烈陽與打風落雨二揀一，大家會揀邊一種天氣去浪漫跑呢？
呢個問題就等於女朋友問你，佢同你阿媽跌落海救邊個先一樣咁難答，或者會有師兄答不如一槍打死我把啦。
剛過去的星期六颱風<彩虹>打到黎，天文台掛左三號波。香港橫風橫雨，好似好有料到。而我一個人在星巴克享受緊發呆既下午，嘆緊咖啡。望住窗外狂風大雨，有人趕住避雨，有人被風吹到反雨遮，仲見到有班人好瘋癲踢波。
我回想起十零歲，不論烈陽同打風，都會走落街同朋友踼波，果種熱情真係嚇死人。但打風落雨，亦係最考你技巧及基本功。雨中點樣控球，傳球，射波準繩度。。。惡劣嘅環境更加可以將球技練得勁啲。加上落雨踼波真係笑料百出，係一班老死最開心嘅相聚時間。
言歸正傳，趁呢個難得機會好想打大風去跑一轉，畢竟對上次掛8號波時，想跑出去感受下被風雨虐待嘅感覺都唔得，直到我跑完都完全冇風冇雨就登陸左，都以為今年冇機會喺打風之下跑。所以更加要抓緊今年最後打風嘅機會。星期日立即换上跑衫跑鞋，就飛落街跑。
一落到樓下，見到狂風狂雨，唔知點解有種好興奮又有啲驚既感覺。大雨中跑其實同烈陽嘅裝備一樣，都會照樣會戴太陽帽同太陽鏡，唔想比雨水打到眼都睜唔開或吹到塵入眼，唯獨是手提電話要袋入密實袋比較麻煩。
----- 廣告 Ad -----
相對烈陽，打風落雨慢跑，望到的風景同感覺完全不一樣:
- 汗水，雨水，甚至乎淚水都混雜一起，感覺唔到身上有被黏著嘅感覺。
- 感受強風吹嘅在身上，風聲呼呼，有點恐怖卻有清爽嘅感覺。
- 享受雨水打在皮膚上嘅觸感。
- 望上天見到雲嘅移動速度，有時開左快鏡咁，有時又好似定格左。就好似時間停頓左，突然又走得很快。
- 大風吹到啲樹搖擺不定，樹葉被吹得漫天飛舞，好似櫻花掉下嘅感覺。
- 聽住跑鞋同地下積水發出嘅聲音，感受雨中跑的每一步。
- 因為落大雨街上冇太多人嘅關係，可以盡情大聲唱歌及狂叫。
- 享受路邊被一潭死水，經過被車濺起後變做瀑布咁，由頭淋到落腳。 (好似幾痴線)
好喜歡帶住帽望出去嘅景觀
做人要堅強啲嘛, 你睇!成pat野撻喺度似乜啫。黎，等我幫下你啦。 – 取自重慶森林對白
跑果時冇設定跑幾多或步速幾多，盡量享受橫風横雨跑嘅感覺，跑到唔想跑就打道回府。因為會跑經西沙路同清水灣道路段，地下好多比強風吹倒嘅大小樹枝，要經常望住個地下跑，如果小心踩中會好易整傷腳。而且更要留意有沒有其他東西吹埋黎或突然冧樹，集中力比平常時間還要高很多。
跑步群好多師兄師姐都無因風雨而減退跑步熱情，各人都把握機會去走一轉。大家試回想一下以前嘅自己都有好多藉口唔跑，而又試想下呢家有咩原因令你有咁嘅轉變。
其實人往往在最惡劣既環境低下，先會體現及鍛鍊到自己嘅堅持及意志力，但最重要係任何時候都要好好準備好自己，隨時面對惡劣環境殺到埋身。在平穩時間唔好安於現狀，好好裝備自己，去迎接每一次突如其來嘅人生高山低谷。
人類對環境既適應力能好強，問題在於自己肯唔肯改變。既然你不能改變外在環境，可以做的就係改變自己、去適應、去跨越、去克服佢，變做比以前更不一樣的自己。咁先可以充份發揮自己既才能與激發內在潛能，當你回頭一看，原來自己既能力比自己所想更高。如果困住舒適圈唔走出黎，就永遠都進步唔到。
----- 廣告 Ad -----
星星將自己放在太陽旁邊, 就不會感覺到自己嘅存在。只有置身在黑暗中, 才會看得清楚自己發出的光芒。
每個練習跑步嘅人, 在過程都會苦惱著、歇斯底里著、痛苦著, 會不斷地掙扎數個月嘅時間, 但呢一切會在未來某一瞬間得到回報。
當我跑上澳景路頂時，正直刮起大風，吹到帽都甩咁滯，而電話隨即播放了周杰倫嘅 <龍捲風>
「後知後覺。。。我跟了這節奏。。。」
或許，我們都是被那個瞬間迷住的一種無可救藥的跑者吧。
更多：
Fitz.hk Facebook專頁
[鋼鐵之意志] 渣馬令我決心有「砍掉重練」的勇氣—醒悟後篇
[鋼鐵之意志] 渣馬令我決心有「砍掉重練」的勇氣—激鬥前篇
[鋼鐵之意志] 渣馬令我決心有「砍掉重練」的勇氣—斷筋中篇
沙灘@Fitz.hk
Fitz Running 跑步
