IRONMAN Phuket 70.3] (1) IRONMAN 是一件很浪漫的事情!
巖巖巉巉蝦兵蟹將從忐忐忑忑到戰意高昂出戰 Ironman 70.3
[Road to Ironman – 番外篇] 鐵人 · 有愛!
Fitz Triathlon 三項鐵人

分享
雷彬冶文
老餅廣告人,資深美指。貪威識食,惡死睖瞪,腌臢腥悶,姣斯躉篤!熱愛運動,業餘中嘅業餘三鐵運動員,酷愛貪靚臭美程度至長期健身控制飲食,考埋 PT 教練牌!