[Translantau 25K入門版] 低端男遇好人好事

由

2018-03-08

Fitz > 運動 Sports > 跑步 Running > [Translantau 25K入門版] 低端男遇好人好事

那些 Ultra 嘜嘜，Trans 襪襪，從來不會放進低端男的購物籃。等於嘉倩 BB 是心中的女神，但你唔會去 date 佢，因為你認識自己。就是這堵心理和物理的牆，分隔開兩個世界。

當見到 Translantau 除了100K和50K外，竟然有個25K入門版，外星豪門賽事為低端社群打開一扇門。一份挑戰，半點虛榮，就上繳了450元。

不過人總會為虛榮付出代價!

攞你命16K

頭16K由梅窩銀礦廣場起步，朝拾塱村逆走鳳徑12段，接芝麻灣道、沿芝麻灣郊遊徑，經龍尾、大浪、望東灣，直跑到近拾塱營地的CP2。對低端男來說，這是攞命16K，全段雖上落幅道不大，最高爬升約180米(不是累計爬升)，不過由於平坦，大家都當路跑喪走。分別是他們喪得起，我喪唔起!

10K是低端男人生極限，要不停跑16K，副偈不停發出投訴，有幾K是帶住膝痛，有幾K小腿肉震震咁話俾我聽想抽想抽，我當然聽到，但無睬佢。跑到11，12K，竟然覺得眼瞓，搞邊科? 再跑落去會唔會出現嘉倩 BB 和我一起跑 – 的幻覺? 連忙在小背心找包含咖啡因的 gel，包 gel 交到戲，堅有嘉伯仙奴味! 個人慢慢醒番，體力回歸。

途中遇上一名男跑手站在路旁，好像很不舒服，一問之下，他全身乏力，極之疲憊，相信是缺糖，於是給了他數粒鹽糖和得X素。跑了一段，被一名穿起 triathlon 背心的跑手越過，覺得正常不過。但沒多久，我又追及他，原來他扭傷了，一柺一柺仍堅持跑下去，真鐵人! 叫一聲C兄保重，繼續上路。

To 執 or not to 執眼鏡?

好不辛苦用了兩小時跑到 CP2，時間滿意。即刻補水食蕉開 pole。大鑊! 我副眼鏡呢? 剛才戴著眼鏡跑時，鏡片混著汗水和霞氣，弄到模糊一片，索性不戴了，順手把眼鏡放進前面的小袋中，極可能是跑步時掉失了。好唔好回頭搵? 又來到人生交叉點!

即刻打開左腦理性分析，我遠視，沒有眼鏡，跑山有少許危險；眼鏡配了不夠兩個月，也要二、三千元，肉痛X心痛X2；要花時間去配，空鏡期，要用舊眼鏡，但度數已不準確，影響日常生活。

不過尋鏡之旅，在那裡丟失豪無頭緒，也未必看得見。回頭，漫長而痛苦的16K，未敢回憶，不想再見。而且比賽中，回頭即是剪帶，要完成一個 transXXX 的初心，就此「卜勤」左。呢點最強烈，我會加權，於是決定同眼鏡斷捨離，空鏡上路，完成最後的9K。

收拾心情，打開了兩枝 pole 準備出發。就在此時，有位高大的年青跑手來到 check point，手持一副眼鏡，欲交給工作人員，正是我難捨難離的眼鏡。一個箭步上前認領，失而復得當然高興，最令我滾動的，是想到這位年青人，在路上見到掉在地上的眼鏡，對於他，沒有絲毫價值，但他估計可能是跑手遺失的，停下腳步，拾起來拿在手裡，不知跑了多少K來到 check point 交給大會，只希望尋回物主。道謝後，我用紙巾抹抹鏡片，戴上眼鏡，看見一份善和美!

打大佬白甲變黑甲

剩餘的9K是打大佬，登大牛湖頂，最高爬升254米，雖不算大茶飯，但對跑了16K而小腿欲抽還抽的低端男，是另一嚴峻的考驗! 初段石級頗高，舉腳為艱，幸好有杖協助，再啪多一包gel，一級一級攀登。

後段有上有落，但四頭肌和小腿在顫動，幾下去到老抽邊緣，我知只要一開始抽，跟著便停不了，沒可能完成賽事。只能減慢速度，走平路時也多倚賴杖支撐。無意中踢中幾次石頭，左腳指公和右腳二指，隱隱作痛，應該已壯烈變成黑甲，必定受其他8隻白甲歧視和排斥!

最後還差3K，差不多全是路跑，看看錶，目前用了3小時零5分，希望3小時30分前跑到終點，咁會有獎咩? 梗係冇啦你傻B嗎! 咁點解要定3小時30分前完成? 對於低端社群，上凸台攞獎不會是他們的動力，因為太過假，入唔到戲。我們會自設一個目標，達到了便當贏，會獎勵自己叫杯紅豆冰加球雪糕慶祝。想到這裡，腳步加速再俾油，雖則雙腳已經「乸晒口面」，但為杯雪糕紅豆冰，乜嘢事做唔出!

結果3小時24分過終點! Yea! (嗱，唔准問排名!)

但雙腳堅喺嬲左我，坐了十分鐘仍然站不起來，唯有拉拉筋幫佢按摩一輪再好言相勸幾句，加發毒誓以後唔再跑 TransXXX，佢至肯起身去攞啲嘢食同影「畢業相」。

影相時，友人聽見身旁有位男跑手說起剛才比賽期間，突然抽筋，幸得經過的一位女跑手停下來，幫他噴幾下撤X巴X的止痛噴劑，助他恢復，才可以完成比賽。稍後友入更衣室換衫 (對，是更衣室，仲要有暖水花灑沖身，因為附近有座…..，都係唔劇透啦，自己 google 下)，她聽到隔鄰有位女跑手說比賽時，遇到一位男仔抽筋，咁啱有帶止痛噴劑幫佢療理，但不知他之後可否繼續比賽?

世事嘅嘢，真係識條鐵咩!

Fitz連結：https://fitz.hk/?p=89012