Fitz > 運動 Sports > 三項鐵人 Triathlon > [IRONMAN Phuket 70.3] (2) 攞苦嚟辛自作自享受!

ironman-phuket-%e8%8b%a6%e8%be%9b%e8%87%aa%e4%bd%9c%e8%87%aa%e4%ba%ab%e5%8f%97a” Just because you believe in fate, doesn’t mean you don’t have to pursue. Happiness is not something you get simply by waiting ! ”

” 即使相信緣份,不等於不需要積極追求,畢竟幸福快樂從不光靠等待!” ( The Movie ~ Before Sunset 電影 ~ 日落巴黎 2004 )

上述文字套用於運動其實亦然,全馬,山賽,毅行者,Triathlon 113,226 甚至 IRONMAN 70.3,140.6,你總會聽過好多人周之無日嘰嘰趌趌話想試下參加想挑戰自己想突破體能極限,但馬上又自問自答話都係唔得嘞無時間練習無信心可以完賽乜乜物物,等下次等下年等下回等下世啦,然後又返去 happy hour 食宵夜周之無日浦成晚飲天光再攬住個肚腩話無時間練習人在江湖 身不由己等遲尐等得閑啲等乜等七之類之類!人世間最難說服嘅人係自己,最難說服自己嘅事情係 ……… 其 實 我 得!

ironman-phuket-%e8%8b%a6%e8%be%9b%e8%87%aa%e4%bd%9c%e8%87%aa%e4%ba%ab%e5%8f%972 ironman-phuket-%e8%8b%a6%e8%be%9b%e8%87%aa%e4%bd%9c%e8%87%aa%e4%ba%ab%e5%8f%971Phuket IRONMAN 70.3 比賽日 04 : 00

黑漆漆嘅夜空月明星稀,但餐廳裏面早已經人聲沸騰,大夥兒爭取最後機會補充能量,飽餐戰飯之後摸黑到轉項區作最後調整,替車軚充氣,把 Power gel 香蕉水樽,車衫車鞋車褲手套眼鏡頭盔跑鞋號碼布按先後順序放好適當位置,然後再檢查一次兩次三次!又然後根據謬菲定律,諗住會可能出現但又未必會出現嘅情況真係出現 ……,

” 仆街嘞!我條軚爆咗!但我冇帶後備軚,點算點算?”
” 有冇人見到 Philip sir?我條軚打唔到氣!”
” 冚家玲!我肚痛!”
” Kim Sir 有後備軚,返咗房攞!”
” 救命呀喂!我直情成架車唔見咗!”
” 頂!我又急屎添!”
” Anyone can tell me where is Philip Sir ? ”
” 感謝主多謝基督唔該如來佛祖,我搵返架車啦!”

05:45
所有問題迎刃而解或被拋諸腦後,大家落水試水溫,然後影相影相再影相!

06:00
一千六百幾人按自己預計完成游泳項目嘅時間,30分鐘35分鐘40分鐘45分鐘50分鐘+ 分組排好等候出發!苦練咗六個月終於等到開賽一刻,期待嘅興奮令大家腎上線素急升忘卻緊張,44 位隊友眼中發出 88 道火,心裡面只得一句說話 Let’s do this !! …….. 呢句我估嘅嘖!

ironman-phuket-%e8%8b%a6%e8%be%9b%e8%87%aa%e4%bd%9c%e8%87%aa%e4%ba%ab%e5%8f%975 ironman-phuket-%e8%8b%a6%e8%be%9b%e8%87%aa%e4%bd%9c%e8%87%aa%e4%ba%ab%e5%8f%973 ironman-phuket-%e8%8b%a6%e8%be%9b%e8%87%aa%e4%bd%9c%e8%87%aa%e4%ba%ab%e5%8f%974

ironman-phuket-%e8%8b%a6%e8%be%9b%e8%87%aa%e4%bd%9c%e8%87%aa%e4%ba%ab%e5%8f%97cover06:25
鐘聲響起!由專業運動員及亞洲精英運動員組揭開序幕,之後大家按組別四個四個跑落水開始 1.9 公里嘅賽程,千幾人撲晒落個海度,好似前世未游過水咁搏老命向前游個場面應該好壯觀好震撼 ………… 又係我估㗎咋 ! 我係水裡面一路向前游,只係見到我前面係人,左邊係人右邊係人,左邊嘅前後左右係人,右邊嘅前後左右都係人!我不斷俾人拍頭拍腳同拍屁股,我亦不斷拍人個頭拍人隻腳同拍人屁股,直到游咗六七百公尺之後,戰幔拉開先至好尐,但隨之而來嘅係大量肉眼睇唔到嘅水螆叮得我周身痕癢,但比賽途中除非係 杜鵑或者 Jessica Alba 咬我啫,否則我得鬼閑睬你!終於喺比我想像中暢順嘅情況之下游完上岸,睇下隻錶竟然比我預計時間快咗大嗱嗱 5 分鐘 …… 但就係因為睇下隻錶呢個動作唔記得擺 pose,我上水嘅所有相片都係影得非常之柒嘅,誠為本次比賽一大憾事!



