有人話，《衝上雲霄2》呢套劇，似係飲品廣告多過劇集。
那些年，電視做緊Cool魔同法拉，嗰時劇集入面，個個機師同空姐係唔係都拎住支Vitaminwater，原來嗰時呢種飲品已經喺美國惹起爭議。
根據《福布斯》嘅報道，2011年呢種飲品喺美國推出一系列廣告，口號係「vitamins + water = all you need」（維他命+水 = 一切你所需），唔少醫學及飲食營養嘅專業人員提出質疑。其中美國全國消費者聯盟（National Consumers League），更向美國國會投訴。Business Insider報道，喺2014年，另一個自願組織Truth In Advertising (TINA.org)，入稟法庭，要求向消費者賠償120萬美金。該組織話，如果勝訴就會將賠償賠畀覺得自己被誤導嘅消費者（按：大家咪開心住，要賠都係賠畀美國消費者啦）。值得一提，TINA呢個組織一啲都唔嘢小，佢哋以Red Bull「送你一對翼」嘅口號，成功令Red Bull要賠償1.3千萬美金！
Vitaminwater係可口可樂旗下產品，有時樹大招風並唔出奇。不過從營養學角度嚟講，呢種飲品又係咪好似個名咁，又有維他命，又有水，而屬於健康飲品呢？健康飲食網站Authority Nutrition就列出Vitaminwater有5大壞處，可綜合為兩方面：
1. 糖份過多
根據AN嘅數字，一樽591毫升嘅Vitaminwater含有120卡路里，以及32克糖。（我喺香港買嘅500毫升樽裝Vitaminwater，標韱話含90卡及22克糖。）呢個含糖量佔可口可樂50%。不過，美國嘅Vitaminwater話佢包含果糖及蔗糖。而呢兩種糖對身體更為有害。（香港嘅標韱法例比美國寬鬆，所以香港嘅Vitaminwater只寫含有「白糖」，即係唔知係咩糖。）
而更加要注意嘅係，Vitaminwater雖比可樂含糖較少，但飲品為咗要較易入口，就要加入更多嘅人造代糖。而根據醫學研究，人造代糖更係兒童糖尿病、心臟病、癡肥等疾病嘅主要元兇。
美國某些醫學報告已有定論話，含糖過量嘅飲品，係導致癡肥嘅元兇。
----- 廣告 Ad -----
2. 過多維他命
營養素過多其實亦是一健康問題。Vitaminwater指其飲品含有維他命B雜以及維他命C，多項醫學報告指，喺眾多研究入面，都唔會有人會缺乏呢兩種維他命。即係話，從日常飲食都可以吸收足夠嘅維他命B同C。而過多嘅營養素，例如某些礦物質，以及維他命A同E，係唔可以身體自然咁排出體外，佢哋積聚喺身體會造成唔同嘅疾病。所以，飲一啲含有維他命嘅飲品，其實未必對身體有益。
不過，呢單新聞我覺最令人深刻嘅地方，就係可口可樂公司向公眾嘅回應，佢哋話：「no reasonable person would be misled into thinking that Vitaminwater was a healthy beverage」（譯：普通人係唔會聯想到Vitaminwater係一種健康飲品）。OK！明白晒！菠蘿包無菠蘿，西多士無屎，我哋消費者一早明白啦！
美國ABC電視台嘅2分鐘專題報道：
資料來源：forbes.com、authoritynutrition.com、businessinsider.com
----- 廣告 Ad -----
同場加映：戒糖可減磅
驚大家唔記得，荷里活大導Kevin Smith憑兩招成功減重85磅。其中一招，就係戒飲含糖飲品。見：荷里活大導 憑兩招減85磅
更多:
[踢爆潮文] 搵笨的「全球十大垃圾食物」
7個必須常飲水的原因
Fitz Diet 飲食
