朋友知道我有寫開健康飲食嘅文章，好多時都專登send啲文畀我參考，不過好多時，嗰啲「這種食物喚醒了一億人！」、「超簡單！原來這東西令人健康」嘅文章，難分難假，一個唔小心真係會畀佢呃到。
早兩日，有人傳咗篇《全球十大「垃圾」食物》嘅文俾我，話世界衛生組織公佈咗十大垃圾食物，包括油炸類食品、腌製類食品、燒烤類食品等等等。但文章只係得簡單分類及描述，完全無一啲具科學性嘅分析同研究。（我為求唔好再妖言惑眾，特登唔落link，有圖自己睇）
呢篇文畀WHO一口否定咗，大家咪當真呀。
----- 廣告 Ad -----
睇完之後，已經覺得篇文章好熟口面，諗住查下佢嘅出處，點知一查之下，發覺呢篇文竟然喺大陸被流傳咗12年，而內地新浪網呢個月仲有專題報道《世衛組織：十大垃圾食品名單純屬子虛烏有》。即係話，呢篇潮文流傳咁多年，最近先被人推翻，可見禍害之深。
講番新浪網嘅報道，佢直接向世界衛生組織（WHO）求證文章真偽，WHO一口否認出過咩垃圾食物嘅指引。
咁呢單嘢其實已經可以掉落垃圾桶，不過記得有位營養師講過咩係垃圾食物，佢話：
「任何食物都有營養，呢個世界無垃圾食物，只係有唔好嘅飲食習慣，令到食物食咗落肚，做成垃圾！」
呢句說話我又唔認同得晒，始終有啲食物，我都將佢列作垃圾級別。不過，飲食習慣有時真係重要過食物質素，食物無論幾有營養都好，都應要適可而止，飲食均衡先係皇道呀！
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。