ironman-phuket-%e8%8b%a6%e8%be%9b%e8%87%aa%e4%bd%9c%e8%87%aa%e4%ba%ab%e5%8f%976 ironman-phuket-%e8%8b%a6%e8%be%9b%e8%87%aa%e4%bd%9c%e8%87%aa%e4%ba%ab%e5%8f%977跑去轉項區換上單車衣服裝備,推架車去起跑點上車上 lock 鞋 ” ” 一聲鎖上腳踏,90 公里嘅賽程開始!沿途環境非常優美,今次賽事特別之處係去到 17 公里,所有人要落車抬架車上天橋去對面公路度再開始一直踩去機場再翻轉頭,賽程上落坡幅度唔算大,每次遇見隊友我哋都會互相勉勵加油,然後過咗佢或者比佢過咗!90 公里係一個話長唔長話短唔短嘅路程,自己一條友喺架單車上面,為咗排遣疲累與及令自已 keep 住 high,我唯有用自己嘅左腦同自己嘅右腦傾計吹水自製安多芬 ……….ironman-phuket-%e8%8b%a6%e8%be%9b%e8%87%aa%e4%bd%9c%e8%87%aa%e4%ba%ab%e5%8f%9711

ironman-phuket-%e8%8b%a6%e8%be%9b%e8%87%aa%e4%bd%9c%e8%87%aa%e4%ba%ab%e5%8f%9710” 你話吖,點解我要咁 L 辛苦呢?嚟布吉游下水曬下太陽咪好囉,真係戇九!”
” 喂喂喂,前面條肥婆明明肥過我重過我點解會踩得快過我?唔通撞鬼?白日見肥鬼?”
” 見唔見到?聞唔聞到?前面有檔魚蛋粉好香喎好想食呀!”
” 掂嘞掂嘞!60K 嘞!仲有 30 仲有 30!”
” 喂,有人影相喎,揸番 Aero bar 擺番個 pose 先!”
” 又到天橋!落車抬車順便鬆下對腳,終點在望嘞喂!”
” 咦咦,前面條女個屁股好靚喎,嘩屌!差啲抄車!專心!”
” 迴旋處迴旋處啦!到啦到啦!”



ironman-phuket-%e8%8b%a6%e8%be%9b%e8%87%aa%e4%bd%9c%e8%87%aa%e4%ba%ab%e5%8f%9712 ironman-phuket-%e8%8b%a6%e8%be%9b%e8%87%aa%e4%bd%9c%e8%87%aa%e4%ba%ab%e5%8f%978 ironman-phuket-%e8%8b%a6%e8%be%9b%e8%87%aa%e4%bd%9c%e8%87%aa%e4%ba%ab%e5%8f%979全靠呢份精神分裂嘅多重人格交叉自我對話,90 公里順利完成!

唔知幾時幾日喺邊處邊度睇過定聽人講過,三項鐵人裏面游泳係熱身,單車係過程,真正嘅比賽其實喺最後半馬先見真章!

時近中午氣溫開始升高,換過跑鞋食埋最後一包 Power candy ,食多隻蕉開始踏上跑道,頭 5 公里我盡量放鬆雙腿適應番跑步嘅節奏,炎熱嘅氣溫令我嘅體力一點一滴隨住汗水慢慢消失,但意志力令我撐住撐住再撐住,我知道如果我選擇開始步行就再跑唔番起,於是我用咗一個塵世間雄性動物最有效嘅方法去刺激自己嘅意志 ……..「目及」女!
ironman-phuket-%e8%8b%a6%e8%be%9b%e8%87%aa%e4%bd%9c%e8%87%aa%e4%ba%ab%e5%8f%9713 ironman-phuket-%e8%8b%a6%e8%be%9b%e8%87%aa%e4%bd%9c%e8%87%aa%e4%ba%ab%e5%8f%9715 ironman-phuket-%e8%8b%a6%e8%be%9b%e8%87%aa%e4%bd%9c%e8%87%aa%e4%ba%ab%e5%8f%9716我努力向前望,盡量去搵一啲美麗嘅背影,後面睇都玲瓏浮突黃蜂腰曱甴肚靚囉柚嘅身材,然後努力追上去,望兩眼之後再向前揾下一個目標,呢個方法非常有效,我抵抗住酷熱抵抗住疲累,捱到最後一個已經無水得番飲到想嘔嘅電解質飲料水站,然後根據師父教落整頓衣衫戴番好太陽眼鏡,準備過終點!最後100公尺,Ironman 紅黑雙色嘅拱門等待住我,紅地毯就喺我前面十步之遙 ……..
ironman-phuket-%e8%8b%a6%e8%be%9b%e8%87%aa%e4%bd%9c%e8%87%aa%e4%ba%ab%e5%8f%97_17

