[Sportential 運動潛能] 攀石傷乜勁? (二)

續上篇《[Sportential 運動潛能] 攀石傷乜勁?》

日本攀石選手 Akiyo Noguchi 野口 啓代

除咗手指，由於攀石都係上肢＋過頭運動，膊頭就係第二常見嘅常見嘅受傷部位。應該都唔少人試過舉手痛、膊頭不舉甚至乎甩骹。今日到淺談膊頭常見問題。

其實有乜傷?

雖然膊頭傷咗大家都淨係識得講痛 (或者爬唔到石)，但其實同手指一樣，係有好多唔同而常見嘅情況可以出現：

1. 夾擊綜合症 (External Impingement Syndrome)
2. 二頭肌長頭嘅筋問題 (Biceps Tendon Disruption)
3. 爛軟骨 (SLAP lesion/ Dislocation associated labrum lesion)
4. 甩骹 (Shoulder Dislocation）

淨係睇名都知，佢哋有唔同嘅嚴重性：簡單嘅，純粹保守治療都處理到；嚴重嘅，就要做手術先搞得掂！ 由於爬石係長時間嘅過頭、大負荷運動，上述有3樣都係過度使用而引致嘅問題 (頭3個)；而且全部都會因為姿勢而引致/惡化問題。

頭兩種都應該係最常見，而且受傷結構嘅種類好相似：

1. 肌鍵（旋轉肌、二頭肌長頭、胸小肌(攀石專屬))
   • 肌肉駁落骨嘅結構
2. 滑囊
   • 減低組織間摩擦力嘅結構

呢兩種結構，通常要傷就一齊傷，因為：

• 如果肌鍵受傷：膊頭會無咁穩陣，偏離中間點 (Decrease Concentricity)，令其他結構嘅壓力／工作量會增加 (包括滑囊，因為會夾得勁啲）
• 如果滑囊受傷：由於緩衝效果減低，肌鍵所受嘅壓力會增加。

簡單嚟講，即是攬著一齊死!

呢類型嘅受傷 (如果單純考慮結構)，一般需要六至十二個星期康復 (肌鍵尤其慢!)。但最阻礙康復/引發問題，好多時都係因為 ：

1. 姿勢差：跌膊 (Drooping Shoulder)、寒背 (Kyhphotic Back)
2. 肌肉失平衡：之前都講過肌肉需要平衡 (睇返之前)，膊頭入面嘅旋轉肌 (Rotator Cuff) 尤其容易失衡 (Instragram會講啊～)
3. 技巧差問題：e.g. 攀石時，長期放鬆哂肩胛骨吊著個人；極多對撐 (Bridging) 動作，但其實唔夠力
4. 訓練過量： 由於上述結構對穩定性好重要，所以當過度訓練，又或者進行大量而高強度嘅訓練，會令小肌肉疲勞 (睇返之前膊頭痛文章)，減低穩定性

至於爛軟骨，就最少12個星期 (因為骨，仲要少血到)；如果爛得勁啲，而你又想繼續上肢運動，基本上就做手術先得。甩骹就因應唔同情況唔同處理 (遲下講)，如果你係後生而好 active，又或者爛咗一定程度嘅骨，又或者成日甩，咁你都係做手術啦!

睇咗咁多個問題，發現最少都要休息6個星期，咁仲得了嘅?! 即是咁：

1. 鬼叫你係人類，生理上嘅修服速度就係咁! (打麻醉葯就可以即刻唔痛啦)
2. 唔係 6 星期後先郁，而因應情況，運動員都要適當地做復康運動 (e.g. 重新學習肩胛骨控制、練習較弱肌群)
3. 除咗直接玩嗰樣運動，仲有好多體能可以練 (e.g. 全身爆發力)。而且長時間嘅訓練，亦需要“交替訓練” (Cross Training)，可以減少慢性傷患，亦可以保持體能，更會運用到平時較少用到嘅動作

其實好多時問題嘅出現，都係因為姿勢問題，或者技術問題。與其帶著個計時炸彈做運動，不如的起心肝改好哂啲問題。到有朝一日，問題積累咗好幾年，你就唔好幻想 6 個星期就好得返!

Reference:

1. Chang CY, Torriani M, Huang AJ. Rock Climbing Injuries: Acute and Chronic Repetitive Trauma. Curr Probl Diagn Radiol [Internet]. 2016;45(3):205–14.
2. Schöffl V, Schneider H, Küpper T. Coracoid impingement syndrome due to intensive rock climbing training. Wilderness Environ Med [Internet]. 2011;22(2):126–9.

原文載於 Sportential 運動潛能資訊
Sportential 運動潛能資訊 Facebook 專頁