Fitz > 運動 Sports > 跑步 Running > [鋼鐵之意志] 渣馬令我決心有「砍掉重練」的勇氣—激鬥前篇

 

踏入九月份,跑季已經開始,好多師兄師姐都開始積極操練,準備迎接排山倒海般嘅比賽。
每年最多人參與,亦係最多人想復仇嘅渣打馬拉松又就黎開始報名。
好多跑友都有優先報名,而這些機會當然不屬於我的啦。
去屆嘅渣馬慘痛經歷,提起都覺得自己非常陰公豬,過左八個月都仍然猶有餘悸。。。
我身邊的同事、朋友、屋企人都見我最近呢大半年,唔係晨跑就係放假由朝跑到晚,唔長嘅都唔跑。其實我有呢個轉變,事源要由 2015.1.25 渣馬 [血滴子] 事件開始。鋼鐵之意志1 01小弟我已經跑過5年半馬,那段時間經常練習,所以完成時間都尚算不俗。但發覺開始悶到發慌,再咁落去相信我會對跑步生厭 (可能連追巴士都憎)。所以就報左2014年初馬試一試。我好大膽報左全馬,亦都大膽到比賽前都係零練習,當然唔練嘅藉口頗多:

  • 食完飯太飽都不適宜,等等下就到訓覺時間,算啦跑乜鬼吖。
  • 放工太攰啦,身體唔攰個腦都攰,由佢啦。
  • 天氣太凍啦,寒風凜冽,都係唔落樓啦。
  • 跑完太夜返屋企,第二朝又要早起身返工,訓多兩粒鐘仲好啦。

以上咁多所謂既原因, 我想大部份跑友都有經歷過,都源於一個字–懶!果時過左一段極度頹廢嘅日子,完全零運動。到比賽當日,知道自己冇可能跑得快,所以用蝸牛速以5小時15分鐘輕鬆完成,跑得晒都可以話奇蹟咁滯,而且拿左我人生第一個全馬完賽牌。鋼鐵之意志1 03上過全馬嘅朋友應該好明白,跑左一次就會對全馬上癮,咁無理由去跑返半馬咁有趣架嘛(呢個我自己咁諗啫。。。) 。所以我就決定報2015渣打全馬,同埋積極練習,睇下自己可以進步到邊。到比賽當日,極度天真的我以為可以跑個十科 (sub 4) 出黎。恃住自己有練習,開頭因被人帶快,跑得好順而冇跟自己Pacing跑,快左咪快左,反正冇乜異樣就順住個勢冚冚聲咁去,首30K都係比我預計時間快左。點知到西隧入口前,大約32公里,出現左以下嚴重事故:

  1. 西隧前有人放左D熊本蕃茄比跑手食 ( 唔記得邊位跑友講過,話一定要食,好好味喎)。當我落手去拎黎食時,眼尾望到自己心口。。。點解紅左兩點既?? 我明明未咬粒茄,D汁冇理由隔空彈左落身度喎,仲要兵分兩路彈落去咁趣緻? 果刻先知道,原來係俾件衫磨損乳頭位置,應該係件衫濕左太重關係,而D血係咁標,但我完全感覺唔到痛,而且都係我跑咁多年冇試過的。
  2. 對腳分別大腿,小腿,大脾內側,腳趾等等。。。所有你講得出有肌肉、有筋既位置都輪住黎抽筋。拉四頭肌,就Hamstring 抽、拉Hamstring 就四頭肌抽,小腿位一樣,總之拉前就抽後,梅花間竹咁。。。呢幾條古惑的筋搞到極度不安! 就算之前有食過KFC D鹽、係咁拎松節油搽都亳無作用。

呢個情況都幾惡搞下,但我都要保持住正常跑姿去沖去鏡頭影多D相。究竟我由得條筋不斷抽來也抽去地照跑,定衰仔到選擇要上巴士呢。。。果刻真係人生交叉點。鋼鐵之意志1 02<下回預告> 嗚呀。。。不要再說了!!

更多:
Fitz.hk Facebook專頁
[鋼鐵之意志] 渣馬令我決心有「砍掉重練」的勇氣—斷筋中篇
[鋼鐵之意志] 渣馬令我決心有「砍掉重練」的勇氣—醒悟後篇
沙灘@Fitz.hk
Fitz Running 跑步


文章為作者意見,不代表Fitz立場。