ironman-phuket-%e8%8b%a6%e8%be%9b%e8%87%aa%e4%bd%9c%e8%87%aa%e4%ba%ab%e5%8f%9714 ironman-phuket-%e8%8b%a6%e8%be%9b%e8%87%aa%e4%bd%9c%e8%87%aa%e4%ba%ab%e5%8f%9718呢個冬天呢個嚴熱嘅布吉島,呢片海洋呢條賽道,我流過汗抽過筋喘過氣想過放棄,我努力過盡力過盡情過興奮過,我喺終點前儘最後一絲氣力高舉雙手 Chok 住個 look ,仰望睛天用自以爲最型嘅步伐昂首衝線!係努力係好彩係成就,我知道我克服咗一個難關,我認識自己又多一點!我終於又跨過了一條終點線,而人生,就係要跨過一條又一條嘅終點線!我終於完成咗 IRONMAN 70.3 嘅賽事!ironman-phuket-%e8%8b%a6%e8%be%9b%e8%87%aa%e4%bd%9c%e8%87%aa%e4%ba%ab%e5%8f%9719一如既往完賽後我哋並無各自無離開場地,而係等待每位隊員一個一個咁返嚟,直至最後一位偉大嘅隊員,我哋全體精神病院友企喺台上面,高聲歡呼吶喊恭迎佢完成賽事歸來為止!

2016 年 11 月 27 日,我哋 44 位隊友同其餘千多位參賽者一齊完成咗 布吉 IRONMAN 70.3 嘅賽事,44 人無人可以企到上頒獎台無人入到三甲頭十名,但 同其餘千幾位完賽選手一樣,千幾位都係 Winner!

您係 Winner,因為您坐言起行參加比賽,可以肯定每一位喺起點準備飛身撲落海度嘅選手,都下過苦功!您攞唔到任何獎牌,但您已經贏晒唔敢報名嘅人!

您係 Winner,您完成咗 70.3 英里嘅賽事,相等於 113 公里!70.3 英里有幾遠?無乜人想像到但總之幾 Q 遠,遠過尖沙咀去羅湖再返番去尖沙咀,咁 Q 遠都完成到,仲唔係 Winner ?

您係 Winner,因為您激發咗自己嘅潛能,您以為您只識游或者只識踩或者只識跑,最後您全部一一完成晒,呢種感覺好神奇,您無需同人比較,因為您贏咗自己!

您係 Winner,因為您唔理會勸阻您唔好參加嘅人 ……..

” 您一把年紀 / 您女仔之家 / 您文質彬彬 / 您乜乜 / 您物物,咁辛苦做乜吖?打下 Golf 咪算囉!”

對呢類人仕正如古語有云,夏蟲不能語冰,笑笑口講句嘿嘿或者呵呵就算!

ironman-phuket-%e8%8b%a6%e8%be%9b%e8%87%aa%e4%bd%9c%e8%87%aa%e4%ba%ab%e5%8f%9720IRONMAN 的確係一項好辛苦嘅運動,但正因為辛苦,當您征服咗佢先享受到真正嘅樂趣!正如跑馬地某著名教練 姚劍X 又名 姚X峰嘅名言 ” 明知實完成到嘅比賽,打嚟做乜?”

又拾蔡東豪先生牙慧,IRONMAN 係一塲心理同生理互片互鬥嘅競賽,三成心理足以戰勝七成生理!Mind-Over-Body-Over-Mind !

下場 Full IRONMAN 140.6 再見!

( 您估,完未?)

Photo credit:Mr. Michael Pigskin and Mr.Jack Ah Beh

Ironman 70.3 Thailand 官方網站

更多:
Fitz.hk Facebook專頁
[IRONMAN Phuket 70.3] (1) IRONMAN 是一件很浪漫的事情!
巖巖巉巉蝦兵蟹將從忐忐忑忑到戰意高昂出戰 Ironman 70.3
[Road to Ironman – 番外篇] 鐵人 · 有愛!
Fitz Triathlon 三項鐵人

本文屬作者意見,不代表Fitz立場。


文章為作者意見,不代表Fitz立